1Te UEA, I katituaraoiko ma nanou ni koaua;
I anene n neboiko i mataia atua.
2I bobaraaki ni kaitaraa am Auti are te Tembora are Tabu,
ao I neboa Aram i bukin am Tangira ae akea tokina ma am Kakaonimaki,
Ao i bukina b'a Ko a tia ni kaotia ae e moamoa riki Aram
ma am Taeka nakoni b'aai ni kabane.
3Ngke I weteiko, ao Ko ongo irou;
Ko kakorakoraai ni korakoram.
4Te UEA, a na bane uea i aonnaba n neboiko,
b'a a tia n ongo taekan am berita.
5A na anenei taekani baika Ko a tia ni karaoi,
ma taekani mimitongim ae kamimii.
6Ko boni ngae ni mena i eta ike rietaata,
ma Ko bon tabeakiniia naba akana nanorinano,
Ao a aki kona n raba mairoum akana kainikatonga.
7Ngkana a otab'aniniai taiani kaangaanga,
ao Ko boni kakaawakinai.
Ko ekianako nako taan ribaai ngkana a un,
ao Ko kamaiuai ni m'aakam.
8Ko na kakoroa bukin am kaantaninga i buku;
te UEA, akea tokin am tangira.
Ko na katia te m'akuri are Ko a tia ni moana karaoana.
Who We AreWhat We EelieveWhat We Do
2025 by iamachristian.org,Inc All rights reserved.
