1A mate au kantaninga,
e a boo au tai,
ao e tauraoi te rua ni mate i m'aaiu.
2A m'aiti aomata ake a b'ainingareai,
ao I nooriia ngke a buakanai n te aro ae kakamaaku.
3Ngkana arona, b'a ko aki buokai te UEA,
ao antai ae kona ni kaboa
kainaomatakiu?
4Ko a tia ni kamatei nanoia b'a a na akea aia iango,
ao tai katokanikaia i aou.
5N taian taeka n rabakau ngkoa ao te aomata e na kam'anea raoraona i bukin te m'ane,
ao ane a na kainano natina.
6E a tia ni karikai b'a aia b'ai ni kabootau aomata,
ao a roko ni baawarei ubu.
7Ao a rikirake ni mataki matau i bukin rawawatau,
a rangi ni irariki baiu ma waeu n te aro are kaanga a nang aki reke nuuia.
8A rangi ni mimi aomata aika raoiroi n te baei,
ao a taku b'a te aomata ngai ae akea atuau.
9E na bon aki toki waen te aomata ae raoiroi,
ao e a rikirake ni korakora ma ni korakora ane e itiaki baina.
10Ma ngkana a bane n nakomai ao n tei i matau,
ao N na bon aki kunea te aomata ae wanawana i buakoia.
11A toki au bong ni maiu, ma au babaaire nako,
ao e a uruaki au kantaninga.
12“Ao a atonga te bong b'a te ngaina raoraou;
ngkana e a tabe n roo,
ao a ngaiia a taku b'a e a tabe n oota.”
13I a tiku ma kakantaningaan abaia maate.
N na arora kieu ni wene ikekei n te rotongitong.
14N na atonga te ruanimate b'a tamau,
ao N na atongi ino ake a na kana rab'atau
b'a tinau ao m'aneu.
15Tera te b'ai ae N na kantaningaia?
Iai ae ata kanoan au bong aika na roko?
16Te kantaninga e na bon aki irai
ngkana I ruo riikaki nakon abaia maate?
Who We AreWhat We EelieveWhat We Do
2025 by iamachristian.org,Inc All rights reserved.
