1Te UEA, tai m'aninga taekan Tawita
ma kaangaanga ake e kaitaraa ma ngaai.
2Te UEA, Ko na uringa ana taeka are kab'aka nakoim,
are ana taeka ni bau, ngkoe ae te Atua ae M'aaka ae Atuan Iakob'a:
3N na aki okira mwengau ke nneu ni wene:
4N na aki motirawa ke ni matu,
5Ni karokoa ae I karekea te tabo ae E na maeka iai te UEA,
ae te Atua ae M'aaka ae Atuan Iakob'a.
6Ngke ti mena i Eberata,
ti ongo taekan te Atiniberita
ae e mena n te tabo teuana n uakaan ma Iaara.
7Ao ti kaangai, “Ti na nako n ana auti te UEA;
ti na taromauri i matan ana kaintokanuea.”
8Te UEA, Ko na nako ni Nnem ni Maeka,
Ngkoe ma te Atiniberita
are kanikinaeani m'aakam.
9A na b'ab'aina te eti am ibonga n taai nako;
a na anene n takaakaa ni kakatonga am botannaomata!
10Ko a tia ni kab'aka am Taeka nakon Tawita are am toro,
ma ngaia ae tai rawa nakon te uea are Ko rineia.
11Ko a tia ni kab'aka am Taeka ni bau nakon Tawita
am berita ae Ko na boni kakoroa bukina:
“N na karika temanna irouia natim m'aane b'a te uea,
Ao e na onea mwim n tautaeka.
12Ngkana a kawakina au boraraoi natim
ao a kawakin naba au taeka aika I anganiia,
Ao a na riki naba natiia b'a uea n ai arom n aki toki.
13E a tia te UEA n rinea Tion;
E tangiria b'a e na riki b'a mwengana:
14Aio te tabo ae N na maeka iai n aki toki;
aio nneu ae I tangiria b'a au tabo n tautaeka.
15N na kakab'aia Tion ni karekei nakoina b'aai ni kabane aika e kainanoi;
N na kanuaia n te am'arake ana aomata akana kananoanga.
16N na kakab'aiaia ana ibonga ni b'aai ni kabane akana a karaoi,
Ao a na takaakaa n anene ma te kakatonga ana botannaomata.
17Aio te tabo ae N na karika iai temanna mai buakoia ana kariki Tawita b'a te uea ae kakannato;
Aio te tabo naba ae N na kateimatoa mai iai ana tautaeka te uea ae I rineia.
18E na kab'ainrangiia ana kairiribai,
ma e na kakab'aia ma n tekeraoi ueana.
Who We AreWhat We EelieveWhat We Do
2025 by iamachristian.org,Inc All rights reserved.
