Te Tua-Kaua 27 - Kiribati New Version Bible

Karaoan Te Baonikarea I aon Te Maunga Are Eeb'ara

1Ao e tei Moote ma taani kairiiri, ao a tuangiia Iteraera ni kaangai:

Kam na ongotaeka nakon tuua ma reirei ni kabane aika I anganingkami n te bong aei.

2-4Kam nangi rin n te aba are E anganingkami te UEA ae Atuami b'a abami. Bon te Atua raoi ni koaua ngaia are a tataromauria ami bakatibu, ao E a tia ni berita b'a e kaub'ai te aba aei n te miriki, ao ana karewe te manibeeru.

Ngkana kam a tia n ri aon te karaanga are te Ioretan, ao naako nakon te Maunga are Eeb'ara, ao katei iai atiibu aika a buubura, ao kabiri aoia n te buraatita ae e mainaina, ao koroi i aoia katotongan tuua aikai.

5Ao kam na karaoa naba te baonikarea i bukin te angakarea nakon te UEA ae Atuami ni bon te tabo naba aei. Ma kam na aki kabonganai atiibu aika a koreaki ni b'ainim'akuri.

6Kabonganai atiibu aika a aki koreaki ni b'aai ni m'akuri, ao karaoa te baonikarea iai. Ao i mwiina, kam a kona n anga taiani karea ake kakukureian te UEA iai, ao kabuoki ni kabane i aon te baonikarea anne.

7I mwiin anne, kam na anga te karea n raoi, ao kam na tib'aa te am'arake are tabu n te tabo are kam karaoa iai te bootaki i bukin karinean te UEA.

8Ao kam na aki m'aninga ni korei naba katotoon taian tua aikai i aon atiibu akana kam na katei. Ao kam na riai naba ni kakoauaa b'a a na kona ni warekaki ami koroboki.

Te Rekenikai Nakoia Akana A Aki Ongotaeka

9Ao e tei Moote ma taian ibonga ao n taetae ni kaangai, “Kaain Iteraera, tai karongoa ao ongora irou! Kam a riki b'a ana Aomata te UEA ae Atuami n te bong aei.

10Ma ngaia are kam riai n ongotaeka nakon tuua aika I anganingkami.

11Ao e anganiia tuua aikai Moote n te bong naba anne:

12-13Ngkana kam a tia n ri nanon te Karaanga are te Ioretan, ao kam na nakon te Maunga are Keritim ao te Maunga are Eeb'ara. A na nako aon te Maunga are Keritim baronga aika Timeon, Rewi, Iuta, Itaakara, Eberaim, Manate, ao te baronga are Beniamin, ike a na kakab'aiaia iai Iteraera. Ao baronga ake Reuben, Kaata, Atera, Teburun, Taan, ao Nabetari a na waerakea te Maunga are Eeb'ara ao a na taetae ni katekebuaka mai iai.

14-26A na takaarua n taekina teuana i mwiin teuana te taeka ni katekebuaka kaain te baronga are Rewi, ao nikiraia aomata a na bonnanoa naba taekinan te taeka ni katekebuaka ni kaangai, Amen. Ao aikai taeka ni katekebuaka:

Ti bubutiia te UEA b'a E na katekebuakaia aomata akana karaoa te bouananti ke n taromauri bouananti, e ngae ngkana a karaoia n te tabo ae raba. E bon rangi n ribaai taiani bouananti te UEA.

Ti butiia naba te UEA b'a E na katekebuakaia aomata akana a aki karineia tamaia ma tinaia.

Ti butiia naba te UEA b'a E na katekebuakaia aomata akana kam'aingi atiibu aika tian taian aba.

Ti butiia te UEA b'a E na katekebuakaia aomata aika keweia aomata aika matakii nakon te tabo ae tiaki te kawai.

Ti butiia te UEA b'a E na katekebuakaia aomata aika karaoa te motikitaeka ae aki eti nakoia aomata aika kananoanga, b'a tao te iruwa, ke te aine ae mate buuna, ke te ataei ae akea ana karo.

Ti butiia te UEA b'a E na katekebuaka te m'aane ae matu ma buun tamana, e karaoa ae aki riai nakon buun tamana.

Ti butiia te UEA b'a E na katekebuaka te aomata ae wenenibure ma te man.

Ti butiia te UEA b'a E na katekebuaka te aomata ae iein ma m'anena, ke ai m'anena, ke eirikina.

Ti butiia te UEA b'a E na katekebuaka te aomata ae tiriaomata, e ngae ngkana akea te tia kakoaua ae reke n te tiritiri anne.

Ti butiia te UEA b'a E na katekebuaka te aomata ae butim'aea te m'ane i bukin kabooan tiringan te aomata ae akea ana bure.

Ti butiia te UEA b'a E na katekebuaka te aomata ae e rawa n ongotaeka nakon ana Tua.

Ao a na bane n atonga ae kaangai aomata, ‘Amen!’ i mwiin taekinan teuana i mwiin teuana tuua aikai.”