Etekiera 22 - Kiribati New Version Bible

Kabuakakaan Ierutarem

1Tabeua te tai i mwiina, e a manga taku te UEA:

2Etekiera ae natin te aomata, ko tauraoi ni kabuakaka Ierutarem? E onrake te kawa arei irouia taan tiritiri, ma ngaia ae ko na kauringiia aomata n aia bure nako

3ao tuangiia te b'ai ae I taekinna:

Ierutarem, kam a tia n tiringiia oin ami aomata ao kam a tia n taromauri taiani bouannanti. Kam na katuaaeaki n te tai ae e waekoa!

4A tia buure aikai ni karekeingkami n te bure, ao a tia taiani bouannanti ni karaoingkami b'a kam na aki tau i buku. Ma ngaia ae e a kaan katuaaeakimi are te kabane. Ane a na ngareakiningkami botannaomata ake tekorakina ao a na taetae ni kabuakakaingkami,

5ao a na b'ainingareingkami aomata aika a kaan ma aika a raroa i bukin ami kangaanga.

6A kabonganai oin m'aakaia taani kairiiri n tiritiri.

7Bon akea maibuakomi ae e karinea ana karo, ao kam m'am'anaia iruwa, ataei aika akea tamaia, ao aine aika a mate buuia.

8Kam aki karinei taabo ake a tabu ao kam karaoa te Taabati b'a kaanga boong n aki akaaka.

9A karaoa te kewe tabeman aika bon oin am aomata, n te aro are a tiringaki ake tekorakina. A kang iriko ni man ake a kareanaki nakon taian bouannanti ni baangotan te aba, ao ake tekorakina a aki konaa ni katoka karaoan b'aai aika a kammaira.

10A manga iein m'aane ma buun tamaia ke ma taian aine aika a aoraki n aine

11ke ma buuia tabem'aang. Ao tabeman a manga matu ma oin ai m'aaneia natin tamaia ke tinaia ma temanna.

12Iai tabeman maibuakomi aika a butim'aea te m'ane i bukin tiringan temanna. A manga bon kabuuburai bakaon taian roun am aomata nakoia raoia n Iteraera, ao a kaub'ai n aia m'akuri ni keweakiia tabem'aang. Ao ae e rangi ni buakaka riki, kam a tia ni m'aninga taekau, ae te UEA ae te Atua.

13N na katea Au timoi i bukin marakin nanou n ami m'akuri ao ami bure n tiritiri.

14E na mauna nako ninikoriami ngkana e bane Au m'akuri ma ngkami, ao kam na rangi ni ngore n te aro are kam na aki konaa n tabeki baimi. Bon aei Au taeka Ngai ae te UEA ao N na bon aki bita nanou.

15N na kamaenakoingkami i buakoia botannaomata n te aonnaba ao N na karokoa n tokina ami kawai ni kabane.

16Kam na kananorinanoaki i mataia botannaomata ake tabeua. Ao ane kam na ataia iai b'a boni Ngai ae te UEA ae te Atua ae I karaoi b'aai aikai.

E Na Kaitiakaki Ierutarem

17E taku te UEA:

18Etekiera ae natin te aomata, I atongiia Iteraera b'a akea manenaia kaanga nikira ni biti i nanon te ai i mwiin kaitiakan te tirewa.

19Ma ngaia ae, N nang ikotiia i Ierutarem.

20A na ran nako ni korakoran uniu n ai aron naba te biti ngkana e karanaki n te ai.

21Eng, N na ikotiia Ierutarem, ma ni kaura te ai i aaia, ma ni kamaunaia nako n uniu

22kaanga te tirewa i nanon te ai ae e ura m'aaka. Ao i mwiina, a na ataia b'a bon te UEA Ngai ae I katuaaia n uniu.

A Bane Ni Bure Aomata Nako i Ierutarem

23E taku te UEA:

24Etekiera ae natin te aomata, ko na tuangiia Iteraera b'a e a onrake abaia n te bure, n te aro are I rangi ni un iai Ngai ae te UEA!

25Ti te bo aia taani kairiiri ma taian raian aika a bekorara, ma n raebitiia konaia n aki akaaka. A kamateia aomata, ao i mwiina, a kimoai b'aai ni kabane aika a kakaawaki. A tiringiia buuia m'aane, ao a m'aiti aine ake a tiku n akea buuia.

26A katinanikui au Tua ibongan Iteraera! A aki ti rawa ni karinei b'aai aika a tabu, ma a bon rawa naba n reireiniia aomata kaokoron b'aai aika a tabu ma b'aai aika a aki tabu, ke te kaokoro i marenan baika a itiaki ma baika a baareka. A karaoa Au Taabati b'a kaanga te bong n aki akaaka, ai ngaia are, a aki karineai naba iai ake bon oin Au aomata.

27Ti te bo mataniwiin nako Iteraera ma taian kameanti aika a tiritiri, aika raebitii konaia n aki akaaka. A maiuakina te maiu ae e buakaka n aroia n kaikoakiia ma n tiringiia aomata.

28Ao e a manga taorimwiia burabetin Iteraera ni karabaa ni buure aikai n ana kaotioti ni kewe. I bon tuai man taetae nakoia, ma a kewe b'a a taku b'a iai te rongorongo ae I anganiia.

29A bon kewe ma ni kimoa aomata i bon irouia; a kabuakakaia aika a maiu ni kainano ao a aonikaia ianena.

30I tarataraa temanna are e na tei i bukin te kaawa ma ni kamanoa man uniu, ao ai uana naba ma katokan uruakana Irou. Ma bon akea temanna ae e reke.

31Ma ngaia ae N na katuuaia Iteraera ni uniu ae e tiritiri i bukin te b'ai are a tia ni karaoia, ao a na ataia b'a I a rangi ni un. Bon aei Au taeka Ngai ae te UEA.