1Kam na ongora n ana bukibuki te UEA nakon Iteraera.
Ko na teirake ngkoe ae Te UEA ao Ko na taekina bukinaia iroum; ke a ongora maunga ma tabuki baika ko taekin i bukiia.
2Ngkami aika maunga, aika bouan te aonnaba ma ngkoa, ongora nakon Ana kauntaeka te UEA! Iai Ana kauntaeka te UEA i marenana ma Ana aomata aika Iteraera are E na tabekaarake taekana.
3E taku te UEA, “Tera ae I a tia ni karaoia nakoimi au Aomata? Tera arou ae I a tia ni karawawataingkami iai? Kam na kaekaai.
4I kaotinakoingkami mai Aikubita; I kamaiungkami man te tautoronaki; I kanakoa Moote, Aaron, ao Miriam b'a a na kairingkami.
5Au Aomata, kam na uring ana iango B'araka ngkoa are uean Moaaba, are e na karaoia nakoimi, ma ana kaeka B'araam nakoina are natin Beora. Kam na uring aromi ngke kam ri aon te karaanga are te Ioretan ngke kam m'ananga mai Titim nako Kirekara. Kam na uring ni kabane baikai ao kam na namakin Au m'akuri ni kamaiu i bukimi.”
Tera ae kantaningaia te UEA6Tera uotau nakon te UEA ae Atuan karawa, ngkana I roko n taromauriia? E koaua b'a N na uotii kao ataei ma ni kabuokii b'a taiani karea nakoina?
7E koaua b'a E na kukurei te UEA ngkana I uoti nakoina tiibu aika m'aane aika ngaa, ma b'aan te oriwa ae e bure baireana? E koaua b'a N na anganna moan natiu b'a au karea ni kab'arabure?
8Bon tiaki ngaia anne, E a tia n reireiniira te UEA ataakin ae e raoiroi. Aikai baika E tangiri te UEA mairoura: Ti na karaoa ae e eti, ti na kaota te tangira ae e teimatoa, ao ti na iraorao ma Ngaia ma te nanorinano.
9E wanawana ane e maaka te UEA. E wetea te kaawa ni kaangai, “Kam na ongora ngkami aomata aika kam bootaki i nanon te kaawa!
10Iai te kaub'ai ae e reke n te babakanikawai i nanon aia auti aomata aika a buakaka. A kamanenai b'aai ni baire aika a kaairua, ao bon aikai baika I bati n ribaai.
11N na kangaa n nanoangaa te aomata are e kamanenai kainikatine aika a buakaka ma rawaawata aika a kairua?
12Am aomata aika a kaub'ai a babakanikawaia aika akea aia b'ai, ao bon taani kewe ngkami ni kabane.
13Ma ngaia are, I a tia ni moana uruam ma kamaunaam i bukin am bure aikai.
14Ko na am'arake ma ko na aki kona ni ngae; n te koaua, ko na boni baki naba. Ko na uotii nako b'aai, ma ko na bon aki konaa ni kaawakin; baika ko na kaawakin N na bon urui n te buaka.
15Ko na unika te uita, ma ko na bon aki taiia uaana. Ko na ongira te b'aa man te oriwa, ma ko na bon aki kamanenaa. Ko na karaoa te wain, ma ko na bon aki mooi iai.
16E na riki aei nakoim i bukina ngke ko katotoong ana m'akuri te uea are Omri, ma natina naba are te uea are Aaba. Ko reitanako aia m'akuri, ma ngaia are, N na uruko, ao a na bane ni kakeaa manenam aomata nako. Bon akea temanna ae e na karineko.
Who We AreWhat We EelieveWhat We Do
2025 by iamachristian.org,Inc All rights reserved.
