Te Minita 3 - Kiribati New Version Bible

Bon Iai Tain B'aai Ni Kabane

1Bon iai tain b'aai ni kabane

i aon te aonnaba aei

ao iai naba taian tai.

2Iai te tai

i bukin te bungiaki ao te mate,

te tai n ununiki ao te tai ni bobooti uaa,

3te tai n tiritiri ao te tai ni kakamaiu,

te tai n urub'ai ao te tai ni kateib'ai,

4te tai n tang ao te tai ni ngare,

te tai n nanokawaki ao te tai ni kukurei,

5te tai n tewenakoi atiibu

ao te tai ni ikoikoti atiibu,

te tai ni inga ao te tai ni maaenako.

6Iai te tai ni kunei b'aai

ao te tai ni kabuab'ai,

te tai ni kaawakinib'ai ao te tai n angaanga,

7te tai n raeuai b'aai ao te tai n ituui b'aai,

te tai ni kakauongo ao te tai n taetae.

8Bon iai naba te tai i bukin

te tangira ao te riribai,

te buaka ao te raoi.

Baika E a Tia N Anganiira Te Atua B'a Ti Na Karaoi

9Tera te b'ai ae ti karekea man ara m'akuri korakora?

10I a tia n noori b'aai aika a kaangaanga aika e tangiri te Atua b'a ti na karaoia.

11E kariki b'aai te Atua n taia aika a riai. Ma bon akea temanna mairoura ae e ataa raoi te b'ai ae E a tia ni karaoia, ao E katikui inanora taian titiraki i bukin boong aika a tia n nako, ao boong aika a na roko.

12I ataa te b'ai ae moan te raoiroi ae ti konaa ni karaoia b'a ti na kukurei iai n taai nako n te maiu,

13i bukina ngke ana B'aintituaraoi te Atua nakoira bon te kukurei ae ti karekea man te am'arake, te mooi, ao man te m'akuri are ti karaoia.

14A na bane n akea tokini b'aai ni kabane aika e karaoi te Atua, akea te b'ai ae E karaoia ae e na manga bitaki. E a tia ni karaoi b'aai aikai ni kabane te Atua, b'a ti aonga n taromauriia.

15B'aai ni kabane aika a riki

a tia n riki mai m'aaina,

ao aika a na manga riki

a tia naba n riki.

E karaoi b'aai ni kabane te Atua

ni kaokioki n aron anne.

Ti Te Atua Ae E Atai Kanoan Boong Aika A Na Roko

16I noora te waaki ae e buakaka, ao ae e aki eti n taabo nako n te aonnaba n onea mwiin te waaki ae e raoiroi ao ae e eti.

17Ma ngaia are, I taku nako iu b'a e a tia te Atua ni kotea te tai ao te tabo i bukin b'aai nako. E na boni motikitaekaia aomata nako aika a buakaka, ao aika a raoiroi.

18I ataia b'a e kataira te Atua ngkai e kaotia b'a bon taiani man ngaira.

19Ti ikeike ao ti mate n ai aroia maan, ao ti aki raoiroi riki nakoia. Bon ti te b'ai ae akea nanona.

20A bane n nako b'aai aika a maiu nakon te tabo ae ti teuana. Ti riki man te tano, ao ti na manga okira te tano.

21Antai ae e ataia raoi b'a a bon waerake tamneira, ao tamneia maan a ruo nako nanon te tano?

22Ti bon nanonaki b'a ti na kukurei n ara m'akuri, ao bon anne te b'ai ae ti konaa ni karaoia. Ti bon aki konaa n atai boong aika a na roko.