1E tuangai te UEA b'a N na tei i rarikin mataroan te Tembora
2ao n tuangiia aomata ake a na nako n rin te b'ai are E taekinna te UEA
3are Moan te M'aaka, ae Atuaia Iteraera:
Kakauongo raoi, ngkami aika kaain Iuta! Bita maiumi ao maiuakina te raoiroi, ao i mwiina, N na kariaingkami b'a kam na maeka n oin abami.
4Kam na aki kaburababaingkami i bon i roumi! E mena au Tembora ikai i Ierutarem, ma tiaki nanona b'a N nang kamanoingkami.
5N na kaawakiningkami ti ngkana kam bita maiumi. Kam na aki aonikaiia raomi nako.
6Katoka karawaawataia iruwa, ma ataei aika a akea aia karo, ao aine aika akea buuia. Kam na aki tiringiia aika akea aia bure. Ao katoka taromauriaia anti tabem'aang.
7Ao i mwiina, N na kakukureingkami ni maiu n te aba aei ae I anganiia ami bakatibu.
8Ma kam na ti taraa te b'ai ae e riki! Kam onimakin taiani kewe aika akea manenaia.
9Kam iraa ao kam tiriaomata, kam kewe n te kabowi ao kam aki kakaonimaki nakon ami berita ni mare. Kam taromauri bouannanti, ao kam anga te b'ai ni kaboiarara nakon B'aara, e ngae ngkana akea te b'ai teuana ae a konaa ni karaoia anti aikai nako imi.
10Ao i mwiina, kam rin i nanon au Tembora ao kam taromauriai! Tao kam taku b'a N na kawakiningkami n te aro b'a kam na teimatoa ni kaakaraoa te bure?
11Bon taan iraa ngkami, ao kam karika au Tembora b'a te tabo ni karaba. Ma I a tia n noori b'aai ni kabane aika kam a tia ni karaoi.
12Naako nako Tiro, ike e tei iai ngkoa iai au autinrianna ae e tabu. Kam na tarataraa te b'ai are I karaoia ngkoa ikekei. A tia ni bure au aomata aika Iteraera, ngaia are I kamaunaa iai Tiro!
13I kataia n taetae nako imi ngke kam tabe ni karaoa te bure, ma kam aki kan ongo.
14Kam na tai taku b'a e na kaawakiningkami te Tembora aei. I tuangiia ami bakatibu n taai aika a b'aka nako b'a a na kateia ma n taromauriai ikai, ma ngkai I a tia ni baaireia b'a N na kamaenikunna ni kab'aka, n aron are I karaoia nakon Tiro.
15Ao i bukimi ngkami aika kaain Iuta, N nang kanakoingkami man abau, N aron kanakoaia kaain Eberaim ao kaain baronga ake i meaang.
Te Katuua I bukin Taromauriaia Anti Tabem'aang16Ieremia, ko na aki tataro i bukiia aomata aikai! N na aki kan ongo Ngai ae te UEA.
17Kam noora te b'ai ae a karaoia kaain Iuta i nanon aia kaawa ao i nanon kawain nako Ierutarem?
18A rikoi aia ataei, ao a kauraa te ai tamaia, ao tinaia a kabooboa te buraawa b'a a na kariki i bukin antiia te aine are a aranna b'a ueanainen Karawa. A bon anga naba te wain nako ia anti tabem'aang, b'a I aonga ni matauninga.
19Ma a bon aki ti kamatauningaai, ma a bon kamatauningaia naba ni karaoi baika a na kamamaaeaki iai.
20Ao ngkai N nang kaiekaa Iuta Ngai ae te UEA ae Moan te M'aaka n uran uniu ni karokoa akea nikiran b'aai nako—ana akea aomata ke maan, ke taiani kainam'arake ke taian uita.
Bon Akea Manenan Te Anga Karea21E taku te UEA nako ia kaain Iuta:
Bon te UEA Ngai ae Moan te M'aaka, ae Atuan Iteraera, N na bon aki butim'aai taiani karea mairoumi. Ma ngaia are, kam na aki tabe naba ma uotakiia nako iu. Kam na bon kuukan b'a kanami.
22I aki tuangiia ami bakatibu b'a a na anga karea nako iu, ngke I kaotinako ia mai Aikubita.
23Ma I ti kaangai nako ia, “Ngkana kam ongo i Rou ma ni karaoi b'aai aika I tuangngkami, ao N na riki b'a Atuami, ao ngkami kam na riki b'a Au aomata, ao a na akea ami kangaanga.”
24Ma a aki kan ongo ami bakatibu. A bonotaninga, ao ngkana I tangiria b'a a na nakon te kawai teuana, ao ngaiia a aki toki n nakon te kawai teaina.
25Man te tai are a kiitana iai Aikubita ami bakatibu, I kanako ia au taani m'akuri aika burabeti b'a a na taetae i buku.
26Ma kam aki kubarai ao kam karikirakea riki taningabonomi ao karaoan te bure nakon are a karaoia ami bakatibu!
Te M'arua N TiritiriE taku te UEA:27Ieremia, e ngae ngkana tao tera ae ko karaoia, ma a na bon aki ongo naba aomata.
28Ma ngaia ae ko na kaangai nako ia:
Kaain Iuta, bon te UEA Ngai ae Atuami, ma kam rawa n ongo taeka i Rou, ma kam aki bitaki ngke I katuaaingkami. Ao ngkai, kam bon aki kani kaota naba te aro ni kakaonimaki nako iu.
29Kam na kamaraa atuumi
ao tewenakoi irami.
Kam na anenea te anene ni mate
i aon te tabuki ae akea kain aona.
Kam a tia ni kaunai ngkami aika aomata,
ao kam a tia ni kiitanai.
30Kam a tia n aki ongotaeka i Rou ngke kam karin taiani bouannanti aika a rangi n ribaaki i nanon au Tembora, ao ngkai e a rangi n ribaaki te Tembora i Rou.
31Kam a tia ni katea te baonikarea i Tobeta n te M'arua are Innom ike kam tiringiia ami ataei iai ma ni kabuokiia b'a taiani karea nako ia anti tabem'aang. I bon tuai man tuangkami b'a kam na karaoa te aekaki aei.
32Ma ngaia are, kam na tarataraa raoi! Ane e na aki atongaki te tabo anne b'a Tobeta ke te M'arua are Innom n te tai teuana. E na aranaki b'a te M'arua n Tiritiri, i bukina b'a ane kam na taun ami mate ikekei ni karokoa e a aki reke nen moana,
33ao ane a na raea rab'ataia aomata i aon te tano. Ane a na roko mannikiba ma maan ni kang rab'ataia, ao akea temanna ae e na konaa ni kakamaakuia ni kanako ia.
34Ngkana e a bane te b'ai are N na karaoia nakon abami, ao ane e na akea te b'anaa ae e konaa n ongo te aba ni b'ain nako Ierutarem ake a uruaki ma kaawan Iuta, akea te b'anaa ni kukurei, akea b'anaan te bootaki ni kukurei ke karongoaan te bootaki ni mare.
Who We AreWhat We EelieveWhat We Do
2025 by iamachristian.org,Inc All rights reserved.
