Mataio 4 - Kiribati New Version Bible

E a Kaririaki Iesu(Mareko 1.12,13; Ruka 4.1-13)

1 Ebera 2.18; 4.15 E kairaki rake ngkanne Iesu iroun te Tamnei are Raoiroi nakon te rereua b'a E na kaririaki iroun te riaboro;

2ao E aki mamatam angaun te ngaina ao angaun te bong, ao rimwi E baki.

3Ao E kawaria te riaboro ao e taku nako Ina, “Ngkana Natin te Atua Ngkoe, ao Ko na tua b'a a na riki ni kariki atiibu aikai.”

4Ao E kaeka ni kangai, “E koreaki ae kangai, ‘E aki maiu te aomata n ti te am'arake, ma e maiu n taeka nako aika oti nako mai wiin te Atua.’ ”

5Ao e kairia ngkanne te riaboro nako Ierutarem, ao e kateia n te tabo ae te kabanea n rietaata i taubukin te um'antabu,

6ao e taku nako Ina, “Ngkana Natin te Atua Ngkoe, ao Ko na ewe nako, b'a e koreaki ae kangai:

‘E na mwiokoia ana anera b'a a na tabeakiniko;

ao a na tabekiko ni baiia,

b'a e kawa n toki waem n te atibu.’ ”

7E taku Iesu nako ina, “E koreaki naba ae kangai, ‘Ko na tai kataa te UEA ae Atuam.’ ”

8Ao e a manga kairia te riaboro nakon te maunga ae moan te rietaata, ao e kaoti nako Ina aaba ni kabane ma tamaroaia;

9ao e taku nako Ina, “N na anganiko baikai ni kabane ngkana Ko katorobubua ni bobaraaki n taromauriai.”

10E taku ngkanne Iesu nako ina, “Naako akuu, Tatan! B'a e koreaki ae kangai, ‘Ko na taromauria te UEA ae Atuam, ao ko na toro i Rouna n ti Ngaia!’ ”

11E kitanaki ngkanne Iesu iroun te riaboro; ao noria, a roko anera ni buokia ni baike E kainanoi.

E Moana ana Reirei Iesu i Kariraia(Mareko 1.14-15; Ruka 4.14,15)

12 Mataio 14.3; Mareko 6.17; Ruka 3.19,20 Ngke E ongo Iesu b'a e a tia n tauaki Ioane b'a te bure, ao E nako Kariraia.

13Ioa 2.12E kitana Natareta, ao E nako ni maeka i Kaberenaum are mena i rarikin te nama, n taabo ake abaia baronga ake Teburun ma Nabetari,

14b'a e aonga ni kakoauaki are atongaki iroun Itaia are te burabeti, ngke e kangai:

15“Aaba ake aia b'ai baronga ake Teburun ma Nabetari,

ake a mena n te kawai nakon te nama, ake n tanimaeaon te Ioretan,

are Kariraia, bon abaia Tientaire!

16A nora te oota ae te oota ae korakora

aomata ake a tekateka n te roo;

ao e kaoti te oota nakoia ake a tekateka

i aban te mate ao i nuuna.”

17 Mataio 3.2 Ao man te tai arei ao E moa n reirei Iesu, ao E taku, “Kam na rairi nanomi, b'a e a kan roko Uean te Atua!”

A Weteaki Taan Akawa aika Aman(Mareko 1.16-20; Ruka 5.1-11)

18Ngke E nakonako Iesu i rarikin namani Kariraia, ao E noriia taari mm'aane aika uoman, are Timon are arana teuana Betero, ao Anterea are tarina, ngke a kab'aka te karaun n te nama; b'a taan akawa ngaiia.

19Ao E taku nako ia, “Mai ri mwiu ao N na karaoingkami b'a taan akawaia aomata.”

20A kitan naba aia karaun ao a iria.

21Ngke, E wakina nako riki kawaina maikekei, ao E a manga noriia taari-mm'aane aika uoman are Iakobo ma Ioane ake natin Tebetaio. A mena n aia booti ma tamaia are Tebetaio, b'a a bonobonoti raeuakin aia karaun; ao E weteia.

22Ao a kitana naba te booti ma tamaia, ao a iria.

E reirei Iesu, E kab'arab'ara, ao E kakamaiu(Ruka 6.17-19)

23 Mataio 9.35; Mareko 1.39 E kabuta Kariraia n reirei ni m'aneabaia I-Iutaia, ao n tataekina euangkerion Uean te Atua; ao E katoki aoraki ni kabane, ao mamara ni kabane i buakoia aomata.

24E taona Turia ni kabuta rongorongon Iesu, ao a bane n uotaki nako Ina aomata aika aoraki n aekan aoraki nako ma maraki, ao akana taniaki irouia taimonio, ma akana iai aorakin aia iango, ma akana aki kona te nakonako; ao E kamaiuia.

25Ao a iria aomata aika rangi ni m'aiti mai Kariraia ao Tekabori, mai Ierutarem, Iutaia, ao mai mainikun Ioretan.