1I nanon moan nam'akainan aia kauoua n ririki Iteraera n te Rereua are Tinai, ao e tuangaki Moote iroun te UEA
2b'a e na taetae nakoia aomata ni kaangai, “Kam na kauringa te Riao n te tairiki
3are te katebwi ma aua ni bongin te nam'akaina aei. Kam na irii kaetietin te Toa aei ngkana kam waakinna.
4Ao Moote, e tuangiia aomata te b'ai are E taekinna te UEA,
5ao a kauringa te Riao n tairikin te katebwi ma aua ni bongin te moan nam'akaina i nanon te rereua.
6A a tia tabeman mairouia aomata n aia maeka Iteraera n riinga te mate, ao aikoa tau n taromauria te UEA, ao a aki riai naba ni kauringa te Riao. Ma a bubutiia Moote ma Aaron, ao a taku,
7“Bukin tera ngkai ti na aki iriia raora aika Iteraera ni kauringa te Riao, ma te angakarea nakon te UEA ngkana ti a tia n riinga te mate?”
8Ao e taku Moote, “Kam na taningaai b'a N na nako n rinnako n te Um'antabunrianna n ongora iroun te UEA b'a tera ana taeka iai.”
9Ao E a manga tuanga Moote te UEA
10b'a e na kaangai nakon te botaki n Iteraera:
Ngkana tao arona b'a iai mai roumi ke mairouia kanoami ae riinga te mate, ao e a aki tau n taromauriai, ke ngkana tao kam mena i kiraroa n te kawai ae ananau, ao kam bon tangiria naba ni kan kauringa te Riao.
11Ma e na riai ni karaoaki n tairikin te katebwi ma aua ni bongin te kauoua n nam'akaina. Kam na kana te tiibu te teei n te Riao ma te kariki ae aki karikaki, ao te baanikaai ae mao,
12ao tai katuka teutana nakon te ingabong, ke n otea riin te man. Ururingnga n iri kaetieti aikai.
13Ma ngkana iai i roumi ae rawa ni karaoa te Riao ngkana kam aki m'ananga nako kiraroa, ao e na katinanikuaki. E na bon katuaeaki i bukina ngke e aki anga karea nako Iu n te tai ae riai.
14A kona aomata nako, n ikotaki ma iruwa ake a maeka i buakomi ni kauringa te Riao ngkana a iri taiani kaetieti ni kabane.”
Te Nang i aon Te Um'antabunrianna(Te Oti 40.34-38)15Ao ngke e a tib'a tei te Um'antabunrianna, ao e a kaoti naba te nang ae matenten n rabuna aon te Um'antabunrianna.
16Ao e tiitiku te nang n te tabo arei n te ngaina ae koraki. Ao n te tairiki, e a manga riki b'a te ai.
17E kamanena te nang aei te UEA n tuangiia Iteraera b'a n ningai ae a na kam'ainga iai aia auti n rianna, ao ni manga kateia ia.
18Ngkana e rabuna te Um'antabunrianna te nang arei, ao a bon aoriia Iteraera n aki kab'arai aia auti n rianna.
19Ma ngkana e m'aing nako te nang, ao a iria nako naba, ao ngkana e tei, ao a manga katei naba aia auti n rianna ma n tiku ikanne,
20e ngae ngkana ti teuana te tairiki ke tabebong, ke teuana te nam'akaina, ke teuana te ririki.
21Ngkana e tiku te nang i aon te Um'antabunrianna, ao a bon tiku Iteraera n aia tabo.
22Ao ngkana e m'ananga te nang, ao a m'ananga naba Iteraera.
23A ongotaeka nakon Ana babaaire te UEA, ao a m'ananga nakon are E tuangiia te UEA, b'a a na nako iai.
Who We AreWhat We EelieveWhat We Do
2025 by iamachristian.org,Inc All rights reserved.
