2.Rongorongo 21 - Kiribati New Version Bible

1Ao e mate Ieotiab'ata ao e taunaki i rarikiia ana bakatibu i Ierutarem, ao e a manga uea natina te m'aane are Ioram.

Uean Iuta are Ioram(2 Uea 8.16-24)

2Iai natin Ieotiab'ata aika itiman m'aane: Ioram, Ataria, Ieiera, Tekaria, Ataria, Mikaera, ao Tebatia.

3Ao Ieotiab'ata, e anganiia n tatabemaniia nako aia tirewa ma aia koora, n reitaki ma b'aintangira aika a kakaawaki. E bon anganiia naba tabeia b'a taan tararuai kaawan Iuta ake a nonoaki, ma e a tia n rinea natina te m'aane are te karimoa are Ioram b'a e na onea mwiina ni uea.

4Ngke e a tia n reke iroun Ioram taekan te aba are Iuta, ao e tiringiia tarina, n reitaki ma tabeman taani kairiiri man te botannaomata.

5Ai tib'a tenibwi ma uoua ana ririki ni maiu ngke e uea, ao e tautaeka i nanon wanua te ririki mai Ierutarem.

6E mare Ioram ma natin Aaba te aine, ao e katotongiia ana utu Aaba ao uean Iteraera ake tem'angina ni karaoa te bure. E aki ongotaeka iroun te UEA ngke e karaoi m'akuri aika a kaairua,

7ma i bukina ngke e a tia ni karaoa te berita ae e matoa te UEA nakon te uea are Tawita b'a e na tautaeka temanna n taai nako man ana utu i aon Iuta, ai ngaia are e aki tangiria n tiringiia ni kamaunaiia ana kariki Tawita.

8Ngke e uea Ioram, ao e kakaitaraaki irouia kaain Etom ao a bon rinea aia uea temanna i bon irouia.

9Ao a m'ananga Ioram ma ana aobitia ao ana taani buaka i aoia aoti nako Etom, ike a katobibiaki irouia ana taanga ni buaka Etom. E birinako e bong,

10ao e aki manga reke tautaekanakin Etom iroun Iuta. E bon kakaitaraaki naba n te kaawa are Ribena n te tai anne.

A riki baikai i bukina ngke e a tia n tannako Ioram mairoun te UEA, te Atua are a tia n taromauriia aia bakatibu.

11E bon katei naba taian baangota ake baangotan te aba Ioram i aon taian tabuki ake Iuta man kairiia aomata nakon te bure nakon te UEA n taromauri antiia ianena.

12N te bong teuana, ao e reke te reta iroun Ioram mairoun Eria are te burabeti ae kaangai kanoana:

Bon iai au rongorongo nakoim mairoun te UEA ae te Atua are e taataromauriia ami bakatibu are Tawita. E a ataia ae ko tuai kakairi iroun tamam are Ieotiab'ata ke Ata are tibum te unim'aane.

13Ma ko a tia ni karaoi aron are a karaoia uean Iteraera aika taani bure aikai ao ko a tia ni katokiia aomatan Iuta nakon taromaurian te UEA, n aron are a tia ni karaoia Aaba ma ana kariki. Ko bon tiringa naba oin tarim, aika a raoiroi riki nakoim.

14Ngkai ko a tia ni karaoi baika a bubuaka aikai, ao e na katuaaia kaain abanueam te UEA n ae rawaawata, n reitaki ma am utu, ao e na kamaunai b'aai ni kabane aika ko b'ain.

15E na roko iroum te maraki ni biroto ao ko na tiku n rawaawata iai ni karokoa matem.

16Rimwi riki, ao te UEA e karaoia kaain Biritia ma kaain Arabia ake a maeka i rarikiia kaain Itiobia b'a a na un iroun Ioram.

17A buakana Iuta ao a iraei kaub'ain te uea man te bareti, ao a kairiia nako buuna ma natin Ioram m'aane b'a taian taenikai. Bon ti Aatia are te bina are e reke tikuna.

18I mwiin rikin aei, ao e orea Ioram te UEA n te maraki ni biroto ae moan te korakora.

19Tao e kaaniia uoua te ririki i mwiina, ao e a mate Ioram n te maraki. Bon akea te ai ae e korakora ae kauraaki i bukin karineana, e ngae ngke a tia ni karaoa aei aomata i bukiia aia bakatibu.

20Tenibwi ma uoua ana ririki ni maiu Ioram ngke e moana ueana, ao e tautaeka i nanon wanua te ririki mai Ierutarem. E mate, ao bon akea ae e nanokawaki ni matena. E taunaki i Ierutarem, ma e aki taunaki n ruanimateia uea.