Ana Anene Toromon 7 - Kiribati New Version Bible

M'aieen Te MareE taku Teuarei:

1Bon te natinuea te aine ngkoe,

ao a kakateke waem

i nanon am kau.

Boton rangam bon ana m'akuri te tia karaob'ai ae e tabonibai,

aika te naan tirewa ni kauaai;

2Butom bon te kiraati ni wain

ae e taonako kanoana.

E buabuaki raoi rab'atam ao e beebete taraam

kaanga te b'ariko ni uita

aika a kabaeaki n taiani kiebu.

3Ti te bo mmamam ma taian ria

aika taiani bwebwee.

4Ti te bo roroam ma te aiwere,

ao a kiakia matam

kaanga taian nei ake i Etibon

i rarikin mataroan Bata-Rabim.

E tamaroa b'airim

kaanga te Maunga are Reb'anon

are i aon te kaawa are Tamateko.

5E rietaata atuum

kaanga te Maunga are Karemera;

e rangi ni kantara iran atuum

ao e a taenikai te uea iai.

6Ko botonaine,

ko rangi ni b'arub'aruaki!

7Ko irariki n ab'ab'aki

kaanga te kai te baam,

ao a buabuaaki raoi mammam.

8N na tam'arakea te aroka anne

ma n toka n taui m'aangana nako.

Ao n na kunea b'a ngaia bon

taiani b'ariko ni kureebe mammam,

ao boiararan te aboro

ikeikem.

9E rangi ni karewerewe riki te kiiti ma ngkoe

nakon nimakin te kabanea n tamaroa ni wain.

Ai tamaroara ao ai kangkangira! E taku Neierei:

10Raou ae e tangiraki, am b'ai ngai,

ao ko b'aruai.

11Ti a nako n nakonako i nanon taian tawaana

ma ni matu n taiani kaawa aika a uarereke.

12Ao ti na utinako n te kaarangaina n noori kureebe ao kainam'arake

ngkana tao a uee.

N na anganiko au tangira,

ngkana ti roko ikekei.

13Raou ae e tangiraki, e kaonaki te ang

ni boiararan te uee ae e m'aaka.

I a tia ni kaawakin i bukim

aekaki n uaanikai nako aika a kangkang

i matan ara mataroa.