Neemia 3 - Kiribati New Version Bible

Manga Katean Oon Ierutarem

1Aikai aomata ake a buoka manga katean oon ao Mataroan nako Ierutarem:

Te ibonga ae e rietaata are Eriatiba ao ibonga ake tekorakina a manga katea te Mataroa are Tiibu ao a katinetinei mataroana. Ao i mwiina, a katabua te Mataroa are Tiibu ao m'akoron te oo ni karokoa te Taua are Tebubua ao te Taua are Ananera.

2A manga katea m'akoron te oo are teuana kaain Ieriko, ao Takuura are natin Imri te m'aane boni ngaia are e a manga katea te m'akoro are i mwiin anne.

3Ao te utu are Atena, e katea te Mataroa are te Ika. A kaaki taian tatanga ni nneia ao a katinetinei taiani mataroa, ao i mwiina, a manga kanim taian b'auti ao tatanga aika taiani kai b'a rokaia.

4Ao Meremota are natin Uria te m'aane ao tibun Akoti te unim'aane, e katia m'akoron te oo are i mwiina.

Ao Meturam, are natin Berekia te m'aane ao tibun Metetabera te unim'aane, e a manga katea te m'akoro are i mwiina, ao Tatoka are natin Baana te m'aane, e a manga katea te m'akoro are i rarikin anne.

5E na manga onob'aiaki te m'akoro are i mwiina irouia m'aane mai Tekoa, ma a rawa aia taani kairiiri man aia kaawa ni karaoa te m'akuri ae e rawaawata are a anganaki b'a tib'angaia.

6Ao a manga karaoa te Mataroa are b'aini Ngkoa Ioiata are natin Batea te m'aane ao Meturam are natin Betoteia te m'aane. A kaaki taian tatanga ni nneia, ao a katinetinei taiani mataroa, ao a kanim taian b'auti aika a matoatoa ao taian tatanga aika kaai b'a kaanga rokaia.

7Ao a karaoa te oo are i mwiina, Meratia mai Kibeon, Iaton mai Meronota, ao m'aane mai Kibon ao Mitib'a. E toki te m'akoro aei n ana auti te kowana n te Burawinti are Iuberetiti.

8Ao Utiera are natin Areaia are te tia orokoora, e a manga karaoa te m'akoro are i mwiina.

Ao Anania are te tia karao boiarara, e a manga karaoa te m'akoro are i mwiin anne, ao e waaki nako ni karokoa te oo are Raababa.

9E tautaekana iteran aonon Ierutarem Rebaia are natin Ura te m'aane, ao e a manga karaoa m'akoron te oo are i mwiina.

10Ao e a manga karaoaki te m'akoro are i mwiina iroun Ietaia are natin Arumaba, are e tena mwengana ma ngaia.

Ao e karaoa m'akoron te oo are i mwiina Atuti are natin Atiabeneia te m'aane.

11Ao e manga karaoa te m'akoro are i mwiin anne Marekia are natin Arim ao e karaoa te m'akoro are i mwiin anne Atuba are natin Baata Moaba te m'aane, ao a karaoa naba te Taua are Umum.

12Ao e tautaekana iteran aonon te aba are Ierutarem Tarum are natin Aroeti te m'aane, ao boni ngaiia ake a manga katea m'akoron te oo are i mwiina. E bon m'akuri naba ma ngaia natin Tiarum te aine.

13A karaoa te Mataroa are M'arua Anun ao aomata ake a maeka n te kaawa are Tanoa. A katinetinei taiani mataroa ao a kanim taiani b'auti aika a matoatoa ao taian tatanga aika taiani kai b'a rokana. A boni karaoa naba te oo ae tebwi ma nimaua te buuti ab'akiia, ni karokoa te Mataroa are Kaabiti.

14E tautaekana aonon te aba are Beta-akirem teuare Marekia are natin Rekaba, ao boni ngaia are e a manga karaoa te Mataroa are Kaabiti. E katinetinei taiani mataroa ao e kanim taian b'auti aika a matoatoa ao taiani tatanga aika taiani kai b'a rokaia.

15E tautaekana m'akoron te aba are Mitib'a Tiarun are natin Koraote te m'aane, ao boni ngaia are e a manga karaoa te Mataroa are Koburake n Ran. E rabuna aon te kawai n rin, ao e katinetinei taiani mataroa ao e kanim taian b'auti aika a matoatoa ao taian tatanga aika taiani kai b'a rokana. E bon manga karaoi naba taian oo n te Nei are Tiroa. E mena te m'akoro aei i mwiin ana nnenaroka te uea ao e waaki nako ni karokoa te kawai n ruorikaaki nakon ana Kaawa Tawita.

16E tautaekana aonon te aba are Beta-Tura Neemia are natin Atibuka te m'aane, ao e a manga karaoa naba m'akoron te oo are i mwiina. E waaki nako te oo anne ni karokoa nnen ruanimateia uea, te nei are e karaoaki, ao taian auti ni maeka i bukiia tautia.

Kanoan Rewi Ake A M'akuri n Te Oo

17Ao kanoan Rewi ake a m'akuri ni m'akoron te oo are i mwiina, bon Reum are natin Bani te m'aane; Atiabia, are e tautaekana iteran aonon te aba are Keira ao e karaoa ana m'akuri i bukin ana tabo;

18Binnui are natin Enatata te m'aane are e tautaekana iteran aonon te aba are Keira;

19Etera are natin Ietua te m'aane, are e tautaekana Mitib'a, ao boni ngaia are e a manga karaoa m'akoron te oo are i matan autin taian b'ainibuaka ao e roota te tabo are e b'aoua iai te oo;

20Ao Baruka are natin Tabai te m'aane, e rangi ni ingainga ni kan manga karaoa m'akoron te oo are e nakon ana auti Eriatiba are te ibonga are e rietaata;

21Ao Meremota are natin Uria te m'aane ao tibun Akoti te unim'aane, e karaoa are e nako tabon ana auti Eriatiba.

Ibonga Ake A M'akuri n te Oo

22Aikai araia ibonga ake a m'akuri n te oo:

Bon Ibonga ake maeka n aono ake i rarikin Ierutarem ake a manga karaoa m'akoron te oo are i mwiina.

23A manga karaoa te oo are i matan aia auti Beniamin ao Atuba.

Ao Ataria are natin Maateia te m'aane ao tibun Anania te unim'aane, boni ngaia are e a manga karaoa te m'akoro are i matan ana auti.

24Binnui are natin Enatata te m'aane bon ngaia are e manga karaoa m'akoron te oo are man ana auti Ataria nakoni koonan te oo.

25E karaoaki te m'akoro are i mwiina are e moa man koonan te oo ao te taua are n te bareti are i eta i rarikin aia katawanang taan tei iroun Barara are natin Utai te m'aane.

E karaoa m'akoron te oo are i mwiina Betaia are natin Baroti te m'aane.

26E toki te tabo are i rarikin te Mataroa are Ran i mainiku ao n te taua i bukin teiakinan te Tembora. E tena ma te m'akoro are n te kaawa are e aranaki b'a Obera, ike a maeka iai taani m'akuri n te tembora. Taani M'akuri ake Tekorakina Ake A M'akuri n Te Oo

27A manga karaoa m'akoron te oo are i mwiina m'aane mai Tekoa, ao bon anne aia kauoua ni m'akoro. E waaki aia m'akuri man te tabo are e kaaitaraa te taua are e buubura are i bukin teiakinan te Tembora, ao e waaki nako ni karokoa te oo are i rarikin Obera.

28A manga karaoa m'akoron te oo are i mwiina tabeman taiani ibonga, A moana aia m'akuri mai meangin te Mataroa are Aoti, ao a karaoi naba taiani m'akoro ake i matan oin aia auti n tatabemaniia nako.

29E manga karaoa te oo are i matan ana auti Tatoka are natin Immera te m'aane.

E karaoa te m'akoro are i mwiina, Temaia are natin Tekania te m'aane, are e tararuaa te Mataroa are Mainiku.

30A manga karaoa te m'akoro are i mwiina Anania ao Anun are bon aia kauoua ni m'akoro

Ao Meturam are natin Berekia te m'aane, e a manga karaoa te m'akoro are i mwiina, ti are i matan ana auti.

31Ao Marekia are te tia karaokoora, e manga karaoa te m'akoro are i mwiina, ni karokoa te auti are e kamanenaaki irouia taani m'akuri n te tembora ao taani kaboowi. E kaaitaraa te tabo aei ma te Mataroa are Bootaki, i rarikin te ru are i etan te oo are te koona are i meang mainiku.

32A karaoa te kabanea ni m'akoro n te oo taani karaokoora ao taani kabob'ai, are e biri man ruun te koona ni karokoa te Mataroa are Tiibu.