Taian Areru 63 - Kiribati New Version Bible

(Ana Areru Tawita; ngke e mena n rereuan Iuta)Ana Tangira te Atua e moa riki nakon te Maiu

1Te Atua, bon Atuau Ngkoe,

I kakorakoraai n ukoukoriko;

E kai nanou n tangiriko;

kanga ai aron aontano ae m'auteretere

ae e mate aona b'a akea te ran iai.

2N na noriko n am Tembora are Tabu,

ao N na taratara aroni m'aakam ma mimitongim.

3E raoiroi riki am Atataiaomata nakon te maiu,

Ma ngaia ae I riai n neboiko.

4N na katituaraoiko n ua tokin au bong ni maiu;

N na tabeki rake baiu n tataro nakoim.

5E na rauaki nanou kanga n te am'arake ae kangkang;

Ao N na anene ma te kukurei n neboiko.

6Ngkana I wene ni nneu ni wene, ao I uringko;

I aki toki n iaiangoiko n te bong,

7i bukina ngkai Ko aki toki ni buobuokai.

I anene ni kim'areirei i aan nuuni baim ni kiba.

8I nimnimtiko,

Ao Ko tautauai ni baim ae m'aaka.

9A na mate akana kataia ni kani kamateai;

Ane a na roko i aantano n aia tabo maate.

10A na mate n te kabaang,

ao a na kanaki rab'ataia irouia kamea.

11Ma e na kim'areirei te uea iroun te Atua;

Ao a na kamoamoaa

akana taetae n tuea n arana;

Ma a na kainaki wiia akana atoatonga te kewe.