Taian Areru Taekan te boki aei - Kiribati New Version Bible

Taekan te boki aeiTe boki ae Taian Areru bon te kabanea n ab'ab'aki ni boki n te B'aib'ara. Bon taian anene aika a konaa n aneneaki n tain te taromauri ke a ti taekinaki kaanga te tataro irouia aomata n tatabemaniia nako, ke n taiani kurubu. Bon iai m'aitin taian Areru aika 150 i nanon te boki aei, ao angiina mai iai a bon oteaki iroun Tawita are te uea. A rikorikoaki n te tai ae moan te maan ao a riki b'a kanoan aia taromauri Iteraera.Tabeua Taian Areru a taekiniia taani kairiiri n te anene ma te b'ai ni katangitang are e na kamanenaaki, ao te rieta are e na kamanenaaki. N aron teuana, taraa Taian Areru 4 ao 45.Angiin oin iango i nanon te B'aib'ara a m'aneweaki n Taian Areru n aron: te nebonebo, te kaaitau, te onimaki, te kaantaninga, te rawaawata i bukin te bure, ana kakaonimaki te Atua ma ana buobuoki. I nuukan raoi Taian Areru bon iai te onimaki ae e nene iroun te Atua. A aki toki ni kaotiota aia namakin ni koaua taani korei Taian Areru, i bukin neboan te Atua n ana kakab'aia, ke ngurengureia n tain te kaangaanga.Ni boong ake ngkoa i aon Iteraera ao iai itiua bukin kamanenaakin Taian Areru b'a: (1) neboan te Atua, n aron ane n Taian Areru 105; (2) kaotan te rawaawata, n aron ane n Taian Areru 13; (3) te reirei, n aron ane n Taian Areru 1; (4) neboaia uean Iteraera ma n tataro i bukin raoiroin aia tautaeka, n aron ane n Taian Areru 72; (5) taetaekinan m'aakan te Atua i aon ana karikib'ai ni kabane, n aron ane n Taian Areru 47; (6) kaotan tangiran Ierutarem, n aron ane n Taian Areru 122; ao (7) bukamaruan taian toa n aron ane n Taian Areru 126. Ma ni koauana a konaa ni manga kamanenaaki Taian Areru ni bukina aika a m'aiti.E kamanenaa Taian Areru te Tia Kamaiu ngke e kab'arab'ara ma n reirei, ao a aki toki naba ni m'aneweaki n aia koroboki taani korea te Nu Tetemanti. A aki toki naba ni kamanenai Taian Areru moan Kiritian n aia taromauri, reirei, ao n aia tai n tuangiia aomata te rongorongo ae e raoiroi are E a tia ni karaoia te Atua ri nanon te Tia Kamaiu. Ngkana ti taraa Taian Areru 118, ao ti na nooria b'a bon onoua m'aitin m'aneweana n te Nu Tetemanti:Te atiibu are a kaaki taekanataani kateiteie a riki ngkai b'ate atiibu ae e kakaawaki.(118.22)Oi n iango i aon te boki aeiE bwenauaaki te boki ae Taian Areru nakon nimaua m'akorona ke booki. Angiin Taian Areru n te Boki 1 ao 2 a koreaki iroun Tawita, ao angiin te boki 3 a koreaki iroun Ataba ke ana utu Kora. Taian Areru 120-134 bon Taian Areru ni kukurei. Taian Areru ae 150 a tib'aaki nakon m'akoro aika nimaua n aron aikai:Taian Areru (1—41)

Taian Areru (42—72)

Taian Areru (73—89)

Taian Areru (90—106)

Taian Areru (107—150)