Te Tua-Kaua 25 - Kiribati New Version Bible

Te Katuua are te Oro I bukin Te BureAo e taku Moote nakoia Iteraera:

1-2Ngkana ko i bukibuki ma te aomata temanna n te bowi, ao ko kuneaki irouia taani moti b'a ko reke n te bure, ao ngkana tuuam te kataereaki n te kainikataere, ao e na tuangko temanna te tia moti b'a ko na wene, ao ko na anganaki kaim n aron are e bon riai n reke iroum.

3Tokin m'aitin kaim mai eta ae ko riai n anganaki bon abwi, i bukina b'a ngkana e raka i aon anne, ao ane a nang kakeaki manenami irouia Iteraera tabem'aang.

Tai Kaina Wiin Te KaoAo e taku Moote nakoia Iteraera:

4Kam na aki kaina wiin te kao ngkana e tabe n toutoua te uita. Te Nati Te Mm'aane I bukin Te Tari Te Mm'aane Ae MateAo e taku Moote nakoia Iteraera:

5-6Ngkana tao arona b'a a uaia ni maeka taari m'aane aika uoman n te aba ae ti teuana, ao e mate teuare temanna ao akea natina te m'aane are na kamaiua arana. E na aki manga mare neiere buuna ma kaain te utu teuana, ma e na manga iein ma tarin buuna, ao e na riki natiia te m'aane te karimoa b'a natin teuare mate i aan te tua.

7Ma ngkana tao arona b'a e a manga rawa tarin teuare mate ni iein ma te aine anne, ao e na nako neienne nako mataroan te kaawa are aia tabo ni kabowi taani kairiri ao e na kaangai, E mate buu, ao akea natina te m'aane are na manga kamaiua arana. Ao e rawa naba tarin buu ni iein ma ngai, ao e aki kona ni manga reke natiu te m'aane.

8Ao a na wetea tarin teuare mate taani kairiri nako mataroan te kaawa ma ni kataia n tuanga teuanne, b'a e na buuna buun tarina are e mate. Ma ngkana e rawa ni buunna,

9ao e na m'ananga te aine anne nakon tarin buuna i mataia taani kairiri, ao e na buuta ana kauniwae teuanne teuana, mani bawarea matana, ao e na kaangai, “Aio aron te aomata ae e rawa ni buoka karekean kanoan tarina are e a tia ni mate.”

10Ao e nang ataaki man te bong anne b'a anne te utu ake a aranaki b'a ana utu te m'aane are buutaki ana kauniwae.

Uniia Mm'aane Aika UomanAo e taku Moote nakoia Iteraera:

11Ngkana a un uoman m'aane, ao ngkana e irantaanga buun te m'aane temanna mai buakoia uaake a un ni koona maangen te m'aane are un ma buuna,

12ao kam na korea baina ni kanakoa. Kam na aki nanoangaia.

B'ainan Te Nanoanga N Te KarikirakeAo e taku Moote nakoia Iteraera:

13-14Kam na aki karaoa te m'akuri ae buakaka nakoia aomata ni kamanenai uoua te b'ai n taurawawata, b'a teuana i bukin kabooan b'aai mairouia aomata, ao teuana i bukin kabonakoan b'aai nakoia aomata.

15Ngkana kam taui raoi rawawatan b'aai, ao E na kakukureingkami te UEA ae Atuami ni kaananaui maiumi n te aba ae E anganingkami.

16Ma e na bon rangi n ribaia aomata akana karaoa ae aki riai ma n aki nanoanga nakoia aomata te UEA.

Tiringakiia Kaain AmarekaAo e taku Moote:

17Kaain Iteraera, kam uring aroia kaain Amareka nakoimi i mwiin otinakomi mai Aikubita?

18Ngke kam a kua, ao a ririmwingkami, ao a buakania raomi ake mai buki ake a aki kona ni kawaekoaia. A boni kaotia kaain Amareka b'a a aki karinea te Atua.

19E na buokingkami te UEA ae Atuami n taua te aba, ao E na anganingkami te rau. Ma ngkana e roko te bong arei, ao kam na riai n tiringiia kaain Amareka n akea nikiraia naba temanna, b'a a aonga n akea manga uringakiia ae a maiu, ngke a mena ngkoa ikanne.