1Au botannaomata, kam na ongora n au taeka n reirei,
Ao katanimai taningami nakon te bae N na taekinna.
2N na kabonganai taian taeka n rabakau,
Ao N na kab'arab'arai nanoni baike a raba ake b'ai nikawai,
3ake baike ti a tia n ongo ma n atai,
ake ti a tia n tuangaki taekaia irouia ara bakatibu.
4Ti na aki karabai mairouia ara ataei;
Ti na tuangiia kaain te roro ae i mwira
taekani m'akan te UEA ma m'akuri
aika ab'ab'aki ma ni kamimii ake E a tia ni karaoi.
5E anga taian tua nakon te botannaomata
are Iteraera ake kanoan Iakob'a.
E anga ana taeka nakoia ara bakatibu
b'a a na reireiniia natiia taekan ana tua,
6B'a e aonga n rabakau iai te roro ae na roko rimwi,
Ao a na manga kona n tuangiia natiia.
7Ao aei aroia are a na kona iai natiia ni manga onimakina te Atua,
Ao n aki m'anuokini baike E a tia ni karaoi,
Ma a na ongeaba n taai nako nakon ana tua.
8A na aki katotongiia aia bakatibu,
ake te roro n aki ongotaeka ma n rawa ni kan aan-taeka,
Ake a tuai man nene onimakinan te Atua irouia,
Ao a tuai naba n teimatoa ni kakaonimaki nakoina.
9A biri nako tautian Eberaim ake a ua kai
ma kainikatebe n te bongi ni buaka.
10A aki kawakina aia boraraoi ma te Atua;
A rawa n ongeaba nakon ana tua.
11A m'anuokin taekani baike E a tia ni karaoi,
Ake kakai ake a noori ngke E karaoi.
12E karaoi kakai i mataia aia bakatibu
n te tabo ae e aoraoi i Toan n te aba are Aikubita.
13E bwenaua taari, ao E kairiia ri nanona;
E katei ranin taari n ai aron te o.
14E kairiia n te nang ni ngaina,
Ao n otan te ai ni bong ni karokoa e ngaina.
15E bwenauai b'aa n te rereua
Ao E anganiia te ran man te tabo ae nano.
16E katinakoi karaanga n ran man te b'aa,
Ao E karaangai raan n ai aroni karaanga aika ab'ab'aki.
17Ma a aki toki ni bubure nakon te Atua are Moan te M'aaka,
Ao a rawa ni kan aan-taeka i rouna n te rereua.
18A aki manrerei ngke a kataa te Atua ngke a tua
b'a e na karekeaki kanaia are a tangiria.
19A taetae n eekaanako te Atua ao a kaangai,
“E kona n reke te am'arake iroun te Atua n te rereua?
20E koaua b'a E orea te b'a,
ao e raanga nako te ran ae korakora b'arona;
Ma E kona naba ni karekea te am'arake i bukira?
E kona ni karekea te iriko-maiu nakoia ana botannaomata?”
21Ngke E ongo te UEA aia taeka aikai ao E un;
E ekinakoaia nakoia ana botannaomata n te ai,
ao e rikirake unna nakoia,
22i bukina b'a a aki onimakinna,
ao a aki kakoauaa ae E na kamaiuia.
23Ma E taetae nakon taian nang,
Ao E tua b'a a na uki mataroani karawa;
24E kab'aka te maana b'a kanaia;
E anganiia am'arakeni karawa.
25A kang kanaia anera,
A anganaki iroun te Atua b'aai ni bane ake a tangiri.
26E kawaia naba te angi mainiku b'a e na kare ri eta;
Ao E kauekea te angi maiaki ni m'akana.
27E kab'aka te iriko i aoia n ai aroni bubun te tano,
Ma maan aika kibakiba n ai aron tanon aon te bike.
28A b'aka ni neia ni maeka,
i rarikin nako um'aia n rianna.
29Ma ngaia are a am'arake aomata ao a bati n rauaki,
B'a E karekea nakoia te baere a tangiria.
30Ma i m'ain ae a rauaki,
ngke a bon tabe naba n am'arake,
31Ao e roko unin te Atua ao E ekianako nako.
E kamateia ake a rangi ni marurung i buakoia,
Ake kabanea n tamaroa n rorobuaka i buakoia Iteraera.
32A boni ngae n riki baikai, ma a bon teimatoa naba aomata ni bubure;
E ngae ni karaoi ana kakai, ma a aki kakoauaa naba.
33Ma ngaia are E katoki aia bong ni maiu, kanga ai aron tokin te ike;
Ao E motiki maiuia n te kabuanib'ai ae karina rokona.
34N taai ake E kamateia iai tem'angina i buakoia,
Ao a rairaki ngkanne ake nikiraia nakoina;
A raraoma ao a tataro ma nanoia ni koaua nakoina.
35A uringa ae te Atua are Moan te M'aaka bon te tia kamanoia,
Ao E a tia ni buokiia.
36Ma bon taiani kewe aia taeka nako;
Akea te koaua ni baike a taekin.
37Akea nanoia nakoina;
A aki kakaonimaki nakon aia boraraoi ma Ngaia.
38Ma E nanoangaia ana Aomata te Atua.
E kab'arai aia bure
ao E aki kamateia.
A bati ana tai n taotaona unna,
n aki karokoa nanona.
39E uringnga ae bon ti aomata ngaiia,
ae kanga ai aroni karen te ang ae roko ao n nako.
40Ai batiraa aia tai n rarawa ni kan aan-taeka i rouna n te rereua!
Ao m'aiti ra te tai ae a kananokawakia iai!
41A okioki aia m'akuri ni kataa te Atua,
Ao a kamaraka te Atua ae Tabu ae Atuaia Iteraera.
42A aki ururinga m'akana
ma te bong are E kamaiuia iai mairouia aiaia
43Ao E karaoi ana m'akuri ake ab'ab'aki ma kakai
n te tabo are aoraoi i Toan n te aba are Aikubita.
44E onea ranin aia karaanga nakon te raraa;
A aki kona ni moi I-Aikubita b'a akea te ran.
45E karokoia naango aika m'aiti kurikuri buakoia, ake a bora iai,
Ma biraoki ake a uru aon abaia.
46E kanakoia rookati b'a a na kang arokaia
ao a na uru aia tabo n ununiki.
47E kamate aia kureebe n aiti aika buubura aika b'aka ni karau,
Ao aia biku n te aiti.
48E kamate aia kao ni b'akan aiti aika buubura
aika b'aka ni karau i aoia,
Ao aia nanai n tiibu ni koron te baa.
49E kariki rawawataia ae bati ngke
E kaota nakoia unna ma bonon nanona ae moan te korakora;
Ao a atongaki arona aikai ngkana a roko
b'a ai aroia taan ua-rongorongo
aika roko b'a a na tiritiri.
50E aki tautaua unna
ke E katibanakoia man te mate,
Ma E kamateia n te aoraki ae kamaamate.
51E kabaneia ni kamateia naati m'aane ake karimoa
man utu nako i Aikubita.
52Ao E kairiia ni kaotinakoia ana botannaomata n ai aron te tia kawakin-tiibu
ngkana e kairiia ana nanai, Ao E kaiririia ri nanon te rereua.
53E kairiia raoi, ao a aki maaku;
Ma a b'ab'a aia kairiribai i taari.
54E kairiia nakon abana are tabu,
nakon te maunga are reke i rouna ni korakorana.
55E kakioia nako kaain te aba mai m'aaia;
E tib'ai abaia nakoia barongan nako Iteraera,
Ao E anga mwengaia b'a a na maeka iai ana Aomata.
56A kataa naba te Atua are Moan te Rietaata,
Ao a rawa ni kan aan-taeka i rouna;
A aki ongeaba nakon ana tua,
57A rawa ni kan aan-taeka ao a aki
kakaonimaki n ai aroia aia bakatibu. Akea onimakinaia.
58A rangi ni kauna te Atua i bukin ae a nako ni bangota
ao a taromauri bouananti ake iai.
59E un te Atua ngke E noriia,
Ma ngaia are E rangi n ribaia.
60E kitana ana Tembora are i Tiro,
are nena ni maeka i buakora.
61E kariaia aiara b'a a na taua te Atiniberita,
are kanikinaeani m'akana ma mimitongina.
62E rangi n un irouia ana botannaomata,
ao E anga ngaiia b'a a na kamateaki irouia aiaia.
63A mate aia rorobuaka n te buaka,
Ao akea ae a na mare ma aia ateiaine.
64A mate aia ibonga n te kabaang,
Ao a aki kariaiakaki aine ake a mate buia b'a a na tang n nanokawaki.
65Ao E uti te Uea n ai aron temanna ae uti ni matu;
Ai aron te aomata ae aintoa ae aki rau arona ngkana e manging.
66E katotoro rikakiia aiana ni
kataenikaiia n te aro are a mamaa iai n aki toki.
67Ao E rawa nakoia kanoan Ioteb'a;
E aki rinea te baronga are Eberaim.
68Ma E rinea te baronga are Iuta
ao te Maunga are Tion, are E rangi n tangiria.
69E katea ana Tembora ikekei
n ai aroni mwengana i Karawa;
E kamatoatoaa n ai aron aonnaba
are E karaoia b'a e na nene ni matoatoa n aki toki.
70E rinea Tawita are ana tabonibai b'a te uea i aoia Iteraera.
E anaa Tawita man te aba are a am'am'arake iai ana nanai n tiibu,
71ike e tararuaia iai,
Ao E karikia b'a te uea i aon Iteraera,
n ai aron te tia kawakin-tiibu i bukiia ana aomata te Atua.
72E tararuaia raoi Tawita n aki nanonano,
Ao e rabakau ni kaiririia.
Who We AreWhat We EelieveWhat We Do
2025 by iamachristian.org,Inc All rights reserved.
