1Kam na katituaraoa te UEA, b'a E raoiroi;
Akea tokin ana ataataiaomata.
2Ke a atonga aei akana kamaiuaki iroun te UEA;
Akana E kamaiuia mai nanoni baiia aiaia,
3Ake E kaokiia man taabo nako:
mai mainiku ao mai maeao, mai meaang ao mai maiaki.
4A tiotio nako n te rereua n te kawai ae kamaroaa;
E aki reke irouia te kaawa are a na maeka iai.
5A mate ni baki, ao a taka,
ao a b'ara nanoia.
6A wetea te UEA, ngke a kai nanoia,
ao E kamaiuia man rawawataia.
7E kairiia nako i nanon te kawai
ae eti nakon te kaawa are a na maeka iai.
8A riai ni katituaraoa te UEA i bukin ana ataataiaomata,
Ao i bukini baike a kamimii ake E a tia ni karaoi i bukiia.
9E katoki takaia akana kani moi,
ao E kanuaia akana baki ni baika raraoi ake a kang.
10Iai tem'angina ake a kabureaki;
a rawaawata b'a a kabaeaki n taurekereke aika biiti,
Ao a katukaki n te rotongitong:
11B'a kioina ngke a rawa nakon ana
taeka te Atua are Moan te M'aaka,
Ao a riba ana taeka n reirei.
12A mamara nanoia i bukina
ngke a m'akuri n ai aroia kaaunga,
Ao akea ae buokiia.
13A wetea te UEA ngke a kai nanoia,
ao E kamaiuia man rawawataia.
14E kaotinakoia man te rotongitong,
ao E motimotiki kabaeaia.
15A riai ni kamoamoa te UEA i bukin ana ataataiaomata,
Ao i bukini baike a kamimii ake E karaoi i bukiia.
16E uru mataroa aika buraonti,
ao E korouai biiti ake kaini kamatoaani mataroa.
17A karawaawataaki tem'angina i bukin nanobabaia:
B'a a bure ao a bubuaka aroia.
18A aikoa kan tara matan te am'arake,
ao a kaani mateia.
19Ao a wetea te UEA ngke a kai nanoia,
ao E kamaiuia man rawawataia.
20E katoki aorakiia n ana taeka,
ao E tuki mateia.
21A riai ni karaoiroa te UEA i bukin ana ataataiaomata,
Ao i bukini m'akuri ake a kamimii ake E karaoi i bukiia.
22A riai n angakarea ni katituaraoi,
ao n anene ni kakatonga n tataekin ana m'akuri.
23A boborau tem'angina i aoni kaibuke,
ni m'akuri iai i bukini maiuia.
24A noori ana m'akuri te UEA,
ake baike a kamimii ake i marawa.
25E kare te ang ae baibati n ana taeka,
ao a tei naoni marawa.
26A tabekaki rake i aon taubukin naao,
ao a manga uotaki rikaaki nakon are i nano.
A nako nanoia n te kabuanib'ai are a taonaki iai;
27A rangaranga ao a bebebebe n ai aron te aomata ae manging,
Ao ai akea te bae a kona ni karaoia.
28Ao a wetea te UEA ngke a kai nanoia,
ao E kamaiuia man rawawataia.
29E katoka te ang ae baibati, ao e ariki,
ao e toki marebuni marawa.
30A kukurei ngke e a raoi;
ao E kairiia nakon te ne n rooro are a tangiria.
31A riai ni kamoamoa te UEA i bukin ana ataataiaomata,
Ao i bukini baike a kamimii ake E a tia ni karaoi i bukiia.
32A riai n neboia n tain te bootaki n taromauri,
Ao ni kamoamoaa i mataia mataniwiia aia utu nako.
33E oniki karaanga b'a rereua,
ao koburake n ran b'a taabo aika m'auteretere;
34Ao te aba ae uaa b'a te raereke ae tarika,
i bukin aia bure akana maeka iai.
35E oniki rereua b'a neei,
ao te aba ae m'auteretere b'a koburake n ran.
36Ao E kamaekaia akana mate ni baki iai,
Ao a katea te kaawa iai b'a neia ni maeka.
37A uniki aroka ma kureebe ni neia,
ao a karekei uaa aika bati mai iai.
38E kakab'aiaia ana Aomata ni kabatiai natiia;
Ao E kawakinia aia kao b'a a na aki kerikaki m'aitiia.
39Ngke a riki b'a taenikai, ngke a kab'ainrangaki
n aaro aika a riki n rawaawata ma ni maraki iai,
40Ao E kakeai bonganaia ake a taenikai irouia,
Ao E katiotioia nako n rereua, ike akea te kawai iai.
41Ma E kamaiuia akana kananoanga man rawawataia,
Ao E kabatiaia kaain aia utu, kanga ai aron te nanai ni man.
42A nora aio akana raoiroi ao a kukurei iai,
Ma akea aia taeka iai akana buakaka.
43Ao akana wanawana, ke a iaiangoi baikai;
Ke a kareke aia iango
n ana ataataiaomata te UEA.
Who We AreWhat We EelieveWhat We Do
2025 by iamachristian.org,Inc All rights reserved.
