1E karaua te nano ae e un
te kaeka ae e nanorinano,
ma a kakiriweea te nano
taeka aika a kaebuebu.
2A roko taeka aika a wanawana
mairouia aomata aika a wanawana,
ma a taekinaki taeka aika a nanobaba mairouia aika a nanobaba.
3E noori b'aai ni kabane te UEA
aika a raoiroi ma aika a buakaka.
4Bon taian b'ainaoraki taeka aika a raoiroi,
ma taeka ni kewe
a konaa ni kaikoaka te aomata.
5Kam na aki nanobaba
ao n aki ongotaeka irouia am karo.
Kawanawanaingkami! Kariaia kaetakimi.
6A rikirake ni marurung aomata aika a raoiroi,
ma a na bua aia b'ai
aomata aika a buakaka.
7A karekea te iango raoi
taeka ni wanawana;
bon akea nanon te b'ai ae a iangoia
aomata aika a nanobaba.
8E aki kukurei te UEA
n aia b'aintangira aomata aika a buakaka,
ma e kakukureiaki
ngkana a tataro ana aomata.
9E aki kukurei te UEA
irouia aomata aika a karaoa te bure.
Ma e tangiria aomata nako
aika a karaoa ae e raoiroi.
10Ngkana kam rairaki man te kawai ae e raoiroi,
ao kam na katuaaeaki;
ngkana kam rawa ni kaetaki
ao kam na mate.
11Ngkana e konaa n noori b'aai nako te UEA
n aia aonnaba maate,
ao e konaa naba n noori nanora.
12Akana a b'ainingareia tabem'aang
a rawa ni kaetaki,
ao a na bon rawa ni buubuti buokaia
mairouia akana a iangoraoi.
13E anganiko te moangare te kukurei;
ma e konaa ni kamanatuako te nanokawaki.
14E ingainga ni kan reireinna b'aai riki tabeua
te aomata ane e iangoraoi,
ma a b'arua te m'akuri ni baba
aomata aika a nanobaba.
15E matoatoa maiun te aomata ae e kainano,
ma te nano ae e rau boni kaanga ai aron
te baka n am'arake ae akea tokina.
16E raoiroi riki te ongotaeka iroun te UEA
ma am b'ai aika ti tabeua,
nakon te maiu ni kaub'ai
ao te mangaongao ae e korakora.
17E raoiroi riki te am'arake ae e bon tau ae e kanaki ma te tangira
nakon te baka n am'arake
ae e mena iai te riribai.
18Te kakai un
e kariki kiriwe aika a bati,
ma te tiku n rau
e kanakoraoi ngurengure nako.
19Te maiu n taningaroti boni kaanga te nakonako
n te tabo ae e uarereke ae e kateketeke,
ma a nakonako aomata nako
aika a kaakaraoa ae e raoiroi n te kawai ae e boraoi.
20A kakukureia aia karo
ataei aika a iangoraoi,
ma a rangi n ribaaki irouia
ataei aika a nanobaba.
21A uota te kukurei akana a bangab'ai
nakoia nanobaba aika akea aia iango,
ma a toua te kawai ae e eti
aomata nako aika a iangoraoi.
22A na bane ni kaairua b'aai nako
ngkana akea te reirei ae e raoiroi
e anai taian babaaire aika iangoaki raoi
b'a a aonga n nakoraoi b'aai.
23E boni kakukureia aomata nako
te anga te taeka
n te tai ae e riai.
24A ira te kawai akana a wanawana ni kabane
are e waerake nakon te maiu
ao e raroa nako man te mate.
25E uruaka mwengaia
akana a kainikatonga te UEA,
ma e kaawakin aia b'ai
aine nako aika akea buuia.
26E ribaai iango aika a buakaka te UEA
ma e kukurei n te taeka n akoi.
27E karika te kangaanga nakon ami utu
te mataaib'ai,
ma kam na bon kaawakiningkami i bon iroumi
ngkana kam rawa ni karaoa te baabakanikawai.
28A iango moa aomata aika a raoiroi
i m'aain ae a kaeka,
ma e taetae n akea ana iango ane e buakaka
n taekin taeka aika a buakaka.
29E bon aki konaa n ongo te UEA
aia tataro aika a buakaka,
ma e kaekai aia tataro
aika a ongotaeka i rouna ni kabane.
30E kakukureiko
te ngare ni iraorao,
ao e kakorakorako
te rongorongo ae e raoiroi.
31E raoiroi te kaetaki ae e kamarurung,
ao ngkana kam kariaia,
ao kam na wanawana.
32Kam bon karika te kangaanga nakoim
ngkana kam kaaki taian reirei,
ma bon te iango ae e raoiroi
ngkana kam butim'aai.
33E na kawanawanaingkami
kaotan karinean te UEA
ao e na uota te karineaki nakoim
te nanorinano.
Who We AreWhat We EelieveWhat We Do
2025 by iamachristian.org,Inc All rights reserved.
