Iobi 31 - Kiribati New Version Bible

Aikai ana kabanea n taeka Iobi.

1I a tia ni karaoa te berita ae matoa

b'a N na aki manga taratara te ataei n aine ma te kaitataan.

2Tera ae na karaoia te Atua ae m'aaka nako Iu?

E na kanga ni kabooa mwiin ana m'akuri te aomata?

3E karokoa te kangaanga ma te urub'ai te Atua ae m'aaka

i aoia aomata aika buakaka.

4E atai b'aai ni kabane aika I karaoi te Atua,

ao E atai naba rangatan waeu.

5I boni koaua b'a I bon tuai karaoa te m'akuri ae buakaka,

ao I tuai naba ma ni manibuakaia tabem'aang.

6Ke E katineai te Atua n te b'ai n tau rawawata ae koaua,

ao E na noorai iai te Atua b'a bon te aomata ngai ae akea au bure.

7Ngkana tao arona b'a e a tia ni bure kawaiu,

ke tao n anaaki nanou n te buakaka.

Ngkana tao e a tia ni kabarekaaki baiu n te bure,

8ao ke e kamaunaaki arokau,

ke ni kanaki uaan arokau i rouia tabem'aang.

9Ngkana tao I a tia ni b'aka i roun buun te aomata ae I tabon auti ma ngaia,

ke tao I a tia n torotoro ni karabaai i tinanikun ana mataroa neierei,

10ao ke e kuukana kanan te m'aane temanna buu,

ke ni wene n ana kainiwene te m'aane temanna.

11E na riai ni katuaaeaki te m'akuri ae moan te buakaka n aron anne n te mate.

12E na bon riki b'a te ai ae kamamate nako Iu

are e na kabuokai ma au b'ai ni kabane.

13Ngkana e ngure nako Iu au tia m'akuri,

ao N na bon ongora i rouna ma ni karaoa ae raoiroi nako ina.

14Ao ngkana I aki karaoa aei, N na kanga ni itaramata ma te Atua?

Ao tera ae N na taekinna ngkana E roko ni motika taekau?

15Te Atua are E karikai

boni Ngaia naba are karika au tia m'akuri.

16I bon tuai man rawa ni buoka te aomata ae kananoanga,

ao I aki naba kariaia aine aika akea buuia b'a a na kainano,

17ke ni kariaia ataei aika akea aia karo b'a a na baki ngkana I am'arake.

18I tararuaia ma ngke ataei ngaiia kaanga ni kabane maiu,

ao I kaawakiniia ma ngke a moan otinako man biroton tinaia.

19Ngkana I noora te aomata ae kainano,

ae e rangi ni kainano n te aro are aki kona naba ni kabooa ana kunnikai,

20ao N na bon anganna kunnikaina ae karaoaki man buraeia au nanai n tiibu,

ao e na neboai ma nanona ni kabane.

21I tuai man katea te ataei

ae akea ana karo n te bowi ni kaburebure,

e ngae ngke I ataia b'a N na tokanikai i aona n te kabowi,

22ao ke a m'aotoua angani baiu

ma n taenako baiu man rab'atau.

23I bon aki kona ni karaoa aei,

i bukina b'a I maaka Ana katuua te Atua.

24I bon tuai man onimakina te kaub'ai;

25I bon tuai naba mani kainikatonga i bukin te kaub'ai ae bati i nanoni maiu.

26I tuai man taromauriia taai i bukin ootana,

ke n taromauriia nam'akaina i bukin tamaroana ni kabane.

27I tuai naba man burebureaki ni bobaraaki ni karineia

ni kaboria ma baiu n anga karineaia.

28Bon te bure ae ab'ab'aki karaoan aei nakon te Atua,

ao e na katuaaeaki te aba iai i rouia taani moti.

29I bon tuai man kukurei ngkana a karawawataaki au kairiribai,

ke ni kukurei ngkana a kaaitibo ma te kangaanga.

30I tuai naba ma ni bure n tataro b'a a na mate.

31A bane n ataia aomata ake a m'akuri i rou

b'a I teimatoa ni bubutim'aia iruwa.

32I kakamotirawaia taani m'ananga n au auti,

ao I aki kariaia b'a a na matu n aki akaaka.

33A kaakarabai aia bure aomata tabem'aang,

ma I bon tuai man karabai au bure ngai.

34I aki tabe ni baika a na taekin aomata;

I tuai naba mani kaina wiiu n taetaekinan te koaua,

ao I aki naba titiku n te auti i bukin maakakin aia b'ab'ainingare.

35Bon akea temanna ae kan ongora ni baika I taekin.

Ma I bon berita b'a a koaua au taeka ni kabane.

Ke E kaekaai te Atua,

36ao N na bon katokai i aon angau,

ma ni manga tabeki ni katokai i aon atuu b'a au bau ni uea.

37Ao i mwiina, N na tuanga te Atua b'aai ni kabane ake I a tia ni karaoi,

ao N na roko i matana ma te aki maaku kaanga te nati ni uea.

38Ngkana tao I a tia ni iraea te aba are I unika aona,

ma n anaia mai roun te tia b'aib'ai ni koaua.

39Ngkana tao I a tia ni kana te am'arake ae reke maikekei,

ma ni karika te tia ununiki are e unikia b'a e na mate ni baki i bukin anne,

40ao ke a bwebwerake iai taian uteute aika kateketeke,

n onei mwiin taian uita ma b'aare.

E aki manga taetae Iobi.