1I a tia n tuangingkami b'aai ni kabane ake E na karaoi te UEA ae Atuami i buakomi, ao I a tia naba n tuangingkami taiani kamaraia ake E na karokoi i aomi ngkana kam rawa nakoina. E na kamaenakoingkami nakon aaba aika raroa nako, ma ngkana kam ataia ae E katuaaingkami,
2ao okirikaaki nakoina ma nanomi ao tamneimi ni kabane, ma ni manga ongotaeka nakon ana Tua aika I a tia n anganingkami n te bong aei.
3-4Ao i mwiina, E na katoka katuaaeakimi ao E na manga akoingkami. Ngkana tao E a tia ni kamaenakoingkami nakon aaba ake i tabon aonnaba, ao E na manga kaokingkami
5nakon te aba are aia b'ai ngkoa ami bakatibu, ao ma ni karaoingkami b'a kam na tetekeraoi riki ma ni korakora riki nakoia.
6Kam taningabono ma kanoami, ma E na karaoingkami te UEA b'a kam na kukurei n ongotaeka nakoina, ma n tangiria ma nanomi ao tamneimi ni kabane, ao kam na kukurei ma n ab'ab'aki maiumi.
7Ao i mwiina. E na kanakoa te maraia te UEA ae Atuami mai i aomi ma ni manga kab'aka i aoia ami kairiribai aika riribaingkami ma ni buakaningkami.
8Kam na manga ongotaeka riki nakon ana Tua ma ana Reirei te UEA,
9ao ane E na kakab'aiaingkami ma n anganingkami natimi aika a rawata, ami nanai n tiibu, ao nanai ni kao, ao arokami taiani uita ma b'aare aika a m'aiti uaaia. E na rangi ni kukurei te UEA ni karaoi m'akuri aika a raoiroi nakoimi, n aron are E karaoia naba ngkoa nakoia ami bakatibu.
10Ma kam na motikia mai nanomi n te tai aei b'a kam na taromauria te UEA ma nanomi ao tamneimi ni kabane ao kam na ongotaeka ni b'aai ni kabane ake n Ana Boki n Tua te Atua.
Rineakin Te Maiu, Ao Tiaki Te MateAo e taku Moote nakoia Iteraera:11E aki kangaanga te ongotaeka nakon ana Tua te Atua ngkai kam bon atai ana Tua.
12A aki mena ana Tua i karawa, ma ngaia are, bon akea aonami ni kaangai, Ti na kanga n ongotaeka nakon ana Tua te UEA? Ao a mena i karawa, ao bon akea ae kona ni waerake n anai ma ni uoti rikaaki ma ni kab'arab'arai nakoira.
13Ao kam aki kona ni kaangai, Ti na kanga n ongotaeka nakon ana Tua te UEA? Ao a mena i nanoni marawa, ti ngkana iai ae na nako n anai ma ni uoti rikaaki ma ni kab'arab'arai nakoira.
14Bon tiaki ngaia anne, b'a a mena tuua aikai i rarikira, ao kam bon ataia naba i nanomi. Te b'ai ae kam na ti karaoia bon te ongotaeka nako iai.
15I anganingkami nanomi n te bong aei. Kam kona n rinea te maiu ao te tetekeraoi ke te mate ao te kabuanib'ai.
16I tuangingkami b'a kam na kakaonimaki nakon te UEA, ni maiuna te maiu are E a tia n tuangingkami, ao n ongotaeka nakon ana Tua ma ana Reirei.
17Kam a kan ri nanon ngkai te Karaanga are te Ioretan ma n anaa te aba ae I anganingkami ngkai.
18Ngkana kam ongotaeka nakoina, ao kam na maiu ma ni riki n tetekeraoi ao ni korakora.
Ma, ngkana kam n rinea te aki ongotaeka ao te raarawa nakon te UEA, ma ni bobaraaki n taromauriia atua tabeman, ao I kauringkami, b'a a na aki ananau maiumi.
19I wetea karawa ma aonnaba n te tai aei b'a taani kakoaua b'a I anganingkami nanomi n are kam kan rineia. Tera ngke kam rinea te UEA b'a E na anganingkami te tetekeraoi ma te maiu ae ab'ab'aki, b'a E kaawa n kab'aka te maraia i aomi ma n tiringingkami. Rinea te maiu.
20Kam na riai ni kabanei nanomi n onimakina te UEA ae Atuami, tangiria, ao karaoi b'aai ni kabane akana E tuangkami. Bon ti te UEA ae kona n anga te maiu, ao E na kaananaui maiumi n te aba are E berita iai nakoia aia bakatibu ake Aberaam, Itaaka, ao Iakob'a.
Who We AreWhat We EelieveWhat We Do
2025 by iamachristian.org,Inc All rights reserved.