Otea 11 - Kiribati New Version Bible

Ana Tangira Te UEA

I bukiia Ana Aomata

1Ngke e uarereke ngkoa Iteraera,

I tangiria, ao I wetea

natiu te m'aane ni kaotinakoa mai Aikubita.

2Ma e taku te taeka,

“M'aitin weteakiia,

bon m'aitin aia kamangao.”

A aki konaa ni katoka aia m'akuri n anga

te b'ainikaboiarara ao taian karea

nakon bouanantin B'aara.

3I taua bain Iteraera

ao I reireinna n nakonako.

Ma a bon aki kan taekinna

b'a boni Ngai

are I kamaiuia.

4I kairiia ma te akoi

ao te tangira,

ao I aki kairiia ma te roobu.

I tauia i rarikiu;

I b'aoua rikaaki ni kam'arakeia.

5Ma a onimakina Aikubita

ao a aki kan okirai;

ao ngkai a na tautaekanaki iroun Aturia.

6E na roko te buaka n aia kaawa nako,

ao a na b'aka aia babaaire.

7A tia n iangoia Au aomata

b'a a na katinanikuai i bukin te anti

ae a taku b'a e korakora riki,

ma e bon aki konaa ni buokiia.

8Iteraera, I aki konaa ni kanakoko.

I aki konaa ni kaaki taekam.

N na kangaa ni konaa n uruaniko

n aron are I karaoia nakon te kaawa are Atema

ao Teboiim?

I aki kona ni karaoia

E nang korakora nanou

i bukimi.

9Iteraera, I aki konaa ni kabua nanou ni marakin nanou

ma ni manga uruaniko riki.

Bon te UEA Ngai ae I tabu

tiaki Ngai te aomata,

I aki konaa ni katutuka marakin nanou.

10N na bekorara kaanga te raian, Ngai ae te UEA,

a na oki natiu,

ma te ruru mai maeao.

11A na oki rikaaki,

a na kiba m'aaka kaanga taiani mannikiba mai Aikubita

ke kaanga taian taobe mai Aturia.

Ao i mwiina, N na kaokiia

rikaaki nakon mwengaia.

Bon aei au taeka Ngai ae te UEA!

Kabotauaia Iteraera ma Iuta

12E b'anga ni kewe Iteraera nako iu,

Ngai ae Atuaia ae kakaonimaki ma n tabu;

a otab'aniniai n aia kewe,

ao e taromauri anti

tabem'aang Iuta.