Itaia 18 - Kiribati New Version Bible

Katuaaeakin Itiobia

1E wene te aba ae Aikubita

i tinanikun karaangan nako Itiobia,

ao e onrake aona n taian m'ata ao maan aika a uarereke.

2E kanakoia ana taan uarongorongo Aikubita

ni waerake n te Karaanga are te Naire

i aon taiani kaibuke aika a karaoaki n taiani uteute.

Ni kawaekoaia nako Itiobia,

are a ab'ab'aki kaaina

ao a maratirati kuniia.

E korokoreaki abaia n taiani karaanga;

a korakora ao a iowawa,

ma ni maakaki ni kabutaa te aonnaba.

3Kaain te aonnaba aei ni kabane,

kakauongo raoi!

E na kanakoaki te kanikina

i aon taian maunga,

ao ane kam na ongo tangin taiani buu.

4E taku te UEA nako iu.

“N na tararikaaki ma te nano ae e rau

mani mwengau are i eta

kaanga raun taai n te tawanou

ke taian nang n te kabuebue

n tain te tai.”

5I m'aain ae a onikaki taian uee

nakon taiani kureebe,

ao e na koroi bwebweia te Atua

ma n taeki nako taiani m'aanga.

6A na riki kaain Itiobia b'a kanaia

ikaren taiani maunga

i nanon tain te aumaiaki

ao kanaia maan aika a aki manana

i nanon tain te aumeaang.

7A ab'ab'aki rab'ataia kaain Itiobia aikai ao a maranran kuniia. A maakaki ni kabutaa te aonnaba, i bukina b'a a korakora ao a iowawa. Ma n te tai arei ane a na roko man abaia aika a m'akorokoro n taiani karaanga, ao a na uoti taiani b'aintangira nakon te UEA ae Moan te M'aaka, are e taromauriaki i aon te Maunga are Tion.