1Merekitereka arei bon uean Tarem, ao ana ibonga te Atua are Moan te Rietaata. Ngke e oki Aberaam man te buaka are e kamateia iai uea, ao e kaitibo Merekitereka ma ngaia, ao e kakab'aiaki irouni Merekitereka;
2ao Aberaam e anganna kaka teuana te katebwina ni m'akoro mani m'aitin ana b'ai aika kakaokoro nako ake a reke i rouna. Moan nanon te ara ae Merekitereka bon “Uean te Raoiroi”; ao i bukina ngkai uean Tarem, ao iai naba nanona ae “Uean te Raoi”.
3Akea taekan tamana ke tinana ke taekaia ana bakatibu; ao akea naba taekan ana bongi ni bung ke taekani matena. E riki b'a kanga ai aron Natin te Atua; e tiku b'a te ibonga n aki toki.
4Kam nora aroni kakannaton Merekitereka! Aberaam, are te bakatibu ae kakannato, e anganna kaka teuana te katebwina ni m'akoro mani m'aitin ana b'ai aika kakaokoro nako ake a reke i rouna n te buaka.
5Ao ake kanoan Rewi, ake a anganaki te nakoa n ibonga, a tuangaki n te Tua b'a a na anai kaka teuana te katebwina ni m'akoro mani m'aitin aia b'ai aika kakaokoro nako tariia, ake bon ana kariki naba Aberaam.
6E aki riki Merekitereka mairoun Rewi, ma e anaa teuana te katebwina ni m'akoro man ana b'ai nako Aberaam, ao e kakab'aia Aberaam, are teuare anganaki taian taeka n akoi.
7E bane n ataaki b'a te aomata are anga te kakab'aia e kakannato riki nakon are e kakab'aiaki.
8A anganaki ibonga te kabwianib'ai mairouia aomata nako. Ma a bane ni mate ibonga, ma ti Merekitereka ae aki, n ai aron taekana n te B'aib'ara.
9Ma ngaia aei, ngke e anga te kabwianib'ai Aberaam, ao e kona naba n taekinaki ae kangai, b'a Rewi (ake taan anai kabwianib'ai natina) e anga naba te kabwianib'ai.
10B'a e tuai ni bungiaki Rewi ngke e kaitibo Merekitereka ma Aberaam; ma e kona naba n taekinaki ni kangai, b'a rab'atan Aberaam are ana bakatibu Rewi, ai bon rab'atan naba Rewi n te tai anne.
11Ma ngaia aei, b'a ngke arona b'a e kororaoi aron te nakoa n ibonga are iroun Rewi ma ana kariki, (b'a a anganaki aomata te Tua n te nakoa aei), ao bon akea kainanoan te ibonga riki temanna ae kaokoro b'a e na kaoti, n ai aroni Merekitereka, ae tiaki mairoun Aaron.
12Ao ngkana e bitaki aron rinean te ibonga, ao e na bitaki naba te Tua.
13B'a teuae a taekinaki baikai i bukina bon ara Uea, are kaain te baronga ae kaokoro, ae akea temanna i buakoia kaaina ae e a tia n taua te nakoa n ibonga.
14B'a E bon ataaki ara Uea b'a E riki man te baronga are Iuta, ae akea taekana irouni Moote ngke e taekinia ibonga.
Te Ibonga Temanna ae ai aroni Merekitereka15E a oota raoi riki te baere I a tia n taekinna, ngkae e kaoti te ibonga temanna ae ai aroni Merekitereka,
16are riki n ibonga, tiaki i bukina ngke kaain te utu n ibonga ngaia, ma i bukina ngkae e aki totoki maiuna.
17B'a e kaotiotaki taekana ae kangai:
“Bon te ibonga Ngkoe n aki toki
n ai aroni Merekitereka.”
18E kakiaki te tua are rimoa i bukini mamarana ma aki manenana.
19B'a akea te bae e kona ni kakororaoia te Tua; ma iai te kaantaninga ae raoiroi riki, are ngaia ae ti a kona iai n roko ni kaania te Atua.
20I rarikin te kaantaninga ae raoiroi riki, ao bon iai te taeka ni berita. Akea te taeka ni berita ae karaoaki ngke a riki b'a ibonga aomata akekei.
21Ma Iesu E riki n ibonga n te taeka ni berita iroun Teuare kangai nako Ina,
“E taetae n tuea te Uea,
ao E na aki bita nanona:
‘Bon te ibonga Ngkoe n aki toki.’ ”
22Ao e riki naba iai Iesu b'a kakoauan te boraraoi ae raoiroi riki.
23A m'aiti aia koraki n ibonga te koraki arei, ma a bane ni mate ao a aki kona ni wakina nako aia m'akuri.
24Ma Iesu E boni maiu n aki totoki, ao e tiku n aki nako mai Rouna nakoana n ibonga.
25Ma ngaia ae E kona ngkai ao n taai nako ni kamaiuia akana nako n te Atua i Rouna, ngkae E maiu n aki toki b'a E na bubuti i bukiia.
26Iesu ngkanne bon te Ibonga ae Kakannato ae tau i bukira; E kukurei te Atua i Rouna, akea kabuakakaana ma baarekana, E kam'awaki mai rarikiia taani bure, ao E karietataki riki i aon taiani karawa.
27E aki riai i Rouna, n ai aroia ibonga ake a kakannato, b'a E na anga karea n te bong ae koraki, n anga moa i bukin oin ana bure, ao rimwi i bukin aia bure aomata: b'a ti teuana karaoan aei i Rouna, ngke E anga Ngaia b'a te karea.
28B'a te Tua e rineia aomata aika a aki kororaoi n aroia b'a ibonga aika kakannato; ma te taeka n akoi are karaoaki ma te taeka ni bau are roko rimwi i mwin te Tua, e rinea te Nati b'a te ibonga ae kororaoi n arona n aki toki.
Who We AreWhat We EelieveWhat We Do
2025 by iamachristian.org,Inc All rights reserved.
