Taian Areru 142 - Kiribati New Version Bible

Te Tataro i bukin Ana Buobuoki te UEA

1I wetea te UEA b'a E na buokai;

I bubutiia.

2I taekin nakoina baika I aki rau iai;

I tuangnga au kaangaanga ni kabane.

3Ngke e nangi b'ara nanou,

ao boni Ngaia ae ataa arou.

A tia taan ribaai ni karaba te b'ai ni

kam'am'ane i m'aiu i nanon te kawai ae I nakonako iai.

4Ngke I tara rarikiu,

ao I noria b'a akea ae na buokai,

akea ae na kamanoai.

Akea ae tabeakina maiu.

5Te UEA, I weteiko b'a Ko na buokai;

te UEA, boni Ngkoe ae te tia kamanoai,

Akea ae I kainanoia b'a ti Ngkoe n te maiu aei.

6Ko na ongo b'anaau ni kani buokaki,

b'a e korakora kainanou;

Kamaiuai mairouia taan ribaai;

a rangi ni korakora riki nako iu.

7Kamaiuai man rawaawatau;

ao N na neboiko n aia tai ni bootaki am aomata

i bukin am akoi nako iu.