1Tabeua te tai i mwiina, ao a bootaki taian taanga ni buaka mai Moaba, Ammon, n reitaki ma kaain Meun, ao a nako ni buakana Ieotiab'ata.
2Ao a tuanga Ieotiab'ata taani uarongorongo ni kaangai, “E a buakana abara ana taanga ni buaka ae e korakora Etom are i mainikun Taari are Mate. A tia n roko i En-Keri.”
3Ao e maaku Ieotiab'ata, ao e titirakina te UEA te b'ai ae e na karaoia. Ao i mwiina, e a tuangiia kaain Iuta b'a a na aki am'am'arake ni kaota rawaawatan nanoia.
4Ao a kawaekoaia ni kiitana ikekei nako Ierutarem i bukin buubutian te UEA buokaia.
5Ao ngke e a bane kaain Iuta ma Ierutarem n roko n ana Tembora te UEA, ao e teirake Ieotiab'ata i matan te katawanang ae e boou
6ao e tataro:
Ngkoe ae te UEA ae te Atua are a taataromauriia ara bakatibu, ao ko tautaekaniia botannaomata ni kabaneia aika i aonnaba mai karawa. Ko bon rangi ni m'aaka n te aro are bon akea ae e konaa ni kataenikaiko.
7Atuara, ko kanakoia botannaomata ake a maeka n te aba aei i m'aain riniia am aomata aika Iteraera ikai, ao ko anganiia ana kariki raoraom are Aberaam n aki toki.
8A maeka ara bakatibu n te aba aei ao a karaoa te Tembora i bukin karineam.
9A kakoauaa b'a ngkana iai te buaka ke te aoraki ke te rongo ae e orea te aba aei, ao a na konaa n tataro am aomata nakoim n te Tembora, ao ko na ongo aia tataro ma ni kamaiuia.
10Ko bon nooria b'a ae a buakaniira aia taanga ni buaka Ammon, Moaba, ao Etom! Bon botannaomata aikai ake ko aki kariaia ngkoa b'a a na buakanaki irouia ara bakatibu i aon kawaia mai Aikubita, ma ngaia are, a bon aki mauna nako botannaomata aikai.
11Ao ngkai a roko b'a a na manga kaoka te aba are ko anganiira.
12Ko aki katuaaia? Ti bon aki konaa ni kaaitaraa te taanga ni buaka aei ngkana e buakaniira. Ti aki ataia naba b'a tera ae ti nang karaoia—ti buubutiiko am buobuoki.
13Ao ngke a bon tabe n tei ikekei i nanon te Tembora, m'aane ni kabane, ma aine, ao ataein Iuta.
14Ao e karina n taetae Tamnein te UEA nakon Iaatiera, are kanoan Rewi man te kaainga are Ataba.
15Ao e taku Iaatiera:
Teuae ko karineaki, ao kaain Iuta ma Ierutarem ni kabane, e taku te UEA b'a kam na aki riai ni maaku, ke ni b'arannano n te taanga ni buaka ane e korakora anne. E na buaka te UEA man ami itera!
16Ma ngaia are, aio te b'ai ae kam na riai ni karaoia. Ane a m'aati ami kairiribai n ingabong i nanon te rereua ni katobibia te kaawa are Ieruera. Kam na m'aati ni kawariia n te kaawa are Titi ngkana a roko n te m'arua.
17Kam na aki buaka. Kam na ti tei ni nnemi ma ni mataku ngkana E kamaiungkami te UEA mairouia ami kairiribai. Kam na aki maaku. Kam na ti karaoa ae kam tuangaki. Ao ngkana kam m'aati n ingabong, ao e na raoni ngkami te UEA ikekei.
18E bobaraaki ni karinanoa Ieotiab'ata nako aontano ao a bane aomata n taromauria te UEA.
19Ao a teirake tabeman kanoan Rewi man te kaainga are Koata ao Kora ao a takaarua n neboa te UEA ae Atuan Iteraera.
20N te moan ingabong are i mwiina, ngke a katauraoi aomata nako b'a a na nakon te rereua are i rarikin Tekoa, ao e teirake Ieotiab'ata ao e taku, “Kam na ongora raoraou nako, ngkana ti kakoauaa te UEA ae te Atua ma n onimakinna ni b'aai ni kabane aika a taekin taian burabeti aikai nakoira, ao E na buokira te UEA, ao ti na bon tokanikai.”
21Ao i mwiina, e a kab'arab'ara ana babaaire ao e rineia m'aane aika a na m'aati mai moan te rain ao a na neboa te UEA n te anene i bukin m'aakana ae tabu:
“Neboa te UEA!
Akea tokin ana tangira.”
22Ao ni bon te tai naba are a moana iai aneneia, ao te UEA, e a kamangaongaoiia kaain aia kaemb'a aia kairiribai.
23Ma ngaia are, a teirake aia taanga ni buaka kaain Ammon ao Moaba ni buakaniia ake kaain Etom ma ni kamaunaiia ni kabane. Ao i mwiina, a manga rairakiia i bon irouia ma ni buaka ni karokoa a bon bane ni mate kaain te maeka arei!
24Ao ngke a roko ana taanga ni buaka Iuta n te taua are e kaaitaraa te rereua, ao a nooria b'a a bane ni wene ni mate i aon te tano tautian aia taanga ni buaka aia kairiribai.
25Ma ngaia are, a m'ananga Ieotiab'ata ma ana taanga ni buaka nakon aia kaemb'a ni uoti nako b'aai ni kabane aika a kakaawaki. Ao a kunei ana nanai ni man ae moan te korakora, taiani b'ai, kunnikai, ao b'aai riki tabeua aika a kakaawaki. A kabanea tenibong aia bong ni uoti nako, ao bon iai naba nikiraia.
26Ao n aia kaabong, ao a bane ni ikotaki aomata n te M'arua are Beraka ao a anene n nebonebo nakon te UEA. Ao bon anne bukina are e aranaki iai te tabo anne b'a M'aruan te Nebonebo.
27Ao e kairiia aomata Ieotiab'ata ni kaokiia nako Ierutarem. Ao ngke a tabe ni m'aati, ao a katang taian aabi ma ni katang taian timbara.
28A rangi ni kukurei i bukina ngke e a tia n anganiia te UEA te tokanikai i aoia aia kairiribai, ma ngaia are, ngke a roko n te kaawa are e buubura, ao a bon m'ananga naba ni kaineta naba te Tembora.
29Ngke a ongo botannaomata ake tabeua rongorongon te UEA ngke E a tia ni kaaitaraia aia kairiribai kaain Iuta, ao a rangi ni maaku
30ni manga buakana Iuta. Ao e karekea te rau te UEA nakon abanuean Ieotiab'ata.
31Ai tenibwi ma nimaua ana ririki ni maiu Ieotiab'ata ngke e a moana ueana i aon Iuta, ao e tautaeka mai Ierutarem i nanon uabwi ma nimaua te ririki. Aran tinana bon Nei Atuba are natin Tirei te aine.
32E ongotaeka Ieotiab'ata iroun te UEA, n aron e a tia ni karaoia tamana are Ata,
33ma e aki roko n te urui taian baangota ake baangotan te aba. Ma ngaia are, a bon a kakaonimaki riki aomata n taromauri antiia nakon taromaurian te Atua are a tataromauria aia bakatibu ngkoa.
34Ao b'aai ni kabane ake e karaoi Ieotiab'ata a koreaki i nanon ana rongorongo Ieu are natin Anani are e bon karinaki naba n Rongorongoia Uean Iteraera.
35E tiainaa te boraraoi Ieotiab'ata i nanon ana tai ni uea ma uean Iteraera ae e buakaka are Aatia.
36Ao a boraraoi b'a a na karaoi tabewa taiani kaibuke ni m'am'ananga i taari i Etion Keeb'a.
37Ma e kauringa Ieotiab'ata te burabeti are Erietera ni kaangai, “E na urui taiani kaibuke aikai te UEA i bukina b'a ko a tia ni boutokaa Aatia.” A na koro taiani kaibuke ao a na aki manga konaa n ieie.
Who We AreWhat We EelieveWhat We Do
2025 by iamachristian.org,Inc All rights reserved.
