Taeka n Rabakau 24 - Kiribati New Version Bible

Te Katebwi ma Ruaiwa n Taetae

1Ko na tai mataaiakiniia taani m'am'anaa te aba

ke n tangiria n riki b'a raoraoia.

2Akea riki te b'ai ae a na iangoia

ma n taekinna

b'a ti te tiritiri ao te iowawa.

Te Ka Uabwi n Taetae

3Kamanenaa te wanawana ma te ataib'ai

i bukin katean mwengam;

4karaoa te iangoraoi b'a e na kaon ruuna nako

n taian kaub'ai aika a rangi ni kakaawaki.

Te Kauabwi ma Teuana n Taetae

5E karekea te korakora te wanawana,

ao e anga te m'aaka te rabakau.

6E reke taian tokanikai n taiani buaka

man te kakauongo raoi nakon taeka n reirei

ao karaoan taiani babaaire aika a m'aiti.

Te Kauabwi ma uoua n Taetae

7E rangi ni m'aiti te wanawana i bukiia nanobaba!

Bon akea manenan taeka n reirei.

Te Kauabwi ma tenua n Taetae

8Bon akea riki aika a iaiangoa te kakiriwe

b'a bon ti taani kariki kiriwe.

9Bon akea ae e tangiriia nanobaba aika akea aia iango

aika a ti iangoi kawai nakon te bure.

Te Kauabwi ma aua n Taetae

10Tai b'ara n nano ma ni kakeaa am iango

i nanon tain te kangaanga.

Te Kauabwi ma nimaua n Taetae

11Tai mamaara ni kamaiuia

aika a nang mate.

12Tai kaangai, “I aki ataia!”

E konaa n ataa nanom te Atua.

E tarataraira ni tatabemaniira nako

ao e atai ara iango.

Ao e na manga kabooa mwiin

are ti karaoia te Atua.

Te Kauabwi ma onoua n Taetae

13E raoiroi ana karewe te manibeeru i bukimi

natiu,

ao e karewerewe.

14Bon ti te bo te wanawana ma ana karewe te manibeeru

i bukin maiumi

e na raneanea am bong aika a na roko

ngkana ko kunea.

Te Kauabwi ma Itiua n Taetae

15Ko na tai riki b'a te aomata ae e iowawa

ae e buakaniia aomata aika a raoiroi

ma ni kammarakia aia utu.

16E ngae ngkana b'aka aomata aika a raoiroi

itiua te tai,

ana manga bon teirake naba,

ma ngkana e oreaki

te aomata ae e buakaka n te kabuanib'ai

ao ai bon anne naba tokina.

Te Kauabwi ma Wanua n Taetae

17Ko na tai kukurei

ngkana ko noora am kairiribai

b'a e bae waena ma ni b'aka.

18B'a ane e na nooria te UEA

ao e na nanokawaki iai.

Ao ane e na toki

unna irouia.

Te Kauabwi ma ruaiwa n Taetae

19Kam na aki raraoma

irouia aomata aika a buakaka

ke ni karika te nanonibwi iroum.

20A na waekoa ni bua

kaanga uran te taura

ae e toki urana.

Te Ka tenibwi n Taetae

21Natiu, kam riai ni karinea

te UEA ao te uea,

ao kam na aki iraorao

ma aomata aika a kakaitaraia

nakon temanna mai buakoia uakanne.

22Antai ae e ataia b'a tera te kabuanib'ai

ae e na karokoa

te UEA ke te tia tautaeka?

Taeka n Rabakau riki tabeua aika a kawanawanaa te aba

23Aikai riki tabeua taian taeka n rabakau

aika a kawanawanaa te aba:

Ko na karaoa ae e riai

ngkana ko motikitaeka.

24A na ribaiko

man kamaraiako

aomatan botannaomata nako

ngkana ko kainaomata te tia bure.

25Ma a na nakoraoi b'aai ni kabane nakoim, ao ko na teetekeraoi

ngkana ko katuaaea te tia bure.

26Kanikinaean te iraorao ni koaua

bon te anga te kaeka

ae e raoiroi.

27Katauraoi moa am tawaana

ao uniki arokam

i m'aain katean mwengam.

28Ko na aki bukina temanna

ae akea ana bure.

Ko na bon aki tataekina te kewe

29ke ni kaangai nakon temanna,

“N na kaboraoai ma ngkoe!”

30I nakonako n te taina i rarikin ana tawaana

ao ana nnenikureebe

te aomata ae e taningaroti ma n nanobaba.

31E onrake nanoia

n taiani kateketeke ao taiani uteute n taabo

ao e a tia ni b'aka

oona te atiibu.

32E anganai te reirei

nooran te aro aei irou:

33Te nimatutuu. Te Kiro ni matu.

Booti baim

ao te kamatuui baim.

34Ao ane e na karina n oreiko te maiu ni kainano

ao a na biri nako b'aai ni kabane!