Iobi 24 - Kiribati New Version Bible

E reitia IobiBukin tera ngkai e aki karekea ara tai te Atua.

1E aera te Atua

ngkai E aki karekea te tai ni motikitaeka,

te bong i bukin karaoan te eti

nako ia aomata aika toro i Rouna.

2A kam'aei tian aaba aomata ni kaiabai;

a iraei tain tiibu, ao a kamenaki i buakon aia nanai.

3A anai aia aati ataei aika akea aia karo,

ao a taua ana kao m'aane te aine ae mate buuna ni karokoa b'aran ana taarau te aine anne.

4A tuuka reken te eti nako ia aomata aika kainano,

ao a imanonoia aomata aika akea aia b'ai b'a a na bon karabaia mai rouia taan karawawataia aomata.

5Ma ngaia are a ukoukora kanaia aomata aika kainano,

i nanon te rereua n ai aroia taian aati aika katam'anti.

6A taii uaan taian tawaana aika aki uniki,

ao a rikoi uaan kureebe n aia nne n aroka aomata aika buakaka.

7A matu n aki rabuniia n te tairiki;

akea te b'ai teuana ae a kamanoi iai rab'ataia man te m'aitoro.

8A m'aim'ai n te karau are b'aka i aon taiani maunga,

ao a karabaia i rarikin taiani b'a ni kamanoia iai.

9A karaoia ataei aika akea aia karo b'a aia toro aomata aika buakaka,

ao a anai natiia aomata aika kainano b'a kab'araan aia taarau tamaia.

10Ma ngaia are, a nakonako aomata aika kainano ma akea kunnikaiia

are a na katana rab'ataia iai, ao a taia te uita i bukiia tabem'aang.

11A tawakaia te uita ni kanakoa b'aana i nanon aia tabo n ongirib'a aomata aika kaub'ai,

ao a toutou kureebe i bukin te wain, ma te taka ae korakora i rouia.

12A tang aomata aika ikoaki ma aika kani mate i nanon taiani kaawa,

ma E aki kaekai aia tataro te Atua.

13Iai aomata aika ririiba te oota;

a rawa n nakonako i nanon te kawai ae oota.

14E kautinako n te kaarangaina te tia tiriaomata

n tiringa te aomata ae kainano,

ao e a manga kimoa n te tairiki

15E tataninga te moan tairiki te aomata ae te tia wene ni bure;

e rabuna matana b'a e aonga n aki nooraki i roun temanna.

16A nini auti taani kimoa n te tairiki,

ao a karabaia n te ngaina ni b'angaia i nanon te tabo ae akea te oota iai.

17A mamaaka ootan te ngaina,

ao bon akea maakakin te rotongitong i rouia.

18Ao e taku Toob'a, “E uotaki nako te aomata ae buakaka n te ieka,

ao e kamaraiaaki ana buakonikai i roun te Atua;

e aki kona ni manga nakoni nnen arokana te kureebe.

19Kaanga ai aron te tinoo ngkana e mauna nako n te kabuebue ma bongin te m'auteretere,

ao ai aron naba te tia bure b'a e na mauna nako man abaia aika maiu.

20E na bon aki ururingnga naba are bon oin tinana.

E na kanaki i rouia ino ma ni kamaunaaki n ai aron te aroka ae einako ni b'aka.

21E riki anne nako ina i bukina ngke e aki karaoa ae riai nako ia aine aika mate buuia,

ao e aki akoia aine aika akea natiia.

22E kamaunaia aika korakora ni m'aakana.

E m'akuri te Atua, e mate te aomata ae buakaka.

23E bon anganna te maiu raoi ti i nanon tabeua te tai,

ma E bon tarataraia n taai nako.

24E rikirake kab'aian te aomata ae buakaka,

ma e a manga rai n ai aron te uteute,

kaanga ai aron te kai ae uangingi are a tia ni koreaki.

25Iai ae kona ni kakewea aei?

Iai ae kona ni kakoaua b'a e kewe au taeka?