Ieremia 9 - Kiribati New Version Bible

1Tera ngke a riki matau

b'a koburake n ran ni mata,

n te aro are I konaa n tang iai ni bong ao ni ngaina

i bukiia Au aomata

ake a tia n tiringaki.

2Tera ngke I konaa n nakon te rereua

ni kakaaea te tabo ni karabaraba

mairouia aomata ni kabane aika a b'anganikewe

ao aika a aki kakaonimaki nakon te Atua.

E kaeka Ieremia te UEA

3Ao E kaeka te UEA:

Taeka ni kewe mai nanon wiia

au aomata

ti te bo ma taian kanoanikatebe ma te kainikatebe.

Are a rikirake maiai aia m'akuri n aonikai

ngaiia n tatabemaniia nako,

n te aro are bon akea temanna mai buakoia

e kakoaua ae te Atua Ngai.

4Ieremia, a bane raraom

ma am koraki

n taekina te kewe i bukim,

ma ngaia ae ko na aki onimakiniia.

5A kakuaia i bon irouia,

ni kakaea te anga teuana ae e boou

ni keweia raoraoia.

6A bane aomata n aonikaiia raoia nako

ao bon akea temanna i buakoia

ae kakoauaai b'a te Atua Ngai.

7Ma ngaia are, I kabooua nanoia Au aomata

kaanga te koora

ae e kabouaki n te ai ae e uram'aaka.

Bon akea te anga riki teuana ae N na karaoia.

8A taku b'a a tangira te rau,

ma bon te kewe ae e kamaamate aei,

ti te bo ma te kanoanikatebe ae ko teke iai

ae ko aki kaantaningaia.

9Ko na anganai bukina teuana,

b'a e aera ngkai a na aki katuaaeaki.

Bon aei au taeka Ngai ae te UEA

ae Moan te M'aaka.

Tangin Ieremia i bukiia Ana Aomata

10I tang i bukin te tabo n uteute

are i aon te aba ae e tabukibuki.

Ai bon akea kain aona, ao e mate tanona n te kabuebue

n te aro are bon akea te tia m'ananga ae e kan rikekei.

Bon akea te kao ae e konaa ni kuneaki ikekei,

ao a bane n tia mannikiba ma maan aika a aki manana

ni mauna nako.

11Ao I ongo ana kaeka te UEA,

“Ngkana e tia Au m'akuri, ao e na riki Ierutarem ao kaawan nako Iuta b'a b'ariko ni b'ai aika a uruaki

ike ti taian tiakaore aika a maeka iai.”

E Aera Ngkai E Kamaunaaki Te Kaawa

12I taku nakon te UEA, “Bon akea mairoura ae e ataia b'a e aera ngkai e a riki te aba b'a te rereua ae e aki totouaki. Ko aki kab'arab'ara b'a tera bukina?”

13E taku te UEA:

I kamaunaa te aba i bukina b'a a aki ongotaeka aomata i Rou ao a katinanikui au Tua nako ma au Taeka n reirei nako.

14A taningabono ao a taromauria B'aara, n ai aron are a karaoia ngkoa aia bakatibu.

15Ma ngaia are, I berita Ngai ae te UEA ae Moan te M'aaka, ae Atuaia Iteraera, b'a N na kaboitiniia ni kaam'arakeia ma ni kamooia.

16N na kamaenako ia i abaia ianena ae a tuai man ongongo taekana ma aia bakatibu. Ao n tokina, N na kanako ia kairiribai b'a a na tiringaia nikiraia.

Aine Ake A Kabooaki B'a A Na Tanginiwenei

17E taku te UEA ae Moan te M'aaka,

“Kanako ia aine aika

a kaboaki b'a a na tanginiwenei

n tain te bootaki n taunimate,

ai moara ra riki aine

ake a konaa n tang n takaarua.”

18Ao a taku aomata,

“Kawaekoaia n nakomai

b'a a na tang i bukira,

ni karokoa a taonako matara

n taian rannimata.

19Ao ngkai ngaira aika ti tang i Tion,

‘Ti a urubekebeke!

Ti aki konaa n taona mamaara.

A a tia n uruaki ara auti,

ao ti a riai ni kiitana abara.’

20“Ti butingkami aine

b'a kam na kakauongo raoi

nakon te b'ai ae E taekinna te UEA.

Ti na reireiningkami te anene ni mate

are kam konaa ni manga reireiniia

natimi aine ma raoraomi:

21Ti mena i nanon ara nono,

ma e karaba n roko te mate

ri nanon ara winto nako.

E bon oroia naba

ara ataei ni kab'akaia ngke a takaakaro

ao ara rorobuaka n ataei aika a rangi ni korakora naba.”

22“E a tia n tuangiira te UEA

b'a e na onrake te tano

n rab'ataia aomata aika a mate,

kaanga oin taian uita aika a tuai ni bootaki

ke kaanga nakotariia maan.”

Te B'ai Ae E Tangiria Riki Te UEA

23E taku te UEA:

Kam na aki kamoamoa i bukin wanawanami

ke korakorami ke kaub'aimi.

24Ngkana kam tangiria ni kamoamoaingkami,

ao kam iango raoi riki ngkana

kam kamoamoaa taromauriakiu,

Ngai ae te UEA.

Te b'ai ae I tangiria riki

bon kaotan te akoi

te motikitaeka ae eti, ao te nanoanga

nako ia aomata ni kabane n te aonnaba.

25A na roko boong are N na katuaaia iai bootanaomatan Aikubita,

26Etom, Ammon, ao Moaba, ao barongan te rereua. A a tia ni korotabonim'aneaki mm'aane ni botannaomata aikai, ma a aki taromauriai. Ao bon ti te bo naba ma ngkami kaain Iuta. A a tia ni kaitiakaki rab'atami, ma a tuai man bitaki nanomi.