Ieremia 32 - Kiribati New Version Bible

E Kabooa Te Tawaana Ieremia

1E taetae te UEA nako iu n ana katebwina n ririki te uea are Tetekia i aon Iuta, are bon ana katebwi ma wanua n ririki te uea are Nebukaneta n uea i aon B'aburon.

2N te tai anne, a tia ni katobibia Ierutarem tautian B'aburon, ao I mena ngai n te karabuuti n aia katawanang n tei n te bareti.

3E a tia n tua Tetekia b'a N na tauaki ikekei i bukin b'aai ni kabane ake I tuangiia aomata ake E taekin te UEA ae a kaangai:

Bon te UEA Ngai, ao N nang katokanikaia uean B'aburon i aon Ierutarem.

4E na tauaki te uea are Tetekia ao e na uotaki nakon te Uea are Nebukaneta, are e na i taramata n taetae ma ngaia.

5Ao i mwiin anne, e na uotaki nako Tetekia nako B'aburon, ike e na tiku iai ni karokoa tian are N na karaoia nakoina. Ma ngaia are, ngkana kam buaka ngkami aika kaain Iuta ma kaain B'aburon, ao kam na konaaki. Bon aei Au taeka Ngai ae te UEA.

6Rimwi riki, I a mena n te karabuuti, ao E taku te UEA nako iu:

7Ieremia, e na kawariko ai tarim are Anamera, are natin tarin tamam are Tiarum. Ane e na kabonakoa ana tawaana are i rarikin te kawa are Anatota, ma i bukina ngkai bon am koraki ni kaan, ao bon iai riaim ni kabooa, ao ngkana ko karaoa anne, e na bon tiku ni kaawakinaki n te utu.”

E a tia n tuangai te UEA b'a N na kabooa

8Ao e roko Ananera, n aron are E a tia ni berita iai te UEA ao e taku, “Taiaoka kabooa te tawaana are i rarikin Anatota i abaia te baronga are Beniamin. Bon iai riaina iroum ni kabooa, ao ngkana ko kabooa e na tiku iai i nanon ara utu.”

E a tia n tuangai te UEA b'a N na kabooa

9mai roun Anamera, ai ngaia are, I karaoa arei. Boona bon tebwi ma itiua te m'akoro n tirewa, ao I katinei ni kabane i aon te kainikatine.

10I tiainaia ao I kanikinaea mwiin te m'akuri, ao I anga b'a e na kakoauaaki, ao I katinea rawaawatan te m'ane i aon taiani kainikatine.

11Ao I mwiina, I anai katotoon mwiin te m'akuri ni boob'ai ake uoua te katoto are e kanikinaeaki, are kanoana taian tua ma aroia, ao te katoto are e uki

12ao I angan B'aruka are natin Neria te mm'aane are tibun Maateia, ao I anga ngaia nakoina i matan Anamera ma taani kakoaua ake a tia n tiainaa kaboakina, ao ai aomata ake tekateka ni mamataku mai nanon te katawanang.

13I taku nakon B'aruka i mataia ni kabane,

14“E a tua te UEA ae Moan te M'aaka ae Atuaia Iteraera, b'a ko na anai mwiin taiani m'akuri aikai, ni kauoua, mwiin te m'akuri are e kabob'ai are e kanikinaeaki ao katotoona, ao ko na karin i nanon te tiaeki te tano, b'a a aonga n tiku i nanon ririki aika a bati.

15E a tia n taekinna te UEA ae Moan te M'aaka, ae Atuaia Iteraera, b'a a na manga kabooi taian auti, tawaana, nne n aroka ni kureebe man te aba aei.”

Ana Titiraki Ieremia Nakon Te UEA

16Ao i mwiina, I tataro ni kaangai:

17Te UEA ae te Atua, Ko arora naako baim ao Ko karaoa karawa ao te aonnaba. Ko konaa ni karaoi b'aai ni kabane.

18Ko kaota am akoi nako ia roro aika ngaa, ma ko bon katuaaia aomata i bukin aia bure aia karo. Bon te UEA Ngkoe ae Moan te M'aaka.

19Ko karaoi am babaaire ni wanawanam ae e korakora, ao Ko karaoi b'aai aika a korakora ni kabane aika Ko a tia ni baairei ni m'aakam ae e korakora. Bon akea te b'ai teuana ae ti konaa ni karaoia ni karabaa mai matam, ao Ko anganiira kaniwangara ke ni katuaaira n aron are e bon riai n reke nakoira.

20Ko kakannato i bukin Am m'akuri aika a kamimii i Aikubita, ao Ko bon teimatoa ni karaoi i aon Iteraera ao ai uana naba n taabo nako n te aonnaba.

21Ko kakamaakuia kaain Aikubita n am kakai, ao Ko arora baim ae e korakora ni kamaiuia Am aomata aika Iteraera mai Aikubita.

22Ao i mwiina, Ko anganiia Iteraera te aba ae e rawata iai te miriki ma ana karewe te manibeeru, n aron are Ko a tia ni berita iai nako ia ara bakatibu.

23Ma ngke e a reke irouia ara bakatibu te aba aei, ao a manga aki ongotaeka nakoim. Ao ngkai Ko a katuaaia Iteraera n te kabuanib'ai.

24E a buakanaki ngkai Ierutarem, ao ti a kainano ni baki ma n aoraki. A a tia kaain Aikubita ni katei b'ain ninian oon ara kaawa, ao Ko konaa n nooria b'a E nang tauaki Ierutarem n aron are Ko a tia n taekinna.

25Ma ngaia are, Ko aera ngkai Ko tuangai b'a N na karekeia taani kakoaua ma ni kabooa te tawaana n au tirewa, ao ngaia bon i aon kawaina n tauaki irouia kaain B'aburon?

A na Kab'arab'ara Te UEA

I bukin Te Tawaana

26E kab'arab'ara te UEA ni kaangai:

27Ieremia, Bon te UEA Ngai ae te Atua, ao I bon konaa ni karaoi b'aai ni kabane!

28E bon koaua b'a N nang bon kam'anangaa te Uea are Nebukaneta b'a e na taua Ierutarem.

29A a kaman buakana te kaawa kaain B'aburon, ao ane a na taua ma ni kaurarakea. E a tia ni kaunai kaain Ierutarem ngke a aki toki n tatam'arake nako taubukin aia auti ma ni kabuoka te b'ai ni kaboiarara nakon B'aara ao a anga te wain nako ia anti ake tabem'aang. Ao ngkai a nang kabuokaki auti aikai ni kab'akaaki!

30N rongorongoia Iteraera ma kaain Iuta mai moana, a bon aki kakukureiai ao a kaunai n te b'ai are a tia karaoia.

31A a tia ni kaunai kaain te kaawa aei ni moa man te tai are e moan kateaki iai. I a tia ni baaireia b'a N nang urua

32i bukin m'akuri aika a buakaka ni kabane aika a tia ni karaoaki irouia kaain Iuta ma Iteraera, n reitaki ma ibonga ma burabeti.

33A tinanikuai; e ngae ngke I teimatoa n reireiniia, a bon aki kan ongo ke n reireiniia aroia ae e raoiroi.

34A a tia ni katei taian bouananti i nanon au Tembora, ao ngkai e a aki tau i bukin taromauriau.

35Ao a kairiia kaain Iuta nakon te bure ngke a manga karaoi taabo i bukin taromaurian B'aara n te M'arua are Innom, ike a karean iai natiia mm'aane ma natiia aine nakon Moreka. I bon tuai man tuangiia b'a a na karaoi buure aika a rangi n ribaaki aikai.

36Ieremia, E boni koaua te b'ai are ko taekinna. A a rawaawata Iteraera n te baki ma te aoraki, ao e na bon taua Ierutarem Uean B'aburon are Nebukaneta.

37E maraki nanou irouia kaain Ierutarem, ao N na kamaae nako ia nakon abaia ianena. Ma N na manga kaokiia n te bong teuana nako ikai ma ni kamaiuraoia.

38A na riki b'a Au aomata, ao N na riki b'a Atuaia.

39N angan nanoia te kantaninga ae ti teuana n te maiu aei b'a: neboakiu n taai nako, are e na bon nako ia mwiina ae e raoiroi ma aia kariki.

40N na karaoa te boraraoi ma ngaiia ae akea tokina, N na aki manga kerikaaki man karaoan ae e raoiroi nako ia; ao N na karina maakaku inanoia, b'a aonga n aki rairaki nako mairou.

41N na kukurei ni karaoa ae e raoiroi nako ia, ao N na katea aroia b'a a na riki raoi b'a kaain te aba aei ni koaua.

42E ngae ngke I a tia ni karokoa te kabuanib'ai i aoia aomata, ma n te bong teuana N na karaoi b'aai ni kabane aika a raoiroi i bukiia.

43Ieremia, ngkana ko kabooa te tawaana, ko kaotia b'a a na roko boong aika a na kabooaki iai taian tawaana ma ni manga kaboonakoaki. Ko taku b'a e a tia n tauaki te aba aei irouia kaain B'aburon ao e a tia n riki b'a te rereua, akea aomata ma maan iai.

44Ma a na roko boong, are a na kabanei iai aia tirewa aomata ni kabooi iai tawaana n taabo nako—i abaia kaain Beniamin, n te aono are i rarikin Ierutarem ao kaawan nako Iuta, ao n te aba are e tabukibuki, ao n aaba ake a rinano ake i maeao, ao n Rereua ake i Maiaki. A na riki taani kaboob'ai ma taani kaboonako b'aai ao taani kakoaua b'a ngaia aika a na tiainaa ao ni kanikinaea te beeb'a i bukin kaboonakoan te tawaana, i bukina ngkai N nang kaoka te aba aei nako ia Au aomata. Bon aei Au taeka Ngai ae te UEA.