Itaia 26 - Kiribati New Version Bible

Te Anene N Tokanikai

1E a roko te tai

are a na anene iai kaain Iuta

n te anene ae e kaangai:

“E kaawakinaki ara kaawa

Bon ara nono te UEA,

ao e anganiira te tokanikai.

2Kauki mataroan te kaawa

i bukiia te botannaomata aika a maiuakina te tua

aika a kakaonimaki nakon te Atua.

3E anga te rau ae e tamaroa te UEA

nakoia aika a matoa aia onimaki.

4Ma ngaia are, onimakina te UEA n taai nako

b'a bon ara b'aa ae e korakora

5E a tia te Atua ni kab'akaia ara kairiribai

man aia kaawa are e buubura are i aon te maunga

ao e taunna n te baareka.

6Ao ngkai a kabuakaka ma n aiwaa i nanon te kaawa arei

aomata aika a buakaka.”

Onimakinan Te UEA

7Ara UEA ko aki toki ni kakaraoa ae e eti

ao ko kabooraoa te kawai

i bukiia aika a ongotaeka iroum.

8Bon temanna ae e onimakinaki

b'a e na uota te eti;

ao ti tangira riki neboan aram

nakoni b'aai ni kabane.

9E kakaaeko nanou

inanou ngke e bong,

i bukina ngke e kaotaia aomata nako

n te aonnaba aei

aron maiuia ae e eti.

10E ngae ngkana e akoaki naba te aomata ae e buakaka

i aon aban te eti aei,

a karaoa ae kaairua ao a matakii

nakon mimitongim, ara UEA.

11E mwemwe baim ao e tauraoi

ni katuaaia,

ma a aki nooria.

Kamamaaia!

Kaota korakoran nanom ni kaawakiniira

ao karenakoia nako nanon te ai

are a na kabuokaki iai am kairiribai nako.

12Ko na anganiira te rau

i bukina ngkai ti a tia ni karaoi

ni m'aakam.

13A tia n tautaekaniira tem'angina

i rarikim, te UEA ae te Atua,

ma ti bon ti ongotaeka iroum.

14A mate ngkai kairiribai aikai

ao a aki konaa ni manga maiu.

Ko a tia ni katuaaia

a mauna nako,

e a bon m'aninga te aba taekaia.

15E a tia n rikirake ara botannaomata

i bukim, te UEA ae te Atua.

A m'aiti riki abara nakon ake mai m'aaina,

ao ko karineaki.

Anganakiia Maate Te Maiu Iroun Te UEA

16Ngkana ko katuaaia ara aomata,

ao a rairaki man tataro

nakoim, ara UEA.

17Ti maraki n ai aron te aine

ae e nang bung

i bukin te b'ai are ko a tia ni karaoia nakoira.

18Ma e oneaki mwiin bungiakin te nati,

n te ang ae e reke man te maraki ae e korakora.

Bon akea ara tokanikai ae ti a tia ni karekea,

ao bon akea naba kanoara

ake a na manga taua te aonnaba.

19A na manga maiu am aomata!

Tuangiia b'a a na kiitan ruanimateia

ao a na kukurei ni bukamaru ma n takaarua.

Ko kabooua te aonnaba

kaanga aoin te ingabong;

ko anga te maiu nakon te mate.

20Naako rinnako ao kaini taiani mataroa,

ngkami aika au aomata.

Karabaingkami ikanne n te tai ae e uarereke,

ni karokoa te tai

are e na toki iai unin te UEA.

E Na Katuaaeaki Te Aonnaaba Ma Taari

21E na otinako te UEA

ao e na katuaaia aomata nako i aon te aonnaba

i bukin aia bure.

Ao ane a na ataaki ma ni katuaaeaki

aomata aika a tia ni karaoi buure aika a korakora

ngkana E waaki.