1Tabeua te tai i mwiina, ao e mate uean Ammon are Naati, ao e a manga uea natina te m'aane are Anun.
2Ao e taku Tawita, “E rangi n akoai Naati ma ngaia, ae n na manga akoa naba natina te m'aane.” E kanako ia tabeman ana mataniwi nakon Ammon b'a a na tuanga Anun ana rainanoanga Tawita i bukin maten tamana
3ao a taku mataniwi mai Ammon nakon Anun, “Ko kakoaua b'a e bon rangi ni karinea tamam ngkai e kanako ia m'aane aikai i bukin karauan nanom? E aki, ma e kanako ia b'a e na tib'aiakina abara, b'a e aonga ni konaa ni manga oki n tiringiira.”
4Ao Anun, e tauia ana mataniwi Tawita ao e koroi buaia ni kabane ao e korouai niiniiraia rikaaki nakon koreaia, ao e kanako ia ni kaokiia.
5Ao a rangi ni b'ainrang.
Ao ngke e ongo arei Tawita ao e kanakoa ana taeka nako ia ana mataniwi akekei ni kaangai, “Kam na tiku i Ieriko ni karokoa a manga m'arairai buaimi, ao kam a tib'a konaa n okira ami auti.”
6Ao a tib'a namakinna kaain Ammon ae a rangi ni kauna Tawita. Ma ngaia are, a kabooi e raka i aon tenibwi ma aua te ngaa te kirokuraem te tirewa i bukin kaboaia te taanga ni buaka ake a toka i aoia aoti mai Metobotamia ao man abanuean Turia ake Maaka ao Tob'a.
7Tenibwi ma uoua te ngaa te taanga ni buaka, ao ai uana naba ma te uea are Maaka ma ana taanga ni buaka, ake a roko ni katei maeka i rarikin Meteb'a. Ao a kiitana naba aia kaawa ana taanga ni buaka Ammon man roko naba ni katauraoi nakon te buaka.
8Ao e ongo Tawita te b'ai ae e riki, ao e a kanakoa Ioaba ma ana taanga ni buaka.
9Ao a m'ananga ana taanga ni buaka Ammon nakon mataroan te kaawa are e buubura ao a katauraoi nakon te buaka, ngke a tei n aia tabo ni buaka ana taanga ni buaka Turia i nanon taiani marae.
10Ao e nooriia aia taanga ni buaka aia kairiribai Ioaba b'a a borein n iterana ake uoua. Ma ngaia are, e a anaiia tautian Iteraera aika a bane aroia b'a a na buakaniia kaain Turia.
11Ao e rinea tarina are Abitiai b'a e na kairiia ake nikiraia kaain te taanga ni buaka ao e tuangiia b'a a na buakaniia kaain Ammon.
12Ao Ioaba e tuanga tarina ni kaangai, “Ngkana I a aki konaa ni kaaitaraia kaain Turia b'a a rangi ni m'aiti nakoira ao ko a manga roko ni buokiira. Ao ngkana a manga rangi ni korakora riki kaain Ammon nakoimi, ao ti na manga roko ni buokingkami.
13Kam na ninikoria ao kakorakoraingkami ni buaka i bukiia ara aomata ao ana kaawa te UEA ae te Atua. I tataro b'a e na karaoi b'aai nako akana e kukurei iai.
14Ao e buakaniia tautian Turia Ioaba, ao a birinako kaain Turia mairouia.
15Ao ngke a nooria kaain Ammon b'a a birinako kaain Turia, ao a birinako mairoun Abitiai n okira oin aia kaawa. Ao e rairaki naba Ioaba n okira Ierutarem.
16Ao ngke a ataia kaain Turia ae a tia ni konaaki, ao a kawaekoa aia taanga ni buaka teuana are e mena n iteran te Karaanga are Iuberetiti are teuana. A kairaki ana taanga ni buaka Ataretera aikai iroun ana mataniwi n te taanga ni buaka are Tiobaka nako Ammon.
17Ao e ongo Tawita te b'ai ae a karaoia kaain Turia, ao e a bootia te taanga ni buaka ni kabane i aon Iteraera. A ri aon te Karaanga are Ioretan, ao e tuangiia b'a a na katauraoi nneia ni kaaitaraia ana taanga ni buaka Turia.
Bon i mwiin teutana moanakin te buaka,
18ao a birinako kaain Turia mairouia Iteraera. Ao Tawita e tiringiia itiua te ngaa taani buaka i aon aoti ao abwi te ngaa ake bon tautia. E bon tiringa naba Tiobaka, are aia mataniwi n te taanga ni buaka.
19Ao ngke a nooria uea ake a mena ngkoa i aan Ataretera b'a e a tia Iteraera ni kataenikaiia, ao a raoi ma Tawita ao a kariaia b'a e na riki b'a aia tia tautaeka. A aki manga oki kaain Turia ni buokiia kaain Ammon.
Who We AreWhat We EelieveWhat We Do
2025 by iamachristian.org,Inc All rights reserved.
