Te Otinako 37 - Kiribati New Version Bible

Te Atiniberita(Te Oti 25.10-22)

1Ao e karaoa te Atiniberita Betarera man te kai ae te aketia, ae ab'akina bon tebubua tebwiina te tientemiita ab'akina, onobwi ma onoua te tientemiita raababana, ao onobwi ma onoua te tientemiita rietana.

2E kabira nanona ma tinanikuna n te koora ae itiaki ao e karaoa mataniwiina te koora ni katobibia.

3E karaoi m'am'a koora aika aua, ao e kanim n tatabeua nako ma rangan te Atiniberita ake aua.

4Ao i mwiina, e karaoi taian boua aika uaai man te kai ae te aketia, ae e kabiraki n te koora,

5ao e karin i nanon taian m'am'a akekei, b'a e aonga ni konaa n uotaki te Atiniberita n taian amo akekei.

6Matan te Atiniberita ni kabutaa, are karaoaki man te koora ae itiaki, bon te tabo n akoi

7E karaoi baike a maiu aika iai baiia ni kiba aika uaai aika koora

8aika a amanaki ao a katokaaki i aon tabon te Atiniberita ake uoua.

9A kaai ni kaaitaraa, ao a rabuna aon te tabo n akoi baiia ni kiba.

Taiboran te Kariki are E tabu(Te Oti 25.23-30)

10Ao e karaoa te taibora man te kai ae te aketia Betarera ae wanibwi ma wanua te tientemiita ab'akina, abwi ma aua te tientemiita raababana ao onobwi ma onoua te tientemiita rietana.

11E kabiria n te koora ae itiaki ao e karaoa mataniwiina ni katobibia

12ma tokina ae itibwi ma nimaua te mirimiita matentenna,

13E karaoi m'aam'a koora aika aua ao e kanim nakon taian ranga n tatabeua nako

14i rarikin te mataniwi. A na karin amon te taibora i nanon taian m'am'a

15ao a riai ni karaoaki man te kai ae te aketia ao a kabiraki n te koora.

16A na bane b'aai nako akana i aon te taibora ni karaoaki naba n te koora—taian boora, taian raurau, taian tiaeki, ao taian m'angko i bukin te angab'ai are te wain.

Te Kaintaura(Te Oti 25.31-40)

17Ao e karaoa te kaintaura Betarera man te koora ae itiaki. E karaoaki te kaintaura, n reitaki ma katamaroaana aika taian uee, a bane ni karaoaki man te koora ae ti teuana ae e amanaki,

18ma tenua m'aangana n iterana ake uoua.

19Bon iai katamaroaan ueen te kai te amon aika tenua ni katoa m'aangana

20ao aua i aon kaina.

21Bon iai naba taian uee aika a ure n te tabo are a otinako mai iai m'aanga ake kakauoua ma ni kaina.

22A karaoaki kaintaura, n reitaki ma taian m'aanga ao taian uee ni katamaroa, man te koora ae raneanea ae ti teuana ae e tia n amanaki.

23Bootan te koora ae raneanea are e kamanenaaki n te taura ma b'aina nako,

24n reitaki ma taian turee, e kaaniia tenibwi ma nimaua te kirokuraem.

Te Baonikarea i bukin Kabuokan Te B'ainikaboiarara Are E Kaakabubuaki(Te Oti 30.1-5)

25E karaoa naba te baonikarea Betarera i bukin te b'ai ni kaboiarara are e kaakabubuaki man te kai ae te aketia. Buuburana bon abwi ma nimaua te tientemiita ao raababana ma ab'akina ae ruabwi te tientemiita rietana ma koonana aika a rine rake kaanga koron te kaomm'aane.

26E kabiria n te koora ae itiaki ao e karaoa mataniwiina ni katobibia.

27Ao e kanim taian m'am'a aika koora n iterana ake uoua n te aro are e na konaa ni uotaki iai te baonikarea n taian amo.

28A karaoaki naba taian amo aikai man te kai ae te aketia ao a kabiraki n te koora.

Te B'a i bukin Te Katabutabu Ao Te B'ainikaboiarara Are E kaakabubuaki(Te Oti 30.22-38)

29Ao e rengana te b'a i bukin te katabutabu Betarera ma te b'ai ni kaboiarara ake a rengana te b'ai ni kaboiarara are e kaakabubuaki.