1.Uea 13 - Kiribati New Version Bible

Kabuakakakin Te Baonikarea are i Betaera iroun Te Burabeti.

1N te bongi teuana, ao e teitei Ieroboam i rarikin te baonikarea are i Betaera, b'a e nang tauraoi n angakarea. Ao e karina n roko Ana burabeti te Atua mai Iuta ao e takaarua ni kaangai:

2E kanakoai te UEA ma taekan te baonikarea aei. E na bungiaki te tei ae arana Iotia man ana utu Tawita. E na kareana te ibonga are e kakaraoa ana angakarea ikai, ao a na kabuokaki riia aomata i aona.

3Ane ko na ataia b'a E na tia n taekin baikai te UEA ngkana e bwenauaki te baonikarea nakon uam'akoro, ao a b'aka mannang akana i aona nako aontano.

4Ao e kotea te burabeti Ieroboam ao e takaarua ni kaangai, Taua Ma e bae bain Ieroboam n aki konaa ni kakam'akuri.

5Ao e bwenauaki te baonikarea nakon uam'akoro, ao a b'aka taian mannang nako aontano, n aron are e a kaman kauring iai te burabeti.

6Ao e buubutii Ieroboam ni kaangai, Taiaoka tataro nakon te UEA ae Atuam ni butiia b'a E na kamaiuia baiu.

7Ao e taku Ieroboam, “Ti a nakon au auti b'a N na am'arake ma ngkoe. I tangiria ni b'aintangiraiko i bukin te b'ai ae ko a tia ni karaoia.”

8Ao e taku, “N na bon aki iriko, e ngae ngke ko na anganai iterani abanueam. N na bon aki katoonga naba te am'arake ke te mooi naba n te tabo aei.

9E taku te UEA b'a N na aki am'arake ke ni mooi naba teutana, ao N na bon aki okira mwengau n te kawai are I nako mai iai.”

10Ao i mwiina, ao e a okira mwengana n te kawai teaina.

Te Buraabeti ae e a Kara mai Betaera

11Ao n te tai anne, e maeka te burabeti ae e a kara i Betaera ao e kaongoaki iroun natina te m'aane temanna ana taeka ao te b'ai ae e a tia ni karaoia te burabeti mai Iuta.

12Ao e taku te burabeti are e a kara, “Tuangai te kawai are e nako iai.” Ao e kotea te kawai are e nako iai natina te m'aane.

13Ao e taku, “Katokaa te b'ai n toka i aon au Aati.” Ao ngke a tia, ao e tokara te aati

14ao e m'ananga nako ni kakaaea te burabeti mai Iuta.

Ao te burabeti are e a kara, e a nooria n tekateka i aan te aroka ae te oke ao e a titirakinna ni kaangai, “Burabetin Iuta ngkoe?” “Eng, boni ngai.”

15Ao e taku te burabeti are e a kara, “Ko na irai nakon au auti, b'a N na am'arake ma ngkoe.”

16Ao e taku te burabeti arei, I aki kona ni iriko n oki, ao I aki kona naba n am'arake ke ni mooi ma ngkoe.

17E kauringai te UEA b'a n aki manga okira mwengau n te kawai are I toua n nako mai.

18Ao e taku te burabeti are e a kara, “Bon te Burabeti naba ngai. E tuangai ana anera te UEA b'a n na kairiko nakon au auti ma n anganiko te am'arake ma te mooi.”

Ao e aki ataia te burabeti mai Iuta are e kewe te burabeti are e a kara,

19ma ngaia are, e a iria nakon ana auti ao e a am'arake ma ni mooi.

20Ao i nanon tain te am'arake, ao E a anga te rongorongo te UEA

21nakon te burabeti are e a kara i bukin te burabeti are mai Iuta:

Ko na ongora n Ana rongorongo te UEA. Ko a tia n aki ongotaeka nakon te UEA ae Atuam.

22E a tia n tuangko b'a ko na aki mooi ke n am'arake ikai, ma ko a irai nakon mwengau ma n am'arake ma ngai. Ma ngaia are, ngkana ko mate, ao e na aki taunaki rab'atam n aia ruanimate am utu.

23Ao i mwiin te am'arake, ao e a katauraoa te aati te burabeti are e a kara,

24ao e a m'ananga nako te burabeti are mai Iuta. Ao ngke e tabe ni m'ananga ao e a kaitibo ma te raian ao e a tiringaki iroun te raian, ao a tei i rarikin rab'atana te raian ma te aati ngke e a mate.

25Ao ngke a rikekei aomata ao a noora rab'atana ma te raian i rarikina. Ao a biri nako Betaera n tuangiia aomata nako te b'ai are a tia n nooria.

26Ao ngke e ongo te rongorongo te burabeti ae e a kara, ao e a taku, “E na bae n rab'atan te burabeti are mai Iuta. E a bon tia n tuangnga te UEA te b'ai ae e na aki karaoia, ma e aki ongotaeka. Ma ngaia are, E a kanakoa te raian b'a e na tiringnga.”

27Ao e tuangiia natina m'aane te burabeti are e a kara b'a ana katokaa te b'ai n tekateka i aon te aati, ao ngke e a tauraoi,

28ao e a m'ananga. Ao e a noora rab'atana ni mate i nanon te kawai ma te aati ao te raian aika a teitei ikekei. E aki kana rab'atan te burabeti arei te raian ke n tiringa te aati.

29Ao e anaa rab'atan te burabeti are mai Iuta te burabeti are e a kara, ao e katokaa i aon are bon oin ana aati, ao e a uotia rikaaki nako Betaera b'a e aonga ni kona n taunna man tanginiweneia te burabeti mai Iuta.

30E tauna rab'atan te burabeti arei ni bon oin aia ruanimate, ana utu ao e tang i bukin te burabeti are mai Iuta.

31Ao e taku nakoia ake bon natina m'aane, Ngkana I mate, ao kam na tauna rab'atau i rarikin te burabeti aei.

32I boni kakoaua b'a a na bane ni koro bukin b'aai ake e a tia n taekin i bukin te baonikarea are i Betaera ao te baangota are i Tamaria.

33Ma e bon teimatoa naba Ieroboam ni karaoi m'akuri aika a buakaka. E rineia m'aane tabem'aang b'a a na riki b'a ibonga i bukin baangota ake i abaia, e ngae ngke bon tiaki kanoan Rewi. E a karaoia b'a e na konaa n riki n ibonga te aomata ae e tangiria ni kan riki b'a te ibonga.

34Ao bon aei te bure ae e rangi n rawawata are e a karika b'akan abanueana.