1Tebwi ma teuana te ririki i mwiin anaakin te uea are Ieoiakin ma nikiraia ara koraki b'a taenikai nako B'aburon, ao E taetae te UEA nako iu ni moanibongin te nam'akaina. E taku:
2Etekiera ae natin te aomata, a tia kaain Turo ni karaoa aia bootaki ni kukurei i bukin b'akan Ierutarem ni kunaia ae e kaangai,
“E a tia ni b'aka Ierutarem!
bon te tabo ni kaboob'ai ngkoa,
ae e rangi ni korakora.
E kamaaenikunaaki ami kaawa ngkai,
ao ko na onea mwiina.”
3Aio au kauring nakoia kaain Turo i bukina ngkai a tia n anenea te anene: Bon te UEA Ngai, ao I a riki ngkai b'a ami kairiribai! N na kanakoia botannaomata b'a a na buakaniko, kaanga taian nao aika a b'aro i aon te bike.
4A na kab'akai oon ami kaawa ao taian nono. N na kamaunaa nako ia mwiin nikiran taian urub'ai ni karokoa akea nikiran te b'ai teuana iroumi b'a ai ti te b'a,
5ike a konaa n tawaa iai aia karaun i mataniwiin taari. I berita b'a ko na kimoaaki
6ao a na tiringaki aomata ake a maeka ni kaawa ake i mataniwiin taari. Ao ane kam na ataai iai b'a bon te UEA Ngai.
7Uean B'aburon are Nebukaneta bon uean aonnaba ae e korakora, N na kanakoa b'a e na buakaniko. E na m'ananga mai meaang ma ana taanga ni buaka ae e korakora, n reitaki ma ana aoti ao a na kaa ni buaka ma ana taanga ni buaka i aoia aoti.
8Te moanib'ai are e na karaoia bon buakanakin taiani kaawa ake a mena i rarikin taari ma n tiringiia aomata ake a maeka ikekei. Ao i mwiina, e na katabuka te tano n tam'arakei oon te kaawa ake a rietaata, ma ni karaoi otangana ni katobibia.
9E na tuangiia tabeua ana taanga ni buaka b'a a na kamanenai taiani boua aika a buubura n oroi ni kab'akai iai taian oo, ao tabeman a karaoi taian kaibiti aika a ab'ab'aki n oroi ni kab'akai iai taian taua n taratara.
10E na anai tabeman ana aoti aika a m'aiti ni kabubua rake iai aontano kaanga te mabubu ae e matenten. Ao e na bon ruru naba te oo ngkana a roko ana kaa ni buaka ao taan buaka i aoia aoti, ai moara riki ngkana e rin n urua ami kaawa ma te kakatonga.
11A na biri ma aia aoti ana taanga ni buaka i nanon kawain nuukan te kaawa, n tiringiia aomata i angamaingiia ma angaataia, ao a na b'aka am boua ake a rangi ni korakora i aon te tano.
12A na iraei ami b'ai aika a rangi ni kakawaaki taian taanga ni buaka; ao a na urui ami oo, ma ni kamanatuai ami auti aika a boobuaka. Ao i mwiina, a na karenakoaki atiibuna ma kaina ma nikiran b'aina nako i taari.
13Bon akea riki bukina b'a kam na anene ke ni katangitang n taian aabi,
14i bukina b'a N na onikiko nakon te b'aa ae akea b'ain aona ike a konaa n taawai i aona aia karaun taan akawa. Boni Ngai ae te UEA ae te Atua ae I karaoa te berita aei.
15Ane a na ruru ni maaku botannaomata akana i etan mataniwiin taari ma akana i aon mataniwiin taari ngkana a ongo takaaruamii ao tangimi ngkana kam a mate.
16Ane a na ruorikaaki taian uea mai aon aia kaintokanuea, ma ni buuti kunnikai ni uea ma kunnikaia taian rinen aika a tamaroa, ao a na tekateka i aon te tano ma te ruru ni maaku. A na bon tiaoki n rongorongon taenikaimii ao a na ruru ni maaku.
17ao a na anenea te anene ni mate aei:
“E a uruaki te kaawa
ae e korakora are i rarikin taari!
A tautaekana ngkoa mataniwiin taari kaaina
ao a maakaki irouia aomata nako ikekei.
18Ma e a urubekebeke Turo ngkai,
ao a matakuakinna aomata ake ni mataniwin te aba
n noora kakamaakuna
ma n ruru ni maaku.”
19Boni Ngai ae te UEA ae te Atua ae N na onikingkami nakon aia kaawa anti. E na iekingkamii marawa
20ao e na uotingkami nako rikaaki nako abaia maate, ike kam na raoniia iai aomatan ngkoa ma kaawa ake a uruaki ngkoangkoa. Kam na tiku ikekei kam na aki manga riki b'a te kaawa ae e manga kaainaki irouia aomata
21Kam na mate n te aro ae e kakamaaku! A na roko aomata ni kakaaea ami kaawa ma e na bon aki manga reke. Bon aei Au taeka Ngai ae te UEA.
Who We AreWhat We EelieveWhat We Do
2025 by iamachristian.org,Inc All rights reserved.
