1Ngke e a manga roko te bong are a na bootaki iai kaaini karawa i matan te UEA, ao Tatan naba i buakoia
2ao E taku te UEA nako ina, “Ko a nako maiaa ngkai Tatan?”
Ao e taku Tatan, “Kai akea b'a te nakonako n aki akaaka n te aonnaba aei.”
3Ao e taku te UEA, “Tera am iango iroun au toro are Iobi? Bon akea temanna i aon te aba ae kakaonimaki ma n raoiroi riki nako ina. E tataromauriai, ao e kabanea korakorana n aki kakaraoa te m'akuri ae buakaka. Ko a tia ni imanonoai b'a N na kariaia b'a ko na kataia n akea bukina, ma e bon teimatoa naba Iobi n arona ni kakaonimaki.”
4Ao e taku Tatan, “Ane na bon kaaki taekan b'aai ni kabane te aomata i bukin iangoan maiuna.
5Ao iangoia b'a aongkoa ko kamaraka rab'atana, ane na taetae n aki akaaka nako Im bon i reben matam!”
6Ao E taku te UEA nakon Tatan, “E raoiroi, e mena taekana ngkai i nanoni baim, ma ko riai n aki tiringnga.”
7Ao e nako Tatan mai matan te UEA, ao e kariki taiani kaboa i aon rab'atan Iobi ni kabuta.
8Ao e nako Iobi n tekateka i rarikin te tabo ni maange, ao e anaa te maibi ni katiibu ni kakaara iai kaboana.
9Ao e taku buuna, “Ae ko bon teimatoa naba ni kakaonimaki? E aera ngkai ko aki taetae n aki akaaka nakon te Atua, b'a ko bon aoria ni mate?”
10Ao e kaeka Iobi, “Ko taetae ni baba. Ngkana E anganiira baika raraoi te Atua, ao ti kariaia, ao e aera ngkai ti na ngurengure ngkana E anganiira taiani kangaanga?” Bon akea te b'ai ae taekinna Iobi ni kaaitaraa te Atua i bukin kamarakakina aikai ni kabane.
Rokoia raoraon Iobi ake teniman.11Raoraon Iobi ake teniman bon Eribati man te kaawa ae buubura are Teman, Biretata man te aba are Tua, ao Toob'a man te aba are Naama. Ngke a ongo rawawatan Iobi, ao a iangoa m'anangaia ni kawaria ni kabebetea nanona.
12Ao a kaman noora Iobi ma ngke a mena i keraroa ma aki kinaa, ma ngke a kinaa ao a moana tanginiweneia ma tangiia ni korakai. A raeuai aia kunnikai i bukin rawawataia, ao a tetewerakei taiani mannang nako eta i aon atuuia.
13Ao i mwiina, a uaia n tekateka ma ngaia i aon te tano i nanon itiua te bong ao te ngaina n aki kakarongoa, i bukina ngke a bon noora rawawatana.
Who We AreWhat We EelieveWhat We Do
2025 by iamachristian.org,Inc All rights reserved.
