Itaia 45 - Kiribati New Version Bible

E Ongeaba Tairati N Ana Tua Te Atua

1Ao e taku te UEA nakon Tairati, are e rineia:

I a tia n taua baim te atai

ni buokiko ni kataenikaia taiani botannaomata

ao ni kanakoia taiani uea man m'aakaia.

E na uki mataroan taiani kaawa nakoim;

ao akea ae e na kainaki.

2Ngkana I kairiko,

N na kabooraoi taian maunga

ao a urui taiani mataroa aika biiti

ke mataroan te kaawa aika taiani buraonti.

3N na anganiko taiani kaub'ai

aika a karabaaki n te roo

ao n taabo aika a raba.

Ao ane ko na ataia b'a boni Ngai

te UEA ae Atuaia Iteraera,

ae e a tia ni wetei ngkami n arami.

4Tairati, ko aki ataai naba!

Ma I a tia ni weteiko n aram

ao n rangi ni karineko

i bukin Iteraera,

are au tia m'akuri ae e rineaki.

5Bon ti Ngai te UEA!

Bon akea riki atua i rarikiu.

I a tia ni kakorakorako,

e ngae ngke ko aki ataai.

6Ngkai a bane aomata n nako mai mainiku nako maeao

n ataia ae bon te UEA Ngai.

Bon akea riki atua aika koaua.

7I karika te oota ao te roo,

te kukurei ao te nanokawaki.

Boni Ngai ae te UEA ae I karaoi baikai ni kabane.

8Kam na tuangiia taiani karawa

b'a a na karuoa te kaetitaeka ae eti

kaanga ai aron te maatim ni karau

Katauraoa te aonnaba

i bukin bwebweraken

m'aakau ni kakamaiu

b'a e na karekea te eti

are I kariki Ngai ae te UEA.Korakorani M'aakan Te UEAAo e taku te UEA:

9Iteraera, bon akea riaim b'a

ko na kauntaeka ma te Tia Karikib'ai.

Bon ti te m'angko te tano ngkoe

ae ko borikaki iroun te tia karao m'angko.

E aki konaa n titiraki te m'angko te tano,

“E aera ngkai ko karaoai n te aekaki aei

A anga taningau?”

10Ataei bon akea riaimi

b'a kam na kaangai nakoia ami karo,

“E aera ngkai kam karikiira

n arora aikai?”

11Bon te UEA Ngai, te Tia Karikib'ai,

Atuan Iteraera ae E tabu.

Ko na kataia n titirakinai

i bukin au botannaomata

ke i bukin te b'ai ae I a tia ni karaoia?

12I karika te aonnaba

ao I kaonna irouia aomata;

I arora nako karawa

ao I kaonna n taian itoi.

13I a tia ni karaoa te b'ai ae e eti

ngke I katokaa Tairati i aon te m'aaka,

ao N na kanakoraoi kawai ni bane

ake e na m'ananga iai.

Bon te UEA Ngai ae Moan te M'aaka!

E na manga katea au kaawa are e buubura Tairati

ao e na kainaomataia au aomata

n akea te b'ai teuana ae e kabooaki.

Bon aei au taeka Ngai ae te UEA.

Bon Ti Te UEA Ae E Konaa Ni Kakamaiu

14au Aomata, bon Ngai ae te UEA ae I berita

b'a kam na b'ain

kaub'ain Aikubita

ao b'ain Itiobia aika kakaawaki

Kam na kairoroia aomata

ake ab'ab'aki i Tabea b'a ami toro.

Ane a na bobaraaki ni kaangai,

“E memena iroumi te Atua ae koaua;

bon akea riki atua tabem'aang.”

15Kaain Iteraera,

bon te kamimii Atuami,

e ngae ngke bon ti ngaia ae E kakamaiu.

16Aomata nako akana a karaoi taiani bouannanti

a na bane ni kamangaongaoaki aia iango

ao a na kamaamaaeaki.

17Ma Ngai ae te UEA,

N na bon teimatoa ni kaawakina Iteraera

ma ni kararoa man te kamaamaaeaki.

A Bane Ni Kaoaki Aomata Nako

18Bon ti te UEA te Atua!

E karikii taiani karawa

ao e karaoa te aonnaba

ike a maeka iai aomata,

ao e aki karaoa te rereua ae akea kanoana.

Bon ti te UEA te Atua;

bon akea riki atua tem'angina.

19E aki taetae te UEA

n taabo aika a roo aika a raba

ke n tangiria kanoan Iakob'a b'a

a na kua ni kakaaea.

E na taekina te koaua te UEA

ao aei te b'ai ae e taekinna

20nako ia aomata ni kabane aika a nikira ni maiu

man taiani botannaomata ni kabane:

“Ikotaki i rarikiu!

karekea i nanomi aron aki riain

taromaurian bouannanti aika taiani kai

ke taromauri nakon taian anti aika akea te b'ai ae a konaa ni karaoia.

21“E aera ngkai kam aki ikotaki

ma ni kawarai n te kabowi?

I bon aki tuangingkami ni boong ake ngkoa

te b'ai ae e na riki?

Bon ti te Atua Ngai!

Akea riki i rarikiu.

I karokoa te kaetitaeka ae eti,

ao bon iai m'aakau ni kakamaiu.

22“I kaooa te aonnaba ae e b'anin

b'a e na rairaki nako iu ao e na maiu.

Bon ti te Atua Ngai!

Akea riki te Atua ni koaua.

23I a tia ni karaoa te berita ae e matoa,

ae akea temanna ae e konaa n urua;

A na bane ni boobaraaki aomata ni kabane

ma n taromauriai.

24A na kakoaua b'a bon ti te Atua Ngai

ae I karokoa te kaetitaeka ae eti.

Ane e un ma ngai

e na bon rangi ni kamaamaaeaki

ao e na rairaki nako iu.

25Bon te UEA Ngai, ae e na anga

te tokanikai ao te karineaki

nakoia Iteraera.”