Etekiera 28 - Kiribati New Version Bible

Motikan taekan Uean Turo

1E taku te UEA ae te Atua:

2Etekiera ae natin te aomata, ko na tuanga uean Turo au taeka ae e kaangai:

Ko rangi ni kainikatonga b'a ko iangoia b'a te atua ngkoe ao am kaintokanuea te kaawa ae Turo. Ane ko na taekinna b'a te atua ngkoe, ngke bon te aomata ngkoe.

3Ko taku n am iango b'a ko wanawana riki nakon Taniera ma n atai b'aai ni kabane:

4E a tia ni karikiko b'a te kaub'ai wanawanam, b'a iai am auti ni b'aai aika a kaonaki n taian koora ma tirewa.

5Bon te tia karikirake ngkoe ae e rabakau ao te kabanea ni kaub'ai ngkoe, ma a tia ni kairiko kaub'aim nakon te kainikatonga!

6Ko kabotauko i bon iroum ma te atua, ma ngaia ae ngkai N nang karaoiko Ngai ae te UEA ae te Atua

7b'a konaia kairiribai aika a iowawa. A na urui am b'ai ni kabane ake ko karekei n am m'akuri korakora.

8A na tiringko kairiribai n te aro ni iowawa, ao e na riki taari b'a ruanimatem.

9Ko na bon teimatoa naba n taekinna b'a te atua ngkoe ngkana ko aitara ma aiam? A na buakaniko, ao ko na maraki kaanga aroia aomata tabem'aang.

10A na tiringko ianena, ao ko na mate ni mateia te koraki aika a aki taromauriai. Bon aei au taeka Ngai ae te UEA.

Te kuna Ni Mate I bukin Uean Turo

11E taku te UEA:

12Etekiera ae natin te aomata, ko na anenea te kuna ni mate i bukin uean Turo ao ko na tuangnga au taeka ae e kaangai:

N te tai teuana, ko rangi n raoiroi, rabakau, ao ko rangi n taraa raoi.

13Ko maeka n te nne n aroka ao ko katokai i aom b'aai ni katamaroa aika a karaoaki n te atiibu ae e tamaroa ae e bati matana ao atiibu aika a tamaroa. A bane ni karaoaki n te koora ao a katauraoaki i bukim n te bong are ko bungiaki iai.

14I rinei baika a maiu ake iai baiia ni kiba b'a a teiakiniko ni mwengam i aon Au maunga are e tabu, ike ko nakonako i buakon atiibu aika a tamaroa aika a ura kaanga te ai.

15Ko rangi n raoiroi man te tai are ko bungiaki iai, ma tabeua te tai i mwiina ko a moanna ni karaoi b'aai aika a buakaka.

16Ko iokinib'ai ma botannaomata tabeman ao ko a rikirake ni iowawa ao ni buakaka. Ma ngaia are I kairoroiko b'a ko na kiitana Au maunga, ao baika a maiu aika iai baiia ni kiba ake a kakaawakiniko ake a manga kakioko nako man atiibu aika tamaroa.

17Kainikatonga n raoiroin taraam, ao e tanoata taekam b'a ko a moanna n tei ni baba. Ao bon anne bukina ngkai I kab'akako nako aon te tano ma ni kariaia uea tabem'aang b'a a na kakanikoko.

18Ko a tia ni kam'aneia taan iokinib'ai aika a m'aiti ake tekorakina n te aro are e a buakaka am tabo n taromauri. Ma ngaia are, I a kaurarakea am kaawa ae e buubura n te ai ma ni kab'aka. Ngkai a bane aomata n ti noora te mannang n te tabo are e tei iai ngkoa am kaawa ae e buubura,

19ao a kubanako aomatan botannaomata ake tabeua. E rangi ni kakamaaku katuaaeam, ao ko a mauna n aki manga oki.

Motikan taekan Titon Ao Te Rau i aon Iteraera

20E taku te UEA:

21Etekiera ae natin te aomata, ko na kabuakaka te kaawa ae e buubura are Titon

22ao tuangiia kaaina ni kaangai:

Bon ami kairiribai Ngai ae te UEA ae te Atua! A na neboai aomata ngkana I katuaaingkami, ao a na nooria b'a I bon tabu.

23N na kanakoa te aoraki ae e kamaamate b'a e na kamaunaingkami, ao N na kanakoia kairiribai b'a a na tauingkami ma n katobibingkami. A na tiringaki am aomata, ao ko na ataai b'a bon te UEA Ngai.

24Ngkana e riki anne, ao ane a na aki manga iowawa kaawa akana i rarikin Iteraera aika a kabuakakaia ao a karikiia b'a a na namakinna b'a kaanga a mena ni katawanangin kaai aika kateketeke ma akanta. Ao a na ataai Iteraera b'a boni Ngai ae te UEA ae te Atua ae I karaoi baikai.

Kakab'aiaan Iteraera

25E taku te UEA ae te Atua:

N te bong teuana N na ikotiia Iteraera mani botannaomata nako ake e uamaae nako i buakoia, ao a na bane n nooria botannaomata b'a I tabu. A na manga maeka riki Iteraera n te aba are I angan Au toro ngkoa are Iakob'a.

26A na mano ao a na katei taian auti ma aia nne n aroka ni kureebe. A na aki manga reke n te kangaanga, b'a N na katuuaia aia kairiribai aika rangi n riiribaia. A na ataia Iteraera b'a bon aia UEA Ngai ao Atuaia.