1N te bong teuana ao e wetea temanna mai buakoia burabeti ake tekorakina Eritai, ao e taku, “Anaa te b'atoro ni b'aa n oriwa aei, ao katauraoiko b'a ko na nako nakon te kaawa are Ramota Kireata.
2Ngkana ko roko ikekei, ao kakaaea te m'aane ae Ieu ae natin Ieotiab'ata, ae tibun Nimti. Kairiia nakon te tabo ae na ti ngkami iai uoman,
3ao kab'aroa b'aan te oriwa i aon atuuna ni kaotia b'a ngaia ngkai te uea ae e boou.” Taetae nako ina ni kaangai, ‘E a tia n rineiko te UEA b'a uean Iteraera. Ao i mwiin anne, kawaekoako n nako-tai manga babaenikai.’ ”
4Ao e nako Ramota te burabeti are e ataei arei.
5Ao ngke e roko, ao a tabe ni kabowi taian aobitia n te taanga ni buaka. Ao e taku, “Teuae ko karineaki, Iai au rongorongo nakoim.”
Ao e taku Ieu, “Antai iai mai buakora?”
Ao e taku te burabeti, “Teuae ko karineaki, boni ngkoe!”
6Ma ngaia are, e teirake Ieu ao e rin nako. Ao e kab'aroa b'aan te oriwa te burabeti are i aon atuun Ieu ao e taetae nako ina ni kaangai:
Aio ana rongorongo te UEA ae Atuan Iteraera nakoim, “Bon te UEA Ngai, ao I a tia n rineiko b'a aia uea au Aomata aika Iteraera.
7I tangiriko b'a ko na kamaunaiia ana utu Aaba, b'a e aonga n katuaaeaki Ietebera i bukin tiringakiia burabeti, ao au taani m'akuri ake tabeman.
8A riai ni bane ni mate m'anen ma ataei ni maaneen ana utu Aaba, e aoria ngkana te toro ke te inaomata.
9A na bane n tiringaki ana utu ni kabane, n ai aroia ana utu Ieroboam are natin Nebata ao Baatia are natin Aiia te m'aane.
10I bukin rab'atan Ietebera, e na kanaki rab'atana irouia kamea n te kaawa are Ietireera. E na bon akea nikiran rab'atana ae e na taunaki.”
Ao i mwiina, e kauka te mataroa te burabeti are te ataei arei ao e a biri n otinako.
11E okirikaaki Ieu nakoia ana mataniwi, ao e titirakinna temanna ao e taku, “Tera ae e tangiria te burabeti are e baba arei? Iai te kaangaanga?” E kaeka Ieu ao e taku, “Kam bon ataia ao kam ataa naba aron taetaena.”
12Ao e taku, “Kai tiaki ataia. Tera are e taekinna?”
E uota te rongorongo mairoun te UEA. E taku b'a E a tia te UEA n rineai b'a N na uea n onea mwiin uean Iteraera.
13A kawaekoaia n anai kunnikaiia ma ni kamaenakoia i aon te tabo are e tei iai Ieu. E katanga te bu temanna, ao a bane n takaarua ni kaangai, “E a uea Ieu.”
Tiringakin Ieoram ma Aati Iroun Ieu14E a tia ni ikoaki kakaiaki uean Iteraera are Ieoram n te buaka i Ramota ngke e kataia n totokoa te uea are Ataera, ao tautian Turia.
15E a marurung ngkai Ieoram i Ietireera, ao e a roko ikekei uean Iuta are Aatia ni kawaria.
16Tabeua te tai, ao e roko Ieu i Ramota b'a e na kakaaea angan tiringakin Ieoram.
E taku nakoia ana mataniwi, “Ngkana kam tangiria b'a N na riki b'a te uea, ao kam na aki kaotinakoa temanna man te kaawa aei. B'a ane a na nako Ietireera ni kaongoa Ieoram. Ao i mwiin anne, e tokara ana kaanibuaka Ieu ao e nako Ietireera.
17Ngke e noora Ieu ma ana m'aane teuare te tia tei n te taua n taratara b'a a tabe n roko, ao e takaarua nakon te uea ni kaangai, “I nooriia te koraki ni m'aane aika a tabe n nakomai.”
Ao e taku Ieoram, “Kanakoa temanna b'a e na titirakiniia b'a te roko n ae e raoiroi ke tiaki?”
18Ao e otinako temanna te tautia, ao e taku nakon Ieu, “E tangiria te uea are Ieoram n ataia b'a tera rokomi aei?”
Ao e taku Ieu, “Akea am b'ai iai, ma nakomai iriia au taanga ni buaka.”
Ni bon te tai naba arei, ao e taku teuare e te tia tei n te taua n taratara, “Te uea ae ko karineaki, E a tia n roko irouia te koraki arei teuare e kanakoaki ma e tuai mani karairaki.”
19Ma ngaia are, e a manga kanakoa riki temanna i aon te aoti Ieoram, are e a manga kawara naba Ieu ma n taku, “E tangiria te uea n ataia b'a tera rokom aei?”
Ao e taku Ieu, “Akea am b'ai iai, ma nakomai iriia au taanga ni buaka.”
20E a manga taku naba te tia tei are n te taua n taratara, “Te uea ae ko karineaki, e a tia n roko irouia te koraki arei teuare e kanakoaki nakoia ma e tuai mani karairaki naba. Tataninga teutana. Te m'aane ae e rimoa aei e kabuta te kaanibuaka n aki akaaka, boni bae n Ieu.”
21Ao e taku Ieoram, “Katauraoa au kaanibuaka.” Ao i mwiina e toka ma Aatia i aon te kaanibuaka, ao a butinako n otinako ni kawara Ieu. A kaai ni kaaitibo n te aba are aban Naabota.
22Ao e titiraki Ieu ao e taku, “Tera rokom aei?”
Ao e taku Ieu, “E na kangaa n reke te raoi? Tinam are Nei Ietebera boni ngaia ae e kairiia aomata nakon taromaurian bouananti ao karaoan m'akuri n tabunea.”
23Ao e takaarua Ioram ni kaangai, “Aatia, ti a kiitana ikai b'a te m'akuri ni kam'ane te baei.” Ao ngke e kataia ni biri nako Ioram,
24ao e katebe Ieu, ao e teke marenan angan Ioram n ewara buroona, ao e otinako mai b'aab'aana. Ao e b'aka ni mate i aon ana kaanibuaka.
25Ao Ieu e tuanga Biteka are te tia buokia ni kaangai, “Anaa rab'atan Ioram, ao karenakoa i nanon te tawaana are n aban Naabota. Ko uringa ngkoa ngke ti m'ananga n te kaanibuaka,
26are ngai ma ngkoe are ti mena i akuun taman Ioram are Aaba, ao are E a kaangai naba te UEA nakon Aaba, ‘I noora kamatean Naabota ma natina m'aane ngkoananoa. Ao I berita nakoim b'a N na katuaaeko ni bon te tawaana naba aei.” Ma ngaia are, e tewenakoa rab'atan Ioram ikekei n aron are E a tia n tua te UEA.”
27E noori b'aai aika a riki aikai te uea are Aatia, ao e kataia ni birinako nakon te kaawa are Betaakan, ma e reke iroun Ieu ngke e kakioa ao e takaarua ni kaangai, “Tiringnga naba.” Ao a katebea Aatia ana tautia Ieu ngke e biri n te kawai are e nako Kura i rarikin Biream. Ao e waaki nako ni karokoa Mekito ike e a mate iai.
28A anaa rab'atana naake bon ana mataniwi, ao a katokaa i aon te kaanibuaka ma ni kaokia nako Ierutarem ike a taunna iai i rarikiia ana bakatibu.
29E a tia ni uea Aatia i aon Iuta n ana katebwi ma teuana n ririki n uea Aaba are natin Ioram te m'aane.
Tiringakin Nei Ietebera Iroun Ieu30Ao e waaki ni kaineta Ietebera teuare Ieu, ao ngke e ongo Nei Ietebera rokon Ieu, ao e kabiri matana, ao e karaoa irana. Ao i mwiina e tei i matan ana winto n tataningaa rokona.
31Ao ngke e rin Ieu i nanon mataroan te kaawa, ao e takaarua Nei Ietebera nako ina ni kaangai, “E aera ngkai ko nakomai ngkoe ae te tia tiriaomata? Ko na tiringa te uea? Ko buakaka riki nakon Timri.”
32Ao e tararake Ieu nakon te winto ao e titiraki ni kaangai, “Iai ae e tei n au itera ae e mena i eta ikekei?” Ao a kaotinakoi atuuia tabeman taani m'akuri n te bareti man te winto,
33ao e takaarua Ieu nakoia ni kaangai, “Karenakoa te aine anne man te winto.” A karenakoa, ao e tebera te o raraana, ao e teberiia naba aoti ake a toubekaa rab'atana.
34Ao e nako Ieu b'a e na am'arake ma ni mooi, ao e a manga tuangiia tabeman taani m'akuri ni kaangai, “E aoria ngkana te aine ae e buakaka ma ngkai te natinuea te aine ngaia, ao kam bon riai naba n taunna raoi.”
35Ma ngke a otinako b'a a na tauna rab'atana, ao a kunea b'a ai ti tab'anouna n tiku, ao riini baina ake uaai ma waena ake uaai.
36A tuanga Ieu taekani baikai, ao e taku Ieu, “E tuangaki ngkoa Eritai iroun te UEA b'a e na kanaki rab'atan Nei Ietebera irouia kamea i Ietireera ikai.”
37Ao e taku b'a e na maenako rab'atan Ietebera i aontano kaanga butaeia maan, ma ngaia are, akea ae e konaa n ataia b'a antai ngaia.
Who We AreWhat We EelieveWhat We Do
2025 by iamachristian.org,Inc All rights reserved.
