1Te UEA ae Atuau,
bon te tia kamanoai Ngkoe;
Ko na kamaiuai
mairouia taani kaeai ni kabaneia.
2B'a rimwi a na raebitiai
kanga te raian ngkana e raebitia konana,
ao akea ae e kona ni kamaiuai.
3Te UEA ae Atuau, I aki ataia b'a I bure ke I aki!
4I tuai kam'anea raoraou
ke ni iowawa nakon au kairiribai
n akea bukina.
5Ngkana I a tia ni karaoa aron aei,
ao a na kaeai au kairiribai
ao N na reke irouia.
A na toubekaai ni karokoa mateu
ao a na katukai i buakon bubun aontano.
6Te UEA, Ko na un;
Karaoa te m'akuri teuana!
Eekinakoia au kairiribai.
Ao taraia b'a e na karaoaki te kaetitaeka ae eti.
7Karokoia aomata nakoim
ngkae Ko tekateka i aon am Kaintokanuea
n tautaeka i aoia ni kabaneia.
8Te UEA, motikitaekaia botannaomata!
Motika taekau, ao kaotai nakoia te koraki
ae I b'aab'aina te koaua, ao I aki ataia b'a I bure ke I aki.
9Bon te Atua ae ko raoiroi ngkoe
ae ko motiki taekan ara iango ma nanora.
Katoki aia m'akuri aomata aika buakaka
ao kakab'aiaia akana a kaakaraoa ae e raoiroi.
10Ngkoe, te Atua, bon otangau,
ao kamanoaia aomata ni kabane
ake a raraoi nanoia.
11Te Tia Motikitaeka ae e raoiroi te Atua,
ao E riiribaa te buakaka
n te bong ae koraki.
12Ngkana a rawa aomata n rairaki man aroia,
ao E na kakangiia ana kabaang te Atua,
ao E na kab'aoua ana kainikatebe
ni katauraoia.
13E katauraoi ana b'ai ni buaka
aika a kamaamate.
14Te aomata ae buakaka kanga ai aron
te aine are nangi bungia natina
ae te tia iowawa ao te tia kewe,
ao te tia kakaitaraa naba.
15E kena te kinono b'a ana b'ai ni kam'aam'ane,
ao e a manga boni m'ane iai.
16B'a e na boni b'akaraki ni mwin
oin ana m'akuri ae e buakaka,
ao e na ikoaki ni mwin oin
ana iowawa.
17N na katituaraoiko te UEA!
I bukin arom ae e raoiroi;
ao N na anenea taekam
are moan te rietaata Ngkoe.
Who We AreWhat We EelieveWhat We Do
2025 by iamachristian.org,Inc All rights reserved.
