Tani Motiki-taeka 1 - Kiribati New Version Bible

Buakanakiia Kaain Kanaan Irouia Baronga Ake Iuta, Ao Beniamin

1Ao i mwiin maten Iotua, ao a bubuti Iteraera nakon te Atua ni kaangai, “Antai mai buakoia ara baronga ae na buakaniia moa kaain Kanaan?”

2Ao E taku te UEA, “Iuta, N na buokiia n anaa te aba.”

3Ao a nako kaain te baronga are Iuta nakoia aia koraki ake kaain te baronga are Timeon ao a taku, “A maeka kaain Kanaan n te aba are anganiira te UEA. Kam na buokiira ni buakaniia, b'a ti na manga buokingkami.”

Ao a m'ananga tautian te baronga are Timeon ni buokiia kaain te baronga are Iuta.

4-5Ao a uaia ni buakaniia tautian Kanaan, ao kaain Beriti i Beteka aika 10,000 m'aitiia. Ao E buokiia kaain Iuta te UEA ni kataenikaiia ao a kunea te tabo ike e mena iai uean Beteka tautian Iuta, ao a buakaniia ikekei.

6Ao e kataia ni birinako te uea are Beteka ma e tauaki irouia tautian Iuta. A korea waebuan baina ma waena ni kanakoi

7ao e taku, “I a tia ni koroi waebuan baiia ma waeiia uea ake itingaun ma ni karaoia b'a a na kawakawa i aan au taibora i bukin kakaean kanaia. Ao ngkai E a kabooa mwiin aei te UEA nako iu.”

Ao a kaira uean Beteka tautian Iuta nako Ierutarem, ike e a mate iai.

8A buakana Ierutarem ma n taua, a tiringiia aomata ni kabane, ao a kabuokia ni kamaunaa.

9A buakaniia kaain Kanaan ake a maeka n aaba ake a tabukibuki tautian Iuta, ma ake a maeka n Rereuan Maiaki, ao n aaba ake i aani maunga ake i maeao.

10Ao i mwiin anne, a manga buakaniia kaain Kanaan ake a maeka i Eberon, ma ni kataenikaiia kaainga ake tenua ake Tetai, Aiman, ao Taremai. Ao e aranaki Eberon n te tai anne b'a Kiriata areba.

11Ao a manga m'ananga tautian Iuta mai Eberon ni buakana Tebira are aranaki n te tai anne b'a Kiriata tebera.

12Ao e taku Kareb'a nakoia kaain ana taanga ni buaka, “E kona ni mare ma natiu te aine are Nei Aketa te mm'aane are kataenikaia Kiriata tebera.”

13Ao e kataenikaiia Kiriata tebera ai natin Kareb'a are Oteniera. Ma ngaia are, e kariaia Oteniera b'a e na iein ma Nei Aketa. Oteniera bon natin kari mwiin Kareb'a are arana Kenati.

14Ao i mwiin te baka ni mare, ao e tuanga Oteniera Nei Aketa b'a e na butiia tamana te katawanang. Ao e nako ni kawara tamana, ao ngke e ruorikaaki man ana aati, ao e taku Kareb'a, “Tera ae ko iangoia?”

15Ao e taku Nei Aketa, “I tangira am i buobuoki b'a aaba ake ko anganai a mena n Rereuan Maiaki, ma ngaia are, I a butiiko taian koburake n ran tabeua i bukin ara ran.”

Ao e anganna uoua neei aika uarereke aika araia “Te nei are ieta,” ao “Te nei are i nano.”

16Aomata ake kaain te kaainga are Ken boni ngaiia kanoan ai taman Moote. A uaia ni kiitana Ieriko ma kaain Iuta, ao a tiku ni maeka i rarikin Arata n Rereuan Maiaki n aki raroa ma kaain Amareka.

17Kaain te baronga are Iuta, a buokiia te baronga are Timeon ni buakaniia kaain Kanaan ake a maeka i Tebata. E kamaunanakoa rab'atan te kaawa ni kabane ma ni manga aranna b'a Orema.

18-19Ao te UEA E buokiia tautian Iuta n taua Kaata, Atikeron, Ekeron, ao aaba ake i rarikin kaawa aikai. Ao e reke naba irouia te aba are tabukibuki ma a aki konaia, ke ni kanakoia, ke n taua abaia aomata ake a maeka n taian m'arua kaain Iuta i bukina b'a iai aia kaanibuaka aika taiani biti.

20Ao a angan kaawan Eberon kaain Iuta nakon Kareb'a n aron are e tuangiia Moote. E kataenikaiia kaain Anakim aika tenua aikai ma n taui kaawana.

21A maeka kaain Iebuti i Ierutarem, ma a aki konaaki irouia te baronga are Beniamin ke n tauaki aia kaawa irouia. Ao bon anne bukina are a bon tiku naba ni maeka kaain Iebuti i Ierutarem i rarikiia kaain te baronga are Beniamin.

Tauakin Te Kaawa Are Betaera Irouia Baronga Ake Eberaim Ao Manate

22-23Ao a katauraoia baronga ake Eberaim ao Manate ni buakana Betaera, are aranaki n te tai arei b'a Ruti. Ao E buokiia te UEA ngke a kanakoia aia taan tutuo ni karaba ni kakaea rongorongon Betaera.

24Ao ngke a tabe n tarataraa te kaawa taan tutuo ni karaba, ao e otinako temanna te m'aane, ao a taku nakoina, “Ngkana ko kaota nakoira b'a engaa te tabo ae a kona n rin mai iai ara taanga ni buaka nakon te kaawa aei, ao ti na bon aki tiringko.”

25Ao e kaota te kawai arei nakoia, ao kain Eberaim ma Manate a bane n tiringiia kaain te kaawa arei ni kabane, ma tii ana utu teuarei ae aki tiringaki.

26Ma ngaia are, a nako n abaia kaain Eta, ike e katea iai te kaawa. E arana te kaawa arei b'a Ruti, are bon arana naba ngkai.

Aki Reken Kanaan Ni Kabane Irouia Kaain Iteraera

27-28A maeka kaain Kanaan n taiani kaawa aika Beta-tean, Taanaka, Tora, Ibeream, Mekito, ao kaawa ni kabane ake i rarikiia. A aki kan nako kaain Kanaan, ao a aki kona te baronga are Manate ni kanakoia. Ma i mwiin te tai ae maan, ngke a tabe ni korakora Iteraera, ao a karikiia kaain Kanaan b'a aia toro.

29A aki kona naba kaain te baronga are Eberaim ni kanakoia kaain Kanaan ake a maeka i Ketera, ma ngaia are, a maeka kaain Kanaan i rarikiia Iteraera, ao a katobibiaki irouia Iteraera.

30Ao a aki kona naba kaain te baronga are Teburun ni kanakoia kaain Kanaan ake a maeka i Kiteron ao Naarara. Ma a kairoroia kaain Kanaan te baronga are Teburun b'a a na riki b'a aia toro.

31-32Ao a aki kona kaain te baronga are Atera ni kanakoia kaain Kanaan ake a maeka i Ako, Titon, Aketib'a, Ereba, Abika, ao Reoba, ao a maeka kaain te baronga are Atera ni katobibia kaain Kanaan.

33Ao a aki kona kaain te baronga are Nabetari ni kanakoia kaain Kanaan ake a maeka i Beta-temeti ao Beta-anata, ma a ti kairoroia kaain Kanaan b'a a na riki b'a aia toro. Ao a maeka kaain te baronga are Nabetari ma kaain Kanaan.

34Ao a korakora kaain Amora n totokoia kaain te baronga are Taan b'a a na aki maeka n taiani m'arua. Ma ngaia are, a tiku te baronga are Taan n aaba ake a tabukibuki.

35Ao a bon tiku naba ni maeka kaain Amora i aon te Maunga are Ereti, i Aiiaron, ao i Tiaarebim. Ao rimwi riki, ngke a rikirake ni korakora baronga ake Eberaim ao Manate, ao a kairoroia kaain Amora b'a a na riki b'a aia toro.

Tian Abaia Kaain Amora Ao Etom

36Tian Amora ao Etom ni kawai, e bon moa mai Tera ri nanon Kawain Tikaobian nakon aaba ake a tabukibuki.