2.Uea 7 - Kiribati New Version Bible

1Ao e kaeka Eritai ao e taku, “Iai te rongorongo nakoim. E berita te UEA b'a ane ko na konaa ni kabooa te baeki ni buraawa ae e buubura ke uoua taiani baeki ni b'aare naba aika a buubura nakon te ingabong i aon Taamaria ikai n te boo ae moan te uarereke.”

2Ao e kaeka mataniwiia aobitia are e mena i rarikin te uea ikekei ao e taku, “I aki kakoauaa. E ngae ngkana e kanakoa naba te karau ae moan te korakora te UEA, ao e na bon aki konaa naba n reke te aekaki ni m'aiti ni uita anne mai i mwiin ngkai ni karokoa te ingabong.”

Ao e kauringa Eritai ao e taku, “Ane ko na noora koroni bukina ma ko na aki kana naba te am'arake teutana mai iai.”

Katokan Ana Buaka Turia

3Ao ni bon te tai naba arei, ao iai aman m'aane aika a reebera aika a mena i tinanikun mataroan te kaawa are Taamaria. A taetae i bon irouia ao a taku, “E aera ngkai ti a bon tekateka n tataningaa matera?

4Bon akea te am'arake ae e na reke i nanon te kaawa, ao ti na boni mate ni baki ngkana ti rin nako. Ae ti na boni mate naba ngkana ti tiku i tinaniku ikai. Ti a nako nakon aia kaemb'a aia taanga ni buaka kaain Turia, ma n anga ngaira nakoia. Ane a na tiringiira, ke a na aki.”

5Ao a teirake m'aane ake aman akekei n te tairiki anne ni m'ananga nakon aia kaemb'a kaain Turia.

6Ao ngke a tabe ni m'ananga nakon te maeka, ao te UEA e karikiia kaain Turia b'a a na ongo te karongoaa ae kaanga karongoaan te taanga ni buaka aika taan toka i aoia aoti aika a rangi ni m'aiti.

7Ao a taetae tautian Turia bon irouia ao a taku, “Ongora. E a bae n tia uean Iteraera ni kabooia tautian Eta ma Aikubita b'a a na buakaniira. Ti a bane ni biri nako mai ikai.”

8Ma ngaia are, a biri nako man aia kaemb'a n te tairiki arei, ao a kiitani aia autinrianna ma aia aoti ma aia aati.

Ao ngke a roko reebera ake aman i tabon aia kaemb'a kaain Turia ao bon akea naba te aomata temanna. A m'ananga n rin nako i nanon te autinrianna teuana, ao a am'arake ma ni mooi i nanona, ao i mwiina a uotinako taiani kunnikai, ao ai uana naba ma taiani koora ma taian tirewa. A karabai baikekei ni kabane, ao a manga rin i nanon te autinrianna are teuana; a anai b'aai ake a bon tangiri, ao a karabai naba.

9Ao a taetae bon irouia ao a taku, “E aki eti ae ti karaoia aei. Bon te bong ni kukurei te bong aei, ao ti tuai kaongoia aomata, ma ngaia ae ti na boni katuaaeaki ngkana ti aki kaongoia raora ni karokoa te moaningabong. Ti riai ni waekoa n nakon ana bareti te uea, ma ni kaongoia te rongorongo ae e kakukurei aei.”

10Ao a okira Taamaria ao a takaarua ni waerake nakoia tautia ake a teiakina te mataroa, ao a taku, “Ti a tib'a oki man aia kaemb'a tautian Turia, ao a bane n tia n nako tautia. A akea kaain taian autinrianna, ao a boni bane n rooaki taian aoti ma taian aati. Ao bon akea naba temanna ae ti ongo b'anaana ke n nooria.”

11Ao a taekina te rongorongo arei taan tei nakon ana bareti te uea.

12Ao e teirake te uea mai aon ana kainiwene, ao e taku nakoia ana aobitia, “I ataa te b'ai ae a kataia ni karaoia kaain Turia aikai. A bon ataia ae ti a rangi ni baki, ao ngaia ane a karabaia i nanon te tawaana b'a a kaantaningaia b'a ti na otinako ni kakaaei karara. B'a ngkana ti karaoa anne, ao ane a na tauira man taua naba ara kaawa.”

13Ao e kaeka ana aobitia are temanna ao e taku, “A karako m'aitiia ara aoti, ao e aera ngkai ti aki anganiia tabeman m'aane niiman aoti b'a a na nako n aia kaemb'a kaain Turia n noora te b'ai ae e riki? Ti a nako nakon aia kaemb'a kaain Turia b'a bon ti te bo naba ngkana ti tiku ikai, ke ti nako ikekei, ae ti na boni mate n aroia ake a tia ni mate.”

14Ao a kunei uoua kaanibuaka aika a katikitikaki irouia aoti, ao e tuangiia m'aane akekei te uea b'a a na kakaaea b'a tera ae e riki n ana taanga ni buaka Turia.

15Ao a m'ananga nako i aon aia aoti m'aane akekei nakon te Karaanga are Ioretan. Ao a noori taiani kunnikai ma b'aai i aoni kawaia aika a tewenakoaki irouia kaain Turia ngke a tabe ni biri nako. Ao i mwiina, a oki n tuanga te uea b'aai ake a tia n noori.

16Ao a kawaekoaia aomata nakon aia kaemb'a kaain Turia ma ni kabanei b'aai ake a tiku ni uotinako. A rangi ni bati b'aai ake a anai n te aro are e a kabooaki teaina te baeki are e buubura, ao uaai baeki ni b'aare aika a buubura naba n te bo ae e rangi ni uarereke, n aron are e a tia n berita iai te UEA.

17E kanakoa ngkoa te mataniwi irouia ana taani kairiiri te uea b'a e na teiakina mataroan te kaawa, ma e mate ngke e toubekaaki irouia aomata ngke a biri n otinako man te kaawa.

18Ma i m'aain riki anne, ngke e mena te uea n ana auti Eritai, ao e tuangnga Eritai b'a ae e na kabooaki nako te buraawa ke te b'aare n te boo ae e rangi ni uarereke.

19Ma e aki roko n te kakoauaa te b'ai arei te aobitia arei, e ngae ngke E boni konaa te UEA ni karaoa te b'ai arei. Ma ngaia are, e kauringnga Eritai b'a e na nooria ngkana e a koro bukina, ma e na aki kana am'arakena naba teutana.

20Ao anne raoi te b'ai are e riki, ma e a mate ngke e a toubekaaki irouia aomata.