Itaia 50 - Kiribati New Version Bible

M'aakan Te UEA Ni Katuua

1E taku te UEA, “Ataei,

I aki kaaka tinami

ke ni kabooa nako i bukin kab'araan taian taarau;

I kaakiia ao ni kabooa nako

i bukin ami bure.

2I roko ni weeweteingkami,

ma kam aki kan ongo.

Tao e a tia ni bua m'aakau

ni kamaiungkami ao ni katoka ami kangaanga?

A ikinako taiani marawa ao taiani karaanga n au taeka

ao a riki b'a taian rereua;

a mate taian ika ao a m'aung

i bukina ngke e a bane te ran.

3E onika karawa nakon te roroo

kaanga te kunnikai ae e mangaingai

are e kunnikaiaki n taian taunimate.”

E Na Riai Ni Maraki Ana Toro Te Atua

4E anganai te UEA ae te Atua

taeka ni koaua

i bukin kaungaan nanoia aika a mamaara.

E katoa ingaabong ni kautai

ao I tangiria n kamateb'aia ana reirei;

5E karaoai b'a N na kakauongo

ma n aki mangao ke ni biri nako.

6I kariaia b'a a na orea nuukau

ma ni katika rake buaiu.

I aki tannako mairouia

ngke a kab'ainrangai

ma ni baawarea matau.

7Ma e kaawakinai te UEA ae te Atua

ma te kamaamaaeaki,

ma ngaia are, e aki b'ara nanou,

b'a I ataia b'a

E na bon aki kab'akaai te Atua.

8E mena i rarikiu te tia kaawakinai,

bon akea ae e konaa n tei ikai

ni bukinai n te kaairua teuana.

9E na bon buokai te UEA ae te Atua

ma ni kakoaua b'a bon tiaki te tia bure ngai.

E na ongora te tia bukinai

ao e na kunnikaia ae e kanaki n te koa.

10Bon akea mairoumi ae e karinea te UEA

ke n ongotaeka nakon ana tia m'akuri.

Ko nakonako n te roo

ao tiaki te oota;

ko aki onimakina aran

te UEA ae Atuam.

11Rimoa ao nakonako n ootan

te ai are ko a tia ni katauraoia.

Ma e na bon oreiko

ma ni katuuaeko

ni bon oin baina.