Itaia 25 - Kiribati New Version Bible

Te Tataro Ni Kaaitau Nakon Te Atua

1Bon Atuau, Ngkoe, te UEA!

N na neboiko

i bukin karaoan b'aai aika a kamimii

aika ko a tia ni baairei ma ni berita iai

man taai ake ngkoa.

2Ko a tia n urua nonoia

ara kairiribai,

ma ni katikuia ma aia kaawa ae e buubura ma te urubekebeke.

Bon akea riki te b'ai

ae e na manga konaa ni kateaki n te kaawa ane e buubura anne.

3Ao ngkai a nang maakuko ma ni karineko

botannaomata aika a korakora ma ni iowawa.

4Ko a tia n riki b'a te tabo ni kamanomano

i bukiia aika a maiu ni kainano ma n tangira buokaia

i nanon tain te kaangaanga.

A buakaniira ara kairiribai

kaanga rokon te karau ae e korakora

ke kaanga riringan taai n te tawanou,

ma ko bon riki b'a katanara.

5A oroira ianena aikai

kaanga korakoran kabuebuen te rereua.

Ma ko bon riki b'a te nang,

are e kataniira man kabuebuen taai.

Ko katoka anenean te anene n tokanikai

irouia ara kairiribai.

Kamaiuara Iroun Te UEA

6E na katauraoi am'arake aika a rangi n raraoi

te UEA ae Moan te M'aaka

i bukin te baka n am'arake

i bukiia botannaomata.

A na kabutaki wain aika a rangi n raoiroi

ao iriko ni man aika kabanea n tamaroa.

7E na kamaunaa nako

taiani kunnikai ni mate

are a rabunaki iai botannaomata.

8E na kamaunaa m'aakan te mate

te UEA ae Moan te M'aaka

ao e na kaoi rannimata ni kabane.

E na akea te tabo ae e na manga karawaawataaki

iai ana Aomata

Bon ana taeka te UEA!

9Ane a na kaangai aomata n te tai arei,

“E a tia te UEA ni kamaiura!

Ti na karaoa ara bootaki ni kukurei.

Ti tataninga ma ni kakantaninga

ao ngkai e a mena Atuara ikai.”

10E na kaawakina te maunga aei

bain te UEA ae e m'aaka.

Ane a na kab'akaaki kaain Moaaba

ma ni booketaketa kaanga taian b'ab'ati ni uteute

i nanon te m'arua i bukin nakotariia maan.

11Ane a na inimaki ni kakaaea angan otinakoia,

ma e na kab'ainrangiia te Atua

e ngae ngkana a kai nanoia.

12Ane a na b'aka

oon aia nono nako

ma ni maae nako i buakon te baareka.