Ieremia 18 - Kiribati New Version Bible

M'anangan Ieremia Nakon Titoan Te Kaatiibu

1E taku te UEA nako iu,

2“Ko na nakon titoan te kaatiibu, ao ngkana ko roko ikekei, N na tuangko te b'ai ae ko na taekinna nako ia aomata.”

3Ao I nako ikekei ao I noora te tia karao kaatiibu b'a e tabe ni karaoa te b'aata ae e uarereke i aon ana wiira ni karao kaatibu.

4Ao ngkana e aki roko te kaatibu n te tamnei are e tangiria, ao e konaa ni manga urua teina nakon te tamnei teuana.

5E tuangai te UEA b'a N na kaangai:

6Kaain Iteraera, iai m'aakau Ngai ae te UEA i aomi, kaanga te tia karao kaatiibu ae iai m'aakana i aon ana kaatibu.

7Ngkana I karawawataa te botannaomata ae e buakaka ni koutiia nako ma ni kamaaenikunna,

8ao e a manga rairaki te botannaomata anne man te buakaka, ao N na bita nanou.

9Ngkana I berita b'a N na kakorakoraa te botannaomata,

10ma ngkana e a manga moana aki ongotaekana nako iu ma ni karaoa te buakaka, ao ane N na manga bita nanou ao N na aki manga oki ni buokiia.

11Ma ngaia are, kam na ongo irou, ngkami aika kaain Iuta ao Ierutarem! I a tia n iangoia b'a N na oroingkami n te kabuanib'ai, ao N na aki manga bita nanou ni karokoa kam katoka ami bure ma ni moana maiumi ae e raoiroi.

12Ma I ataia b'a kam aki ongo. Ao kam na bon kaangai naba, “Ti aki tabe ma te b'ai ae Ko taekinna. Ti a tia n iangoia b'a ti na karaoa te bure, ao ti taningamatoa ma ni karaoa te b'ai ae ti bon tangiria!”

13Ma ngaia are, I tuangkami Ngai ae te UEA b'a kam na titirakiniia botannaomata nako, b'a a tia n ongongo karaoan te bure ae moan te kakamaaku n aron ae kam a tia ni karaoia ke a tuai.

14E a tia n rannako

te tinoo

are i aon maungan Reb'anon,

ao a aki konaa ni m'autakataka

taian karaanga n ran ikekei.

15Ma kam a tia n rairaki nako mairou

ngkami Au aomata

ngke kam kabuoki taian b'ai ni kaboiarara

nako ia bouannanti aika akea manenaia.

Kam a tia ni kiitana te kawai nikawai

ma n ira te kawai ae e aki ataaki

ike a na toki waemi iai n taian bouannanti.

16Ane e na uruaki abami,

ao a na bane akana ri rarikina

n taraia ma te maaku

ma ni katoutou atuuia.

17N na kamaenakoingkami kaanga bubun aontano

ae e ukaki nako n angin mainiku,

ngkana a buakaningkami ami kairiribai.

Ao i mwiina, N na anga nuukau nako imi

i nanon bongin te kabuanib'ai anne.

Te M'akuri Ni Kam'arua Nakon Ieremia

18A taku aomata tabeman, “Ti a katiaa taekan Ieremia! Bon iai ibonga n taai nako ike a konaa n reireiniira ana Tua te Atua, ao ai uana naba ma aomata ake a rabakau b'a a konaa n anganiira taeka n reirei, ao burabeti b'a a konaa n anganiira ana rongorongo te UEA. Ma ngaia are, ti na aki manga ongo i roun Ieremia, ma ti na bukinna n te bure.”

Ana Tataro Ieremia i bukiia Ana Kairiribai Nako

19Taiaoka te UEA, kaekaa au tataro.

Katokiia au kairiribai

man kabuakakaau.

20I kataia ni buokiia,

ma a manga kabooa mwiina

ni kena te m'anono ni kam'ane i buku.

I bon butiiko naba b'a

Ko na aki katuaaia.

21Ma ngkai I a butiko b'a

Ko na kamateia natiia n te baki

ke ni kamateia n te buaka.

Kakeai buuia ma natiia mm'aane

aine nako

n te aoraki ao te tiritiri.

22A a tia ni ken taian m'anono

aomata aikai ma b'ainikam'ane i buku, te UEA.

Karaoia b'a a na takaarua ni maaku

ngkana Ko kanako ia taanga ni buaka

b'a a na buakan mwengaia nako.

23Ko ataia b'a a baairea aron tiringakiu.

Ma ngaia are, Ko na un irouia ao Ko na katuaaia!

Ko na aki manga kab'ara aia bure

n aia bure aika a rangi ni kakamaaku.