Itaia 33 - Kiribati New Version Bible

Te Tataro i bukin Ana Buobuoki te UEA

1Ko konaiia au aomata.

Ko a reke n te kangaanga!

Ko tuai man ururuakaki,

ma ko nang uruakaki;

ko tuai man kam'aneaki;

ma ko nang kam'aneaki.

Ngkana e a bane

am uruuru ma am kam'aam'ane,

ao ko nang manga uruakaki

ma ni kam'aneaki n aron anne.

2Taiaoka, te UEA, nanoangaira!

Ti onimakiniko.

Kakorakoraira ni katoa ingaabong,

ao kawariira ni kamaiura

ngkana ti a reke n te kangaanga.

3A uamaaenako botannaomata ngkana ko bekorara

ao ko kaota kakannatom.

4Ti buakaniia ara kairiribai

kaanga taian taanga n rookati;

ti anai b'aai ni kabane

ake a b'ain.

5Boni Ngkoe te UEA, i aoia atua ni kabane,

ao ko maeka n taian karawa.

Ao ko a tia ni karokoa te eti

ao te eti nako Ierutarem;

6bon te aana

ae ti tei i aona n te bong aei.

Ko aki toki ni kamaiura ao n anganiira

te wanawana ni koaua ao te rabakau

Akea riki ae e kakaawaki iroura

nakon te ongotaeka iroum.

Ane E Na Karaoa Te B'ai Teuana Te UEA

7Kakauongo! Taani buaka aika kam ninikoria

aika kam biribiri i nanon kawain nuukan te kaawa,

aika kam takaarua i bukin buokami.

E kaantaninga te rau ara taani uarongorongo,

ma a okiri aia auti ma te tang.

8Akea riki ae e a manga m'am'ananga;

akea kaain taiani kawai.

A uruaki taian boraraoi i bukin te rau

ao akea aaro ni karinerine aika kaotaki

nakoia aika kawakin berita.

9A m'au ma n akea arokan aon taian tawaana;

E mauna raoiroin te Maunga are Reb'anon

n te maamaa.

E a riki b'a te rereua te M'arua are Tiaron;

a mrara baan arokan buakonikain

Batian ao Karemera.

10Ma e taku te UEA,

“N nang karaoa te b'ai teuana ngkai

ao E na rangi ni korakora neboakiu.

11Taian maange m'akuri

ake a na karenakoaki i aon te ai

ni bon oin angin ukeukem.

12Ko na kauraaki ni karokoa ko mannang

kaanga kaai aika a kateketeke i nanon te ai.

13A bane n noori b'aai ni kabane aika ko karaoi

aomata aika a kaan ma aika a raroa.

Noora m'aakau ae e korakora!”

Te Katuua Ma Kaniwangana

14A titiraki ma te maaku

taani bure aika a buakaka

ake a maeka i aon te Maunga are Tion,

“Ti nang kangaa ni maeka

i buakon te urarake

ae akea tokina?”

15Ma e na iai kaniwangaia

aika a eti maiuia

ma n tataekina te koaua,

i bukiia aomata ake a rawa

n anaa te m'ane n te matoa

ke a rawa ni butim'aea te baabakanikawai,

ao nakoia ni kabane ake a ribaa te tiriaomata

ao taian m'akuri ni kakeru.

16A na maeka n taian nono

aika a mena i aoni b'aa aika a rietaata,

ao a na kang am'arake

ao nimaia te ran.

Bon Te UEA Ara Uea

17Kam na noora te Uea ae e Kakannato

ni bon oin matami;

kam na noora abanueana

ae e rooti taabo aika raroa ma n raababa.

18Ao i mwiina, kam na titirakiningkami ni kaangai,

“A na roko mai ia taiani mataniwi

aika a imanonoira

b'a ti na anga te taekiti aika a buubura?”

19Kam na aki manga oki n nooriia

aomata aika a kainikatonga aika a taekin

taeka aika a kaokoro ao aia taeka ianena

aika a aki ongo te aba nanoia.

20Kam na taraa te Maunga are Tion

ike ti bukamarua iai

ara toa nako.

Kam na noora Ierutarem

ae e matoa raoi koron roobuna

aika a aki konaa ni kounako

aika a kabaeaki n taian roobu

aika a aki konaa ni moti.

21E na mena i rarikira

ara UEA ae e kamimii!

A na iai taian karaanga aika a iabuti

ao taian karaanga aika a uarereke

aika a aki konaa n roko iai aia kaibuke ara kairiribai. Bon Ara Tia Moti Te UEA

22Bon ara tia Moti ara UEA

ao ara tia tautaeka;

bon ara king ara UEA

ara E na bon kamaiura.

23Ma bon te kaibuke am botannaomata

ae a matanatana roobuna nako

ao e a kani b'aka aneangina manni nena

ao e tikibuaka kanoan iena.

N te tai teuana ngkami naba aika kam m'auku

a na reke naba ami b'ai

mai rouia ami kairiribai nako.

24Ane e na kab'arai ami bure te UEA

ao ane a na akea mai buakomi ae e na kaangai,

“Kaanga I aoraki.”