1N te bong teuana a taetae taiani burabeti nakon Eritai ni kaangai, “E rangi ni uarereke te tabo are ti kaboowi iai ma ngkoe.
2E aera ngkai ti aki karaoa riki ara tabo ni boowi ae e boou n te tabo teuana i rarikin te Karaanga are te Ioretan? Ti konaa ni karekei ara kai n tatabemaniira nako ma ni karaoia.”
Ao e taku Eritai, “E rangi n raoiroi te iango anne. Waakina karaoana.”
3Ao e taku te burabeti are temanna, “Ko aki iriira?”
Ao e taku Eritai, “Eng, N na iri.”
4Ao e iriia nako.
A m'ananga nakon te Karaanga are Ioretan, ao a waakina te koro kai.
5Ngke e tabe ni korokai te burabeti are temanna, ao e a ti kiba nako naba wiin ana angaraa, ao e b'aka i nanon te ran. Ao e takaarua teuarei ni kaangai, “Teuae ko karineaki! bon te angaraa ae I tangoia.”
6Ao e titirakinna Eritai ni kaangai, “E b'aka ia?” Ao e kotea te tabo are e b'aka iai te burabeti arei, ao e korea te m'akoro ni kai Eritai, ao e karea te tabo are e b'aka iai. Ao e a betirake naba wiin te angaraa nako aon te ran.
7Ao e taku Eritai nako ina, “Anaia.” Ao e kaaenakoa baina te burabeti arei n anaia.
Katokan Aia Buaka Tautian Turia Iroun Eritai8E aki toki ni kakabowi uean Turia ma ana mataniwi, ngke a boboo ni buaka uean Turia ma Iteraera, ao a kakatanoata ni kaangai, “I a tia ni baairea te tabo are ti na kaemb'a iai.”
9E katoa tai Eritai ni kaakanakoa ana kauring nakon uean Iteraera ni kaangai, “Kam na aki ri rarikin te tabo arei. Ane a tia ni katea aia kaemb'a tautian Turia iai.”
10Ma ngaia are, e tuangiia tautian Iteraera ake a mena n te tabo arei te uea b'a a na b'aab'aina te tatauraoi.
11Ao e rangi ni un uean Turia ngke e a ataia b'a tera ngkai ae e riki. E weteia ana aobitia ao e titirakiniia ni kaangai, “Antai mai buakomi ae e tuanga uean Iteraera ara babaaire?”
12Ao e taku temanna mai buakoia, “Te uea ae ko karineaki. Bon akea mai buakora. Ma bon te Iteraera ae arana Eritai. Bon te burabeti ngaia, ma ngaia are, e konaa n tuanga ana uea b'aai ni kabane, e ngae naba ngkana taian rongorongo aika ko taekin i nanon ae bon oin am ru.”
13Ao e kanakoa ana taeka te uea ae e kaangai, “Kakaaea b'a e mena ia, b'a N na kanakoia tautia b'a a na kairiia n nakomai.”
Ao a ataia b'a e mena Eritai n te kaawa are Totan ao a tuanga te uea.
14Ao e kanakoia ana taanga ni buaka te uea aika a bane aroia nako ikekei ma taian aoti ao kaanibuaka. A m'ananga ngke e bong ao a otab'aninia te kaawa arei.
15Ngke e uti ana tia m'akuri Eritai n te ingabong are i mwiina, ao e nooria b'a a otab'aniniaki aia kaawa irouia tautian Turia, ao e taku, “Teuae ko karineaki, tera ngkai ae ti nang karaoia?”
16Ao e taku Eritai, “Tai maaku. A m'aiti riki taanga ni buaka aika iroura ni kabotauaki ma ake irouia.”
17Ao i mwiina, e tataro ni kaangai, “Te UEA, buokia ni kanorabaa.” Ao E kanorabaa te tia m'akuri arei te UEA, ao e nooria b'a e onrake aon te maunga n aoti aika tenaan ai, ao kaanibuaka aika a ura ni katobibia Eritai.
18Ngke a tabe n rooroko ni kaaniia tautian Turia, ao e tataro Eritai ni kaangai, “Kamatakiia tautia aikai.” Ao E kamatakiia te UEA n te oota ae e rangi n oota.
19E taku Eritai nakoia aia taanga ni buaka aia kairiribai, “E a tia ni bure kawaimi, ao e bure naba ami kaawa ae kam na kawaria. Kam na irai b'a N na kairingkami nakon te aomata ae kam kakaaea.” Ao e kairiia Eritai nakoni kaawan te tautaeka i Iteraera are Taamaria.
20Ao ngke a boni bane raoi tautia i nanon te kaawa are e buubura arei, ao e tataro Eritai ni kaangai, “Te UEA, manga kaoki aia taratara.” E kaoki aia taratara te UEA, ao a nooria b'a ngaia a mena i nukan Taamaria.
21E nooriia uean Iteraera, ao e taku nakon Eritai, “Teuae ko karineaki. I a tiringiia?”
22E taku Eritai, “Ko na aki. Ko aki kataenikaiia tautia aikai n te bonibuaka, Ma ngaia are, akea kariaiakam n tiringiia. Ma n onean mwiin anne, ko na anganiia te am'arake ao te mooi, ao kaokiia nakon aia tia kairiiri.”
23Ao te uea e katauraoa te baka n am'arake ae korakora i bukiia tautian Turia, ao ngke a tia n am'arake, ao e a kanakoia. Ao e toki buakanakin Iteraera iroun Turia i nanon tabeua te tai.
Buakanakin Iteraera Iroun Benatata are Uean Turia24Tabeua te tai rimwi riki, ao e a manga botiia ana taanga ni buaka ni kabane uean Turia are Benatata, ao i mwiina, a m'aati nako Taamaria ni buakanna.
25Ao a reitanako buakanakina ni karokoa ae e a bon akea te am'arake i nanon te kaawa are e buubura arei. I bukin akean te am'arake, ao e a kabooaki atuun te aati n teuana te kirokuraem te tirewa, ao teuana te boora ae uarereke nakotarin te bitin n nimaua te m'akoro n tirewa.
26N te bong teuana, ngke e tabe n nakonako uean Iteraera i aon oon te kaawa, ao e takaarua te aine temanna nako ina ni kaangai, “Taiaoka, te uea ae ko karineaki. Buokai!”
27Ao e taku te uea, “Ke E buokiko te UEA. Tao ko taku ngkai b'a iai au uita ke au wain ae N na konaa n anganiko?
28Tera ae e riki iroum?”
Ao e taku neierei, “Ti karaoa ara boraraoi ngai ma te aine temanna ngke ti a rangi ni baki b'a ti na kang natira m'aane. Ao e taku neierei b'a ngkana ti kana natiu n te bong aei, ao ti a manga kana natina n te bong are i mwiina.
29Ma ngaia are, ti a kuukana natiu te m'aane, ao ti kanna ngkoananoa ao n te bong aei ngke I a nakon ana auti b'a ti na kana natina te m'aane, ao ngaia e a tia ni karabaa.”
30Ao e raeuai kunnikaina te uea i bukin nanokaawakina, ao e bane n nooraki kunnikaina aika a raeraeaki mai aana i bukina ngke e teretere raoi b'a e mena i aon taubukin oon te kaawa.
31Ao e taku, “I tataro b'a E na katuaaeai te UEA n te aro ae moan te korakora ngkana e bon tiku naba atuun Eritai i aon roroana nakon te ingabong.”
32Ao i mwiin aei, ao e kanakoa temanna te tia uarongorongo nakon Eritai.
E boni mena Eritai n ana auti n te tai anne, ao e kabowi ma taani kairiiri aika a kakannato i aon Iteraera. I m'aain rokon ana tia uarongorongo te uea, ao e a kaman tuangiia taani kairiiri Eritai ni kaangai, “E a kanakoa temanna b'a e na korea roroau te tia tiriaomata arei. Kaina te mataroa ngkana kam nooria, b'a e na aki rin. Ane e na bon ri mwiina naba te uea.”
33I m'aain banen ana taeka Eritai, ao e roko te tia uarongorongo ao e taku, “Bon te UEA ae e karokoi b'aai aika a kamaamate aika a riki aika i aora aikai, ao bukin tera ngkai ti na kakantaningaia b'a ngaia ae E na buokiira?”
Who We AreWhat We EelieveWhat We Do
2025 by iamachristian.org,Inc All rights reserved.
