Taniera 5 - Kiribati New Version Bible

Ana Baka n Am'arake Beretiata.

1Ao e kaoiia teuana tengaa aomata aika a kakannato te uea are Beretiata nakon ana baka n am'arake ae e buubura, ao a kaai ni mooi wain.

2Ao ngke a tabe ni mooi, ao e tua Beretiata b'a a na uotaki nakoina taiani koora ma m'angko ma boora ake taian tirewa ake e anai tamana are Nebukaneta man te Tembora are i Ierutarem. Ao e tib'ai nakoia ana iruwa ake a kakannato, ma buuna nako, ao nakoia buuna naba ni kewe b'a a na mooi iai.

3Ao n te tai ae e aki maan, ao a roko ana m'angko ma boora ake taiani koora, ao a bane ni mooi mai iai

4ao a neboa te anti are e karaoaki man te koora, ma te tirewa, ma te buraonti, ma te biti, ma te kai, ao te atiibu.

5Ao e rina ni kaoti bain te aomata, ao e koroboki i aon oon nanon te bareti n te tabo are e rangi n oota nako iai ootan te taura. Ao te uea e noora te bai arei ngke e tabe ni koroboki.

6E mainarake te uea ao e rangi ni maaku n te aro are a ruru waena.

7Ao e takaarua b'a a na kawaekoaaki taan tabunea, ma ibonga, ao taani borau. Ao ngke a rin, ao e taku te uea nakoia, “Ane e kona ni wareka te koroboki aei man tuangai nanona, ao e na karinaki te niiniira ae e uraro are aia b'ai uea, ao e na kabaeaki te m'ae ni karineaki ae te tiein ae te koora i roroana, ao e na riki b'a te kateniman ni m'aaka i nanon te abanuea.”

8Ao a bane n roko ana taani iango te uea ma bon akea temanna ae e kona ni wareka te koroboki arei, ke n tuanga te uea nanona.

9Ao e rikirake te maaku ae e korakora iroun te uea are Beretiata n te aro are e a mainarake moana, ao a aikoa ataa te b'ai ae a na karaoia ana taani iango te uea.

10Ao e ongo tinan te uea n aine karongoaan te uea ma ana taani iango, ao e a rin nako nanon te tabo n am'arake. Ao e taku, “E na maiu te uea n aki toki! Taiaoka, karaua nanom, ao tai kanakoa nanom.

11Boni iai te m'aane temanna n abanueam ae iai ana konab'ai ae e raka, e wanawana, e m'aatai n te kab'ara mii, e rabakau ni kaiwa, ao e atai nanoni baika a raba;

12ma ngaia ae ko na kawaekoa te aomata ae Taniera are e aranaki ngkoa iroun te uea b'a Beretetiata, ao e na tuangko nanoni baikai ni kabane.”

Kab'araan te Koroboki iroun Taniera.

13Ao e uotaki ni karinaki Taniera n te tai ae e waekoa nako matan te uea, ao e taku te uea nakoina, “Boni ngkoe Taniera, taenikain Iutaia are e anaiko tamau are te uea mai Iuta?

14I a tia n ongo b'a e mena tamnein te Atua ae e tabu i nanom n te aro are iai iroum te konab'ai, te rabakau ao te atatai.

15A karinaki taani iango ao taan tabunea b'a a na wareka te koroboki, ao a na tuangai nanona, ma a bon aki kona ni kunea nanona.

16Ao ngkai, I a tia n ongo b'a ko kona ni kunei nanon baika a raba, ao ni kab'arai nanoia. Ngkana ko kona ni wareka te koroboki ma n tuangai nanona, ao e na katokaaki niiniiram are e uraro are b'ain te bareti, ma ni kabaeaki i roroam te m'ae ni karineaki are te tiein te koora, ao ko na riki b'a te kateniman ni m'aaka i nanon te abanuea.”

17E kaeka Taniera, “Kaawakina am b'ai n tangira, ke anganiia tabem'aang. N na wareka te b'ai ane e korobokiaki nakoim te uea ae ko karineaki ma

18“Nooria te uea, bon te Atua ae e m'aaka ae E karika taman Nebukaneta b'a te uea ae e korakora, ao E anganna te m'aaka ma te karineaki.

19E rangi ni korakora n te aro are a maaku man ruru botannaomata, ao aekaki n reeti nako i rouna. E tiringa ane e kan tiringnga, ao e kamaiua ane e kani kamaiua. E karinea ke e tewenakoa ane e bon taku.

20Ma i bukina ngke e a manga kainikatonga ma n taningabono, ao n tiritiri, ao e a kam'awaki man ana kaintokanuea ao e bua nnena ni karineaki.

21E kanakoaki man te kaawa, ao e a riki b'a kaanga ana iango te man. E maeka ma taian aati, e kana te uteute n ai aron te kao m'aane, ao e maeka n taabo aika a katawanang, aika akea katanana iai man te aoi. Ao n tokina ao e a kakoauaa b'a bon te Atua ae e m'aaka ae e taui aron ueaia aomata, ao E kona n anga nakon ane E bon taku.

22Ma ko rawa ni kananorinanoko, ao ko bon atai baikai ni kabane b'a bon natina te m'aane ngkoe.

23Ko kakaitaraa UEAN karawa ngke ko uoti m'angko, ma taiani boora ake a anaaki man ana Tembora. Ao ko mooi mai iai ngkoe ma am taani iango, ma buum, ao buum ni kewe, ao kam kamoamoaia anti ake a karaoaki man taiani koora, tirewa, buraati, biiti, taiani kai, ao atiibu, anti aika a aki noraaba ao a aki konaa naba ni kakauongo, ao a bon aki ataa te b'ai teuana. Ao kam aki karinea te Atua ae e mena maiumi i nanoni baina, ao E bairei b'aai ni kabane aika kam karaoi.

24Ao bon anne bukina are E kanakomaia iai te bai te Atua b'a e na koroi taeka aikai.

25Ao aikai taeka ake a koreaki: Te Ware, Te Ware, Te Rawaawata, Te Bwenauaaki.

26Ao aikai nanon taeka aikanne: Te Ware, E a tia ni wareki m'aitin am bong te Atua, ao E na karokoa n tokina;

27Te Rawaawata, Ko a tia ni katineaki n te b'ai n tau rawaawata, ao ko kuneaki b'a ko a rangi ni beebete;

28Te bwenauaki, E a tia ni bwenauaaki ueam, ao a anganaki kaain Miria, ma kaain Bootia”

29Ao e anga ana taeka Beretiata n te tai ae e waekoa b'a e na katokaaki niiniiran Taniera are te niiniira are e uraroo are niiniiraia uea, ao e na kabaeaki i roroana te m'ae ni karineaki ae te tiein te koora. Ao e na riki b'a te kateniman ni m'aaka i nanon te abanuea.

30Ao e tiringaki Beretiata are ueani B'aburon ni bon te tairiki naba anne;

31ao e anganaki Taraiati are kaain Miria are ai 62 ana ririki ni maiu b'a te tia onomwi n ueana.