Warekaia Iteraera 18 - Kiribati New Version Bible

Tabeia Ibonga ao Kanoan Rewi

1Ao E taku te UEA nakon Aaron, “Tabem ngkoe ma natim mm'aane ao kanoan Rewi ake tabeman ake man te kaainga are Koata, tararuaan b'aai aika riki n te Um'antabunrianna. Ao ngkoe ma natim mm'aane, tabemi tararuaan aia m'akuri ibonga.

2Bon ami koraki kanoan Rewi, ao a mena i rarikimi b'a a na buokingkami n ami m'akuri n te Um'antabunrianna.

3Kam na riai ni kakoauaia b'a a bon karaoi raoi tabeia. Ma ngkana a kaanii b'aai ake a tabu n te Tabo are e Tabu ke te baonikarea, ao kam na bane ni mate.

4Bon akea temanna ae kariaiakaki b'a e na kaawakina te Um'antabunrianna, ke ni karaoi b'aai aika a reitaki ma te Um'antabunrianna.

5N na bon aki manga un, ke ni katuaaia Iteraera ngkana kam iri raoi taiani kaetieti i matan te Tabo are e Tabu ao te baonikarea.

6Boni Ngai are I rineia kanoan Rewi mai buakoia baronga b'a Au b'ai, ao I a tia n anganingkami b'a buokami.

7Ma bon ti ngkoe ma natim mm'aane ae kam kona ni karaoa te m'akuri n ibonga n te baonikarea i nanon te Tabo are Moan te Tabu. Bon au b'aintangira nako imi te m'akuri n ibonga. Ao ake a kataia ni karaoa te m'akuri n ibonga, a na bon tiringaki.

Aia B'ai Ibonga man taian Angab'ai nakon te UEA(Te Tua 18.1-8)

8Ao e taku te UEA nakon Aaron, “I a tia n anganiko taiani b'aintangira ma taiani karea ake a uoti nako Iu Iteraera b'a ami b'ai. Ao man te tai aei nakon taai aika na roko ko na b'aina m'akoron te karea ni kab'arabure natim mm'aane, ao kanoam,

9n reitaki naba ma m'akoron te karea are te uita, ao m'akoron naba te karea ni kabomwi. Ami b'ai man te karea aei bon te m'akoro are aki kabuokaki i aon te baonikarea.

10Ao ngkai a tabu taian b'ai aikai, ao a na riai ni kanaki i rarikin te Um'antabunrianna, ma a na ti am'arake iai taiani mm'aane.

11Kam na b'ain naba m'akoron taian raka ni b'aintangira ma taian angab'ai ake a na uoti Iteraera nako Iu. A kona ni kang baikai kaain ami utu akana a itiaki ma n tau i bukin te taromauri.

12N aron aei, ngkana a uoti aia moani b'a ma aia moani wain, ao aia moani uita Iteraera, ao kam na b'aini kabanean tamaroan m'akoron b'aintangira aikai.

13Ao ami b'ai naba moa ni uaa n arokan aia katawanang ma aia nne ni kureebe. A na anga baikai aomata nako Iu, ao a na kona n anai tabeua mai iai kaain ami utu akana a itiaki.

14Ami b'ai ni kabane b'aai ake a tia ni kaokoroaki b'a au b'ai

15Au b'ai karimoa mm'aane n aia utu Iteraera, ao ai arona naba ma karimoa mm'aane n aia nanai n tiibu, kooti, ao nanai ni kao, ma a na kabooaki ni kaokaki taiani karimoa mm'aane, ao karimoa mm'aane aika taian aati mai Rou.

16Boon te karimoa te mm'aane ae moa man teuana ni waerake ana nam'akaina ni maiu bon nimaua te m'akoro n tirewa, ae boraoi rawatana ma are b'ainaki n te Um'antabunrianna.

17Ma e ngae n anne, ao bon au b'ai ni kabane taiani karimoa i rouia taiani kao, tiibu, ao kooti; a aki kona ni manga kaboaki ni kaokaki. E na tatauriaki te baonikarea n raraaia, ao a na kabuokaki neneaia b'a a na aetorake bubuia b'a I aonga ni kukurei.

18Kam kariaiakaki ni kang irikon maan aikai, n aron ae kam kona n kang rinikaokao, ao rangan taian raka ni Karea.

19Ni moa man te tai aei, ao kam a b'aini taian angab'ai aika tabu ake a anga Iteraera nako Iu b'a ami b'ai ma natimi mm'aane, ao natimi aine. Bon aei Au berita nako imi ma kanoami, ao e na bon aki manga bitaki.

20E na aki reke nako imi te aba teuana i aon Iteraera b'a abami. Bon te UEA Ngai, ao N na anganingkami b'aai ni kabane akana kam kainanoi.”

B'aai Aika A Reke Irouia Kanoan RewiE taku te UEA nakon Aaron:

21Au b'ai 10 te betienti man uaan arokaia Iteraera, ao tebwina te betienti man aia man aika karimoa. Ma I anga baikai ni kabane nako ia kanoan Rewi b'a booia i bukin aia m'akuri are a karaoia n te Um'antabunrianna,

22Bon ti ngaiia aika a kariaiakaki ni m'akuri n te Um'antabunrianna, ao e aki kariaiakaki temanna b'a e na roko ni kaaniia.

23Ngkana iai ane karaoa anne, ao e na tiringaki, ao a na katuaaeaki naba kanoan Rewi. E na bon aki bibitaki te tua aei.

I bukina ngke a na aki anganaki abaia kanoan Rewi man te aba i aon Iteraera b'a abaia,

24ao a na anganaki uaan aroka ma maan ake karimoa ake a anga Iteraera nako Iu.

Baika Riai n Anga Kanoan Rewi

25Ao e tuangaki Moote iroun te UEA b'a e na kaangai nako ia kanoan Rewi,

26“Ngkana kam anganaki irouia Iteraera 10 te betienti man uaan arokaia, ao aia man aika a tib'a bungiaki, ao kam na manga anganai tebwina te betienti mani baikanne.

27Ko na kaokoroi m'akoron b'aai ake a reke i roum b'a te angab'ai nako Iu, n aroia naba

28Iteraera ngkana a anganai m'akoron aia uita ma aia wain. Ao e na anganaki Aaron b'aai akanne,

29ma ngaia are, b'aai akana reke i roum, akana a rangi n tamaroa bon Au b'ai.

30Ngkana ko a tia ni katabui m'akoroia akana a rangi n tamaroa b'a Au b'ai, ao ko a kona ni kang nikiraia, n ai aroia Iteraera ngkana a kang m'akoron aia uita ma aia wain ngkana a tia n anga nako Iu.

31E kona ni kanaki tib'ami n aki akaaka irouia kaain ami utu nako, b'a ai bon anne naba boomi ni m'akuri n te Um'antabunrianna.

32Kam na bon aki katuaaeaki ngkana kam kanna, ti ngkana kam a tia n anga nako Iu m'akorona ake a rangi n raoiroi.

A na teimatoa n tabu taiani b'aintangira ma karea ake a uoti aomata nako imi, ao ngkana kam kang tabeua mai iai i m'aain ae kam anga nako Iu, ao kam na bon tiringaki.