1.Rongorongo 5 - Kiribati New Version Bible

Ana Kariki Reuben

1Bon te karimoa te m'aane Reuben iroun Iakob'a, ma e bua nakoana ni karimoa i bukina ngke e matu ma temanna buun tamana. E a manga nako te karineaki ni karimoa mai rouna, ao e a manga anganaki Ioteb'a,

2e ngae ngke bon te baronga are Iuta ae te kabanea ni korakora mani kakarekeaki te tia kairiiri mai iai.

3Iai natin Reuben aika aman m'aane aika: Anoka, Baru, Etiron, ao Karemi.

4Aikai ana kariki Ioera:

5Temaia, Koka, Timei, Mika, Reaia, B'aara, ao Beera are te tia kairiiri man te baronga are Reuben.

6Rimwi riki, e uotaki nako Beera iroun uean Aturia are Tikerata Birenetera b'a te taenikai.

7A tauaki naba i nanon rongorongon te utu taekaia taani kairiiri man te baronga are Reuben: Ieiera, Tekaria,

8ao Bera are natin Atati te m'aane ao tibun Tema are kaain te kaainga are Ioera. A maeka n te aba are i rarikin te kaawa are Aroera, ni karokoa meang i Nebo, ao B'aara Meon,

9ao ni waerake nakon te rereua i maeaon te Karaanga are te Iuberetiti. A tangira te aba ae e buubura n aron aei i bukina ngke a rangi ni m'aiti aia nanai ni man aika a na kaawakin i Kireata.

10Ngke e uea Tauro, ao a buakaniia kaain Akera kaain te baronga are Reuben ma ni kataenikaiia, ao a anaa abaia are i mainikun Kireata.

Ana Kariki Kata

11A maeka kaain te baronga are Kata n aonon Batian, i meangin te baronga are Reuben. E reitinako abaia kaain te baronga are Kata n iraanako te kawai n toki n te kaawa are Tareka.

12Taani kairiiri ake tabeman n te kaainga bon Ioera, Tiabam, Ianai, ao Tiabata.

13Ao aia koraki boni Mikaera, Meturam, Tieb'a, Iorai, Iakan, Tia, ao Ebera.

14Bon ana kariki Abiaira ngaia ni kabane. Abiaira are e riki ana utu mairouia Uri, Iaroa, Kireata, Mikaera, Ietitiai, Iato, ao Buti.

15Ai bon natin Aberiera te m'aane, ao tibuni Kuni are te tia kairiiri n te kaainga.

16A maeka kaain te baronga are Kata ni kaawa ake n aonon nako Batian ao Kireata, ao ai uana naba ma te tabo n uteute are i Tiaron.

17A koreaki tauani mwiin aia utu n ana tai ni uea Iotam i aon Iuta, ao n ana tai ni uea Ieroboam i aon Iteraera.

18N taian baronga are Reuben, Kata, ao Manate Mainiku ao iai aia tautia aika 44,760 m'aitiia aika a kataneiaaki nakon te buaka n te marae ma taian otanga, kabaang, kainikatebe, ao kanoanikatebe.

19A buakaniia kaain Akera, ao kaain baronga ake Ietura, Nabiti, ao Notaba.

20Ni katoa nako ia tautia aikai ni buakaniia aia kairiribai, ao a aki toki n taatataro nakon te Atua ma n onimakinna b'a E na buokiia. Ao bon anne bukin totokanikaia baronga aika Reuben, Kata, ao Manate Mainiku i aoia kaain Akera ma taani buokiia.

21A reke irouia barongan Iteraera aikai 50,000 taiani kaamero, 250,000 taian tiibu, 2,000 taian aati, ao 100,000 te aomata.

22A m'aiti kaain Akera ake a mate i nanon tain te buaka, i bukina ngke E buaka te Atua ni kaaitaraia. A maeka kaain te baronga are Reuben, Kata, ao Manate i Mainiku n te aba arei ni karokoa te tai are a manga uotakinako iai b'a taenikai nako Aturia. Ana Kariki Te Baronga Are Manate i Mainiku

23E bon rangi ni korakora aomatan te baronga are Manate i Mainiku, ma ngaia are a tekateka kaaina n aononi Batian meang, ni karokoa B'aara Oman i meang.

24Aia taani kairiiri n te kaainga bon Ebera, Iti, Eriera, Atiriera, Ieremia, Otawia, ao Iariera. Bon taani kairiiri aika a rangi n ataaki ao bon tautia naba aika a ninikoria.

Konaakiia Baronga ake Reuben, Kata, ao Manate i Mainiku

25A aki kakaonimaki nakon te Atua are a tataromauria aia bakatibu kaain te baronga ake Reuben, Kata, ao Manate Mainiku, ao a manga moana taromauriaia antiia botannaomata ake E a tia ni kanako ia te Atua mai Kanaan.

26Ma ngaia are, E kanakoa uean Aturia are Tikeraka Birenetera te Atua b'a e na buakaniia barongan Iteraera aikai. E kairiia nako te uea b'a taenikai nako Aturia, ao man n te tai anne are e a kairoroia iai b'a a na maeka i Aba, Abora, Ara, ao i rarikin te Karaanga are Kotan.